Read Konyak Naga 2 AHNGPALAN 15 Bible Online

2 AHNGPALAN 15 - Konyak Naga bible

2 AHNGPALAN 15

¹Israel ahngpa Jeroboam wangpeng da me nyit shepupa wanglam lampu hipak me Judah ahngpa Amaziah üha Azariahwe ahngne menge wang.

²I ahngne menge wangwante I nyupuh wangpeng pen me wok lwngmei ne mengteiye ngoh yangki; hüyange Iye Jerusalem me wangpeng denga phei me ni ahngne meng; hüyange Inyu min Jecoliah, Jerusalem mepu ne ngoh yangki.

³Ipa Amaziahwe lingpuke, Iye Youngwanpa sheshao me hanghe shunang hatüo ling.

⁴Tüoyangpoi ülao kahwanglante khümpu nyoi yah yeteipe angyangki; kahtalan-e toidopu pha, hüyange tüolan khümjing yin me sünyet jakke do.

⁵Youngwanpawe ahngpate shet, tüokhei I lipu nyihte ngoishe Ime ngondak ngoh yangki; hüyange I jing nok ülao ja me I ngohyangki. Hüyange Iha Jotham-e kahmük kahtalan tangme hüyange noksa tangme ngao phün-e ngoh yangki.

⁶Sha-a Azariah towe ngohpu toishaolan, hüyange Iye lingpu khongküm, tüolan-a Judah ahngpalan putahpangao laitep me nyan-e yengohpu a?

⁷Azariah Ipayimlan phei shi, hüyange iman-e I Ipayimlan phei David chingnyu me mu. Hüyange Iha Jotham-e I nanleiye ahngne meng.

⁸Judah ahngpa Azariah wangpeng delüm me tet shepupa wanglam lamwante Jeroboam üha Zekhariawe Israel tangme Samaria me lekeng wok ahngne meng.

⁹Ipawe lingpu kih-e, Youngwanpa sheshao me hanghe ümengpa hatüo Iye ling. Nebat üha Jeroboam ünu hanghe kaiye Iye Israel ünu omne tam tüopa mepu I yeyan.

¹⁰Hüyange Jabesh üha Shallum-e I phei tüi-e konkon, hüyange kahtalan sheshao me shet, hüyange toi, hüyange I nanleiye ahngne meng.

¹¹Sha-a Zekharia towe ngohpu toishaolan Israel ahngpalan putahpangao laitep me nyan-e ngohnang.

¹²Hatüowa hüke, Youngwanpa ngao, hanghepa Iye Jehu ahngpate “Nang hayim Israel ahnglan shotjing me jin peli shepupa ngoiye shotlak she ngao,” hatüo ütahte ngaiyangki.

¹³Judah ahngpa Uzziah wangpeng delüm me tu shepupa wanglam lamwante, Jabesh üha Shallum Israel tangme ahngne meng, hüyange Iye Samaria me lekeng ja ahngne meng.

¹⁴Gadi üha Menahem Tirzah mepu ong, hüyange Samariate lai, hüyange Jabesh üha Shallum Samaria me nao, hüyange I toi; hüyange I nanleiye ahngne meng.

¹⁵Sha-a Shallum towe ngohpu toishaolan, hüyange Iye kon ümeng konpu, leihuyah, tüolan-a Israel ahngpalan putahpangao laitep me nyan-e ngohnang.

¹⁶Hüke Menahem, I Tirzah mepu taiwante Tiphsah chingnyu tüome nyoipulan, hüyange neikonpu yikenglan jaoshe-e mah tam; hangjingne tüopa chingnyuwe Ite yedo. Iye nao womteiye ngohpu shekolan seanyu nehoi kakke tamyangki.

¹⁷Judah ahngpa Azariah wangpeng delüm me tu shepupa wanglam lamwante Gadi üha Menahem-e Israel tangme ahngne menge wang, hüyange Samaria me wangpeng pen ahngne meng.

¹⁸Youngwanpa sheshao me hanghe ümengpa ne ngoh hatüo Iye ling. Nebat üha Jeroboam ünu hanghe kaiye Iye Israel ünu omne tam tüopa mepu Iye I üyin jin küm-e yeyan.

¹⁹Assyria ahngpa Pul, Israel chinghahlak jingne pei, hüwante Menahem ahngpawe kahmük me Iye okkeshangpu wong te Ite jampu tüolak jingne khüm ükhüw haja delüm me peli kilogram Ite pha.

²⁰Menahem-e Israel ngin, hüke shengnyu nginnyu ngohpu üyonglan khongkümpu mepu kahta lili mepu khüm ükhüw denga pong kange, Assyria ahngpa te phalak jingne yah. Tüokhei Assyria ahngpa tüopa kahmük me yenyoipe leihye mah.

²¹Sha-a Menahem towe ngohpu toishaolan, hüyange Iye lingpu khongküm tüolan-a Israel ahngpalan putahpangao laitep me nyan-e yengohpu a?

²²Menahem Ipayimlan phei shi; hüyange Iha Pekahiah I nanleiye ahngne meng.

²³Judah ahngpa Azariah wangpeng denga shepupa wanglam lamwante Menahem üha Pekahiahwe Israel tangme Samaria me ahngne menge wang, hüyange wangpeng ni ahngne meng.

²⁴Iye Youngwanpa sheshao me hanghe ümeng, ling; Nebat üha Jeroboam ünu hanghe kaiye Iye Israel ünu jonne tam, tüopa mepu yeyan,

²⁵Ahngpa Pekahiah nyahponglan woipa Remaliah üha Pekahwe Gilead mepu kahta denga woiyange lowe tam-e Samaria me ahngnok ümongpa me Pekahiah toi; hüyange I nanleiye ahngne meng.

²⁶Sha-a towe ngohpu Pekahiah toishaolan, hüyange Iye lingpu khongküm, leihuyah, tüolan-a Israel ahngpalan putahpangao laitep me nyan-e ngohnang.

²⁷Judah ahngpa Azariah wangpeng denga me ni shepupa wanglam lamwante Remaliah üha Pekah Israel tangme Samaria me ahngne menge wang hüyange wangpeng da ahngne meng.

²⁸Iye Youngwanpa sheshao me hanghe ümengpa hatüo ling; Nebat üha Jeroboam ünu hanghe kaiye Iye Israel ünu jonne tam tüopa mepu yeyan.

²⁹Israel ahngpa Pekah hipak me Assyria ahngpa Tiglath Pileser pei, hüyange Ijon, Abel-Beth-Maacah, Janoah, Kedesh, hüyange Hazor, chingnyulan, hüyange Gilead, Galilee, hüyange Naphtali yikenglan chinghah, hüyange kahtalan Assyriate phowe tei.

³⁰Tüophei me Elah üha Hosheawe ahngpa Pekah phei tüi-e konkon, hüyange toitam, hüyange Judah me Uzziah üha Jotham wangpeng da shepupa wanglam lamwante I nanleiye ahngne meng.

³¹Sha-a Pekah towe ngohpu toishaolan hüyange Iye lingpu khongkümpu, leihuyah, tüolan-a Israel ahngpalan putahpangao laitep me nyan-e ngohnang.

³²Israel ahngpa Remaliah üha Pekah wangpeng ni shepupa wanglam lamwante Judah ahngpa Uzziah üha Jotham ahngne menge wang.

³³I ahngne mengwante I nyupuh wangpeng da me nga lwngmei ne ngoh; hüyange Iye Jerusalem me wangpeng pen me wok ahngne meng. Hüyange Inyu min Jerusha, Zadok yhala ne ngohyangki.

³⁴Ipa Uzziahwe hangke ling, hüke Iye Youngwanpa sheshao me hanghe shunang hatüo ling.

³⁵Tüoyangpoi ülao kahwanglan khümjing yah yeteipe ngoh: kahtalan-e üne-o toidopu pha hüyange tüolan nyoi me sünyet jakke do. Youngwanpa nok ütangpa peten Jotham ahngpawe ling.

³⁶Sha-a Jotham towe ngohpu toishaolan hüyange Iye lingpu khongküm, tüolan-a Judah ahngpalan putahpangao laitep me nyan-e yengohpu a?

³⁷Tüolan nyih hipak me Youngwanpawe Judah phei tüi-e Aram ahngpa Rezin, hüyange Israel ahngpa Pekah shonne wang.

³⁸Jotham yoi payimlan phei shi, hüyange David chingnyu me Ipayimlan phei mu; hüyange Iha Ahazwe I nanleiye ahngne meng.