Read Konyak Naga 2 AHNGPALAN 12 Bible Online

2 AHNGPALAN 12 - Konyak Naga bible

2 AHNGPALAN 12

¹Jehu wangpeng nyit shepupa wanglam lamwante, Judah me Joash ahngne meng; hüyange Iye Jerusalem me wangpeng deli ahngne meng; hüyange Inyu min Beersheba ching mepu Zibiah ngoh yangki.

²Joashwe, ngengpa Jehoiadawe Ite winne shaipu me I jin khongkümpu me Youngwanpa sheshao me hanghe shunang hatüo ling yangki.

³Tüoyangpoi ülao kahwanglante khümpu nyoijing lan yah yeteipe ngoh yangki. Kahtalan-e üne-o kahtang yin me toidopu hüyange sünyet jakke dopu phapu yelakpe ngoh yangki.

⁴Joashwe ngengpalante i, “Khümjing me toidopu jeng me phapu ngin, hüyange hipak lep iye toidopu yepha pe ngohyange phapu ngin hei mongloong ngin moini yowe angtüoh.

⁵Ngengpa lili-e yoiye ao phei shaoshan tüopawe peipu nginte yak jonglak, hüyange hatüo ngin wongpongne ngaipu shinne khümjing linge yepu me jonlak.”

⁶Hüpoi Joash ahngne mengpu wangpeng da me lüm ngoiye peiyapoi, ngengpalan-e khümjing mengpuwa linge yeyepe ngoh yangki.

⁷Tüokhei Joash ahngpawe ngengpa Jehoiada hüyange ülao ngengpalan nyik jem, hüyange imante tong, “Hangne numan-e khümjinga linge üyepu? Sha-a me peiye numan-e tüopu ngin numan me tah ang, numan yak mepu teitüoh; hümme nakshih khümjing linge yepu oklak.”

⁸Tüokhei ngengpalan-e, shaaji iman-e kahtalan mepu ngin-o yeyahlak, hüyange khümjing-o linge yeyelak she monge yah.

⁹Hüwante ngengpa Jehoiada-e pepakos ja yah pei, hüyange tüopa küplak me üwo ja lüo, hüyange hatüo khümjing shongme, khümjing te ongpu yakjah ye me angtam; hüyange nok yom-e ngohpu ngengpalan-e khümjing te yahpeipu ngin khongkümpu tüopa me hintam.

¹⁰Hangkih tingme pakos me ngin nangjange yolakei, ahngpa yaknyanpa hüyange ütahpa ngengpa ni peilak hüyange iyeleiye tokyange nyekhok me satam-e tüohlak.

¹¹Meiye nyanne tümyangphei me khümjing me toi lingpalan yakjong pate pha, hüyange iman-e hatüo pee aijonpa hüyange nokwepalan aoyinne khümjing we imante,

¹²hüyange long aijonpalan, long tangpalan, hüyange khümjing mengtepu lingeyelak pekhüw hei long shaklak jingne, hüyange khümjing lingeyelak toinan khongkümpu ümee ne pha.

¹³Tüoyangpoi khümjing te yah peipu ngin mepuwe khümjing nok jingne khüm wan, jeplak, tükkelak, nyawong, yejema-a hon hei khüm wanheisheng shakke linglak yejonpe ngohyangki.

¹⁴Tüome peipu khongkümpuwa nok linge yelak toinan shakpu hüyange toilingpalan nanmee ne pha.

¹⁵Ünyei ne, toi lingpalante nanmee phalak aoyin yak me ngin-a phünne pha, iman-e tüolan kahta phei ngin-a tei iye yelei; hangjingne iman-e ngaoting iye ling.

¹⁶Püohpu jingne dopu phapu ngin hüyange ünu dopu jingne phapu ngin khümjing me angpu pakos me ye-ang; hatüowa ngengpalan jingne ngoh yangki.

¹⁷Hüwante Aram ahngpa Hazael-e Gath chingnyu hah hüyange hatüo om. Tüophei me Iye Jerusalem ching hahlak jingne tüm.

¹⁸Judah ahngpa Joashwe, Ipayimlan hüyange Judah ahngpalan, Jehoshaphat, Jehoram, hüyange Ahaziahlan-e phünne phawe ngohpu üjao toinanlan, hüyange khümjing dojing me angpu hon khongküm, hüyange ahngnok me ngohpu hon khongküm Aram ahngpa Hazael tangte shon. Tüophei me I hüyange nyahponglan Jerusalem mepu shin-e ye.

¹⁹Sha-a Joash towe ngohpu toishao, hüyange Iye lingpu khongküm, Judah ahngpalan putahpangao laitep me tüolan-a nyanyange yengoh lak a?

²⁰I shaoshanpalan monge yong, hüyange kon meng kon, hüyange Silas yekaote laipu lamnyu me Millo nok me Joash toi.

²¹Hangjingne Shimeath üha Jozacar, hüyange Shomer üha Jehozabad, I shaoshanpalan-e I li ne tam; hüyange David chingnyu me iman-e I yoi payimlan phei muwe tüoh; hüyange Iha Amaziahwe I nanlei ahngne meng.