Read Konyak Naga 2 AHNGPALAN 13 Bible Online

2 AHNGPALAN 13 - Konyak Naga bible

2 AHNGPALAN 13

¹Judah ahngpa Ahaziah üha Joash wangpeng da me lüm shepupa wanglam lamwante, Jehu üha Jehoahaz Samaria me Israellan tangme ahngne menge wang, hüyange wangpeng pen me tet ahngne meng.

²Youngwanpa sheshao me hanghe yemei hatüo Iye ling, hüyange Nebat üha Jeroboam ünu hanghe kaiye Iye Israel ünu omne tam, tüopa pheite woi; tüopa mepu I yeyan.

³Tüokhei Israel phei tüi-e Youngwanpa mongshih ngai, hüyange Iye iman Aram ahngpa Hazael yak me, hüyange Hazael üha Benhadad yak me lakne yetampe phünne pha.

⁴Hüwante Jehoahazwe Youngwanpate yoppe tong hüyange Youngwanpawe Ite jai; hangjingne Israel shaoshiyatengpu Aram ahngpawe iman hangke shaoshine tam, Iye nge.

⁵Tüokhei Youngwanpawe Israelte yinnetampupa ja shon, hüyange iman Aramlan yak mepu lüowe ngai; hüyange Israellan üshong hipak kih-e toloimei me nyoi.

⁶Tüoyangpoi Jeroboam ünu hanghe kaiye Israel ünu omne tam, iman tüopa mepu yeyan. Hüpoi tüopa me kem; hüyange Samaria me Asherah kahyak yelakpe ang.

⁷Jehoahaz me koipong pheipu wetaipalan denga, tongtoi pen hüyange ya pheipu wetaipalan haja pen tokte kaiye hango yenang; hangjingne Aram ahngpawe iman mahne tam, hüyange tahnoijing mepu kahmak phungpu ja leye imante linge tam.

⁸Sha-a Jehoahaz towe ngohpu toishaolan hüyange Iye lingpu khongküm, hüyange I mongyongpu toishao, tüolan-a Israel ahngpalan putah pangao laitep me nyanyange ye-ngoh a?

⁹Tüokhei Jehoahaz Ipayimlan phei shi; hüyange iman-e I Samaria me mu; hüyange Iha Jehoashwe I nanleiye ahngne meng.

¹⁰Judah ahngpa Joash wanglam lampu wangpeng delüm me nyit shepupa hipak me, Jehoahaz üha Jehoashwe Israel tangme Samaria me ahngne menge wang, hüyange wangpeng pen me wok ahngne meng.

¹¹Iye-o Youngwanpa sheshao me hanghe yemei hatüo ling; Nebat üha Jeroboam ünu, hanghe kaiye Iye Israel ünu omne tam, Iye tüopa mepu yeyan; hüpoi I tüopa me kem.

¹²Sha-a Jehoash towe ngohpu toishaolan, hüyange Iye lingpu khongküm, hüyange I mong yongpu kaiye Iye Judah ahngpa Amaziah phei tüi-e hokpu; tüolan Israel ahngpalan putah pangao laitep me nyanyange ye-ngoh a?

¹³Jehoash li hüyange Samaria me ngeng-ahng mangjong me I mu, hüyange Iha Jeroboam I nanleiye ahngne meng.

¹⁴Sha-a aope Elisha hipa I lilak dak peiye dak-e ngoh, Israel ahngpa Jehoash I tangte lai, hüyange I shongme shap, hüyange hüke i, “Opa! Opa! Nanga Israel jing pongtongtoi hüyange koiweipongpa.”

¹⁵Elishawe ngao phawe i, “Wenglah hüyange lahhan ütam yayah,” hüyange Iye Ijing wenglah hüyange lahhan jon.

¹⁶Hüyange Elishawe Israel ahngpate i, “Nang lah keplak jingne paa tüoh”; hüyange Iye hatüo paa. Hüyange Elishawe yoi yak no yah-e ahngpa yak tangme nyenge ang.

¹⁷Tüophei me hipawe hangke nyüowe tam hüke, Ahngpawe Aram yekao me ngohpu tawo ep. Elishawe ngao phawe i, “Lahhan keptüoh!” Ahngpawe lahhan keppu phei jamshe, hipawe üngwünne i, “Nanga Youngwanpa lahhan, hüyange Aram tangme okpu ngelak lahhan. Hangjingne nange Aramlan Aphek me, nange iman manmahtam manmahtam hoklak.”

¹⁸Tüophei me Elishawe ülao lahhanlan yahtüoh hüyange tüophei kahtokte heappe tamtüoh she ahngpate i. Ahngpawe kahtokte lümme heap, hüyange lakmah.

¹⁹Hüwante Elisha mongshih ngai hüyange ahngpate i, “Nange nga me yejema-a wok me heaplak ne ngohyangki; hüma-a nange Aram manmahtam manmahtam hokhah shepu; hüpoi shaapa-a nange Aram lüm me hei oklak.”

²⁰Elisha li, hüyange iman-e I mu. Sha-a Moablan ükhonge wangpeng lep iye lümlei hipak me Israel chinghah ne pei.

²¹Ünja iman-e kahta ja mangmu ne taiye ngohwante, leihuyah, hüke peipu yo mepu ükhong ja nge, hüyange kahtalan-e kahta manga Elisha mangjong me shüppe tüohyange phette yan. Hüyange kahtawe Elisha waante letpu phei jamshe I nishe yange ye, hüyange I ya phei yong.

²²Sha-a Aram ahngpa Hazael-e Jehoahazwe wanglam lampu hipak khongkümpu me Israel shaoshi ne tam.

²³Hüpoi imante Youngwanpawe yayeng hüo, hüyange imante shüpshepu ngoh, hüyange iman tangte lüppe ye; hangjingne Abraham, Isaac, hüyange Jacobte jiengjeppu ang; hüyange tüolan-a mengne yetamlak yejema-a Iye sha-a te ngoiye I sheshao mepu yewintampe ngohnang.

²⁴Aram ahngpa Hazael li; hüyange Iha Benhadad-e I nanlei ahngne meng.

²⁵Hüwante Israel ahngpa Jehoashwe Hazael üha Benhadad yak mepu Ipa Jehoahaz mepu wehok me yahpu, chingnyulan nishe yahye. Lüm me Jehoashwe Ite okpu nge hüyange Israel chingnyulan yah ye.