Read Konyak Naga 2 AHNGPALAN 16 Bible Online

2 AHNGPALAN 16 - Konyak Naga bible

2 AHNGPALAN 16

¹Remaliah üha Pekah wangpeng pen me tet shepupa Israel tang me wanglam lamwante Judah ahngpa Jotham üha Ahazwe ahngne menge wang.

²I ahngne menge wangwante Ahaz wangpeng da lwngmei ne ngohyangki; hüyange Iye Jerusalem me wangpeng penme wok ahngne meng. Ipayim David ahngpawe lingpu toimei pheite I yewoi, hüleima Youngwanpa I Kahwang sheshao me hanghe yemei tüopa Iye ling;

³hüyange Israel ahnglan-e lingpu pheite woi. Youngwanpawe Israel kahtalan sheshao mepu jange teiyangpu jatlan, nunushepu toishao pheite I woi, hüyange Iye yoiha netanha nehoi kahyakte toidopu pha.

⁴Ülao kahwanglante khümpu nyoijinglan, kahtangyin me, hüyange üyak pheipu peshümphang lili me Ahazwe toidopu pha hüyange sünyet jakke do.

⁵Hüwante Aram ahngpa Rezin hüyange Israel ahngpa Remaliah üha Pekah Jerusalem chinghah ne ong hüyange shüm; hüpoi iman-e Ahaz ye-okpe tüoh.

⁶Hüwante muh Edom ahngpawe Elath chingnyu om, hüyange tüome ngohpu Judah kahtalan jange tei. Elath me nyoilak jingne Edomlan pei, hüyange tenyih ngoiye ngoh nang.

⁷Tüokhei Ahazwe Assyria ahngpa Tiglath Pileser tangte ngaolan shonne i: “Taowa nang jingne shaoshanpa hüyange nang ha ngohnang; Ongkei, hüyange ü-phei hokne peipu Aram ahngpa hei Israel ahngpa yak mepu tao yintam pha.”

⁸Ahazwe Youngwanpa nok mepu hon hei khüm, hüyange ahngnok ghonu me angpu hon hei khüm yah, hüyange hatüo Assyria ahngpa tangte hünghao ne tümme shon.

⁹Assyria ahngpa Tiglath Peleserwe I ngao jai; hüyange nyahponglan woiyange Damascus chinghah ne peiye chinghahtam, Rezin ahngpa toi, hüyange kahtalan Kir te phowe tei.

¹⁰Aope Ahaz Ahngpa, Assyria ahngpa Tiglath Pileser phei hüolak jingne Damascuste ong, Iye Damascus me ngohpu wümjong nge. Hüwante Iye Uriah ngengpate wümjong nyoi, hüyange hatüo hangke ling, khakshuwe tümyange shonne ye.

¹¹Tüokhei Uriah ngengpawe tüo meimei kih-e wümjong ling, hüyange Damascus mepu ahngpa Ahaz yeshao me tümme shoyange ngoh.

¹²Aope Ahaz ahngpa Damascus mepu ye, ahngpawe wümjong nge. Tüophei me I wümjong shongte owe wen hüyange tüopa nyoite ong;

¹³hüyange Iye jakke dopu pha, hüyange hahying dopu, hüyange tüopa tangme dopu yu shokke tam, hüyange chingmei dopu iy shaitam.

¹⁴Youngwanpate jaowe tamyangpu shakphan yan wümjonga khümjing hei wümjong üla nipa me ngoh yangki; tüokhei Ahazwe tüopa-a Iye lingpu ülapa wümjong apyekao me sheihyangki.

¹⁵Hüyange Ahaz ahngpawe Uriah ngengpate ngao phawe i: “Wümjong üyongpa tangme shomme jakke dopu dotüoh, hüyange yaning hahying dopu hüyange ahngpawe jakke dopu hüyange I hahying dopu, kahmük me jakke dopu omme, hüyange iman hahying dopu, hüyange yinglak dopulan hüyange tüopa tangme jakke dopu iy, hüyange toidopu iy khongkümpu shaitam tüoh. Hüpoi shakphan yan wümjong pa-a üjingne phongyeng phonglai pu me jonlak jingne angtüoh.”

¹⁶Uriah ngengpawe Ahngpawe ngaowe tampuke khongkümpu ling.

¹⁷Hüyange Ahngpa Ahazwe shakphan yan yajenth taten khüwwin hüyange tüomepu yankhonglan yahwin, hüyange yengkook hanghe phangme shakphanyan mahu üpong ngoh tüopa mepu tüopa yah, hüyange hatüowa long shomme angpu tangme angetüoh.

¹⁸Hüyange Assyrialan ahngpa mongmeiye tamlak jingne Ahazwe khümjing mepu ahngpa shotjing lengjong sheihtei, hüyange khümjingte ahngpa ongpu yoi lam me sheihtam.

¹⁹Sha-a Ahaz towe ngohpu toishaolan, Judah ahngpalan putahpangao laitep me nyan-e yengohpu a?

²⁰Ahaz Ipayimlan phei shi, hüyange David chingnyu me Ipayimlan phei mu; hüyange I ha Hezekiawe I nanleiye ahngne meng.