Read Konyak Naga 2 AHNGPALAN 14 Bible Online

2 AHNGPALAN 14 - Konyak Naga bible

2 AHNGPALAN 14

¹Israel ahngpa Jehoahaz üha Jehoash wangpeng ni shepupa wanglam lamwante, Judah ahngpa Joash üha Amaziah ahngne menge wang.

²Ahngne mengne wangwante I nyupuh wangpeng da me nga ngohyangki; hüyange Iye Jerusalem me wangpeng da me tu wanglam lam; hüyange Inyu min-a Jehoaddin Jerusalem mepu ne ngoh yangki.

³Youngwanpa sheshao me hanghe ütingpa hatüo Iye ling, tüoyangpoi Ipayim David Ahngpa yelepe ngohyangki. Tüoleima Ipa Joash lingpuke Iye khongkümpu ling.

⁴Iye ülao kahwanglante khümpu nyoiyin yah yeteipe ngohyangki; kahtalan-e üne-o toidopu pha hüyange ülao kahwanglante sünyet jakke khüm.

⁵Amaziahwe ahngching I yak me onge mongjüonge lingpu phei jamshe, Ipa toipu I shaoshanpalan Iye toi.

⁶Tüoyangpoi Iye iman hayimlanpa-a yetoitam; hüpoi Youngwanpawe Mosa te phapu Ngaokhüm kih-e Iye jon: “Hayimlan ünu ümeng jingne nyupalan yetoilak, yejema-a nyupalan ünu ümeng jingne hayimlan yetoilak; hüpoi kahta lili yoi ünu ümeng jingne yoi lilak.”

⁷Amaziah Ahngpawe Edomlan hüm kahjee me haja pen toi; hüyange wehok me lanshe Sela chingnyu omme yah, hüyange tüopate Joktheel she nyik, tüopa min tenyihte ngoiye ngohnang.

⁸Tüophei me Amaziahwe Israel ahngpa Jehoash tangte ngaolan kipa shonne shapnyikke i, “Peikei, teman sheta hei sheta tei hüohu hah.”

⁹Hüpoi Ahngpa Jehoashwe tüolan ngao shonne ye: “Hipak ja me Lebanon kahtang me ngohpu huhpee jawe, Lebanon me ngohpu cedar te ngaolan shon: ‘Nenok naoyha tenok naoshe me shekonyu ne yahkei.’ Phao yinmok ja tüo kaiye linne tai, hüyange huhpee-a yawe shoppe tüoh.

¹⁰Sha-a Amaziah, nange Edomlan okyangki she nang mong yonge ngainang. Nang müktishiwa puwe monghahwe nok me ngohtüoh. Hangne nang hüyange nang phei Judah toitalak ne shaoshi ngaine tamki?”

¹¹Hüpoi Amaziahwe yemong: tüokhei Israel ahngpa Jehoash I kahtalan phei ong; hüyange I hei Judah ahngpa sheta hei sheta teihüowe Judah kahmük Beth Shemesh me hüo.

¹²Israel sheshao me Amaziah nyahponglan ye-okpu nge; hüyange I pheipu wetaipalan khongküm yoi yoi nokte yanne küm.

¹³Israel ahngpa Jehoashwe Beth Shemesh me Judah ahngpa Amaziah pho, hüyange Jerusalemte pei, hüyange Jerusalem jantpenyu Ephraim peten mepu üshukye peten ngoiye, yakkong gho peli nanjing menge tam.

¹⁴Hüyange hon hei khüm khongküm, hüyange ahngnok me angpu toinyu nanha khongküm, hüyange khümjing toinan khongküm, hüyange phopalan-o omme Iye yah, hüyange Samariate leihye.

¹⁵Sha-a Jehoash towe ngohpu toishao hanghepa Iye ling, hüyange I mongyonge okkeshangpu hüyange Iye Judah ahngpa Amaziah phei hokpu, tüolan-a Israel ahngpalan putah pangao laitep me nyanne yengoh pu a?

¹⁶Jehoash Ipayimlan phei shi, hüyange Israel ahngpalan phei Samaria me mu; hüyange Iha Jeroboam I nanleiye ahngne meng.

¹⁷Judah ahngpa Joash üha Amaziah, Israel ahngpa Jehoahaz üha Jehoash liphei me wangpeng pen me nga üyin me ngoh.

¹⁸Sha-a Amaziah towe ngohpu toishaolan Judah ahngpalan putahpangao laitep me nyanne yengohpu a?

¹⁹I toiwinlak jingne Jerusalem me konkonpu ja ngoh yangki; tüokhei I Lachish chingnyute phette tai, hüpoi I wepalan I pheite woiye tüoyekao te tai hüyange I tüome toi.

²⁰Iman-e I mang koipong me yah ye, hüyange David chingnyu me Ipayimlan phei Jerusalem me mu.

²¹Tüophei me Judah kahtalan khongkümpuwe wangpeng pen me wok lwngmei ne mengteiye ngohpu Iha Uzziah yah, hüyange Ipa Amaziah shotjing me ahngne mengetam.

²²Uzziahwe Ipa Amaziah li phei me Elath chinghah hüyange linge ye.

²³Judah ahngpa Joash üha Amaziah wangpeng pen me nga shepupa wanglam lampu hipak me Israel ahngpa Jehoash üha Jeroboam Samaria me ahngne menge wang hüyange wangpeng deli me ja ahngne meng.

²⁴Hüyange Youngwanpa sheshao me hanghe yemei hatüo Iye ling; Nebat üha Jeroboam ünu hanghe kaiye Iye Israel ünu jonne tam, tüolan khongkümpu mepu I yeyan.

²⁵Iye Israel yikeng apyekao me Hamath lamkeng mepu heyekao me yengmang ngoiye, Youngwanpa, Israel Kahwang ngao, Gath Hepherlan hipa Amittai üha Jona kaiye Iye ngaopuke Iye Israel yikenglan leihye.

²⁶Hangjingne Youngwanpawe Israel shanghah shaoshipu yeonge yemeipe nge; hangjingne bumei yejema-a rha she ao-o yetüoh; Israel jingne jamlak ao-o yenang.

²⁷Hüpoi Youngwanpawe wangphang mepu Israel min jintepu jingne phutte yewinlak she i: tüokhei Iye Joash üha ahngpa Jeroboam kaiye iman yintam.

²⁸Sha-a Jeroboam towe ngohpu toishaolan, hüyange Iye lingpu khongküm, hüyange I mongyongpu, hüyange Iye hangke hok, hüyange Iye hangke Judah jing Damascus hüyange Hamath Israel jingne pha, tüolan Israel ahngpalan putahpangao laitep me nyanne yengohpu a?

²⁹Jeroboam Ipayim phei, hüke Israel ahngpalan phei shi; hüyange I ha Zekhariawe I nanleiye ahngne meng.