Read Konyak Naga 2 AHNGPALAN 17 Bible Online

2 AHNGPALAN 17 - Konyak Naga bible

2 AHNGPALAN 17

¹Judah ahngpa Ahaz wangpeng pen me ni shepupa wanglam lampu hipak me Elah üha Hoshea Samaria me Israel tangme ahngne mengewang, hüyange wangpeng tu ahngne meng.

²Youngwanpa sheshao me hanghe yemei hatüo Iye ling; tüoyangpoi I sheshao me ngohpu Israel ahngpalan-e lingpu shinne yeje.

³Assyria ahngpa Shalmaneserwe I phei wehok ngai; Hoshea Shalmaneser phangte ong hüyange wangpeng lep iye Ite poon pha.

⁴Hüpoi Assyria ahngpawe, Hosheawe konmeng konpu nge; hangjingne Iye Egypt ahngpa So tangte ngaolan kipalan shon, hüyange Iye wangpeng lep iye phawe ngohpu poon yephape lak; tüokhei Assyria ahngpa Shalmaneserwe I pho hüyange küpnok me ang.

⁵Tüophei me Assyria ahngpa Shalmaneserwe Israel chingshao lan hah, hüyange Samaria chingnyu om. Hüyange wangpeng lüm shümme neikonyange ang.

⁶Hoshea wanglam lampu wangpeng tu shepupa me Assyria ahngpawe Samaria om, hüyange Assyriate Israellan phowe tei, hüyange Halah chingnyu me ütam, hüyange Gozan wankam mepu Habor yengyin shüpneiye ütam hüyange Medialan chingnyu yin me iman tüoh.

⁷Hatüowa hüke ngai; hangjingne Israel kahtalan-e Youngwanpa iman Kahwang aowe iman Egypt ahngpa yak mepu woitei, I phei tüi-e ünu om hüyange ülao kahwanglante khüm.

⁸Hüyange I kahtalan taiwante Youngwanpawe aoyin kahtalan jange tei, tüolan chingnyoi nokshaohpu wanglam phei te woi, hüyange Israel ahngpalan-e hüopu wanglamte kem.

⁹Israel kahtalan-e lowe Youngwanpa iman Kahwang phei tüi-e yeshupu toishaolan ling, hüyange iman chingshaolan khongkümpu me chingha üjoipa mepu chingnyulan ngoipu me iman-e ülao kahwanglante khümpu nyoi ling.

¹⁰Kahmüoh khongkümpu me hüyange üyak pheipu peshümphang khongkümpu me iman-e Asherah kahyak mounglan hüyange long shongnyu ange tam;

¹¹hüyange iman shao me Youngwanpawe jange teiyangpu jatlan-e lingpu kih-e, iman-e ülao kahwanglan wümjong üshei me sünyet jak. Iman-e lingpu ünu toishaolan kaiye Youngwanpa mongshih ngaine tam;

¹²hüyange iman-e mounglan shaoshan, hanghepa jingne Youngwanpawe imante i, “Numan-e tüopa kihpu toi yelinglak yang.”

¹³Tüoyangpoi Youngwanpawe I hipalan hüyange itpulan kaiye Israel hüyange Judahte kentinglak ngaowe i, “Taowe numan payimlante ngaowe tampu hüyange hanghepa Taowe numan tangte ü-shao shanpa hipalan kaiye shon, ngaokhümlan kih-e numan ümengpa lam mepu lüppe yetüoh hüyange ü-ngao khümlan hüyange nyanpu ngaokhümlan jontüoh.”

¹⁴Hüpoi iman-e yejai, hüyange ipayimlan, aoyinne Youngwanpa iman Kahwangte üting yelakpe iman mongjang wanne taipu kih-e, iman mongjang wanne mah.

¹⁵Hüyange I nyanpu ngaokhüm, hüyange ipayimlante Iye lingpu jiengjeppu, hüyange I sakilan hanghe kaiye imante saki pha, tüolan-a iman-e yeyah; hüyange iman-e jajang japu pheite woi hüyange jajang japu ne meng; hüyange iman neikonne ngohpu jatlan pheite woi, hüyange iman jeng Youngwanpawe tüolan lepu me iman-e yelinglak yang she ngaowe tam.

¹⁶Iman-e Youngwanpa iman Kahwang ngaokhüm lili meng hüyange tüopate khümlak jingne yanphei mahu üha ni yaowe ling; iman-e üne-o Asherah kahwanglan moung ling, shanhalante khüm, hüyange baal kahwang shaoshan.

¹⁷Hüyange iman-e iman shela yhalalan ülao kahwanglan te toidopu phawe jakke dopu pha; hüyange nuweshakke phongyengpu toi ling, hüyange I mongshih ngaiye tamlak jingne Youngwanpa sheshao me hanghe ümengpa ne ngoh iman-e hatüo linglak jingne iman nying nyingke phünne pha.

¹⁸Tüojingne Israelte Youngwanpawe yeonge mongshih ngai, hüyange I sheshao mepu iman yahtei; Judah jat tokte kaiye ao-o towe ye angtüoh.

¹⁹Hüpoi Judah kahtalan nehoi Youngwanpa iman Kahwange phapu ngaokhüm yejon; hüpoi Israel-e ükong wange tüohpu iman nyoingoh wanglam jon.

²⁰Hüyange Youngwanpawe Israel jat khongkümpu yeyah, hüyange iman shaoshi ne tam, hüyange iman I sheshao mepu Iye winne manküm manküm iman chinghahpalan yak me phünne pha.

²¹Hangjingne David nokphong mepu Iye Israel yanne tam; hüyange iman-e Nebat üha Jeroboam ahngpa ne menge tam. Hüyange Israel-e Youngwanpa pheite woipu mepu Jeroboam jangetei, hüyange imante ünu üyong omne tam.

²²Israel kahtalan-e Jeroboam-e lingpu, I ünu khongkümpu me kem;

²³Youngwanpawe I sheshao mepu iman yah mantei mantei, Iye I shaoshanpa hipalan kaiye ngaopu kih-e, iman-e tüolan mepu yeyan. Tüokhei Israel yoi kahmük mepu Assyriate phowe tei, tüome tenyihte ngoiye iman ngohnang.

²⁴Assyria ahngpawe Babilon, Cuthah, Avva, Hamath, hüyange Sepharvaim chingnyulan mepu kahtalan woi pei; hüyange Samaria chingnyulan me Israel kahtalan nanleiye angetam; hüyange iman-e Samaria chingnyulan mepu moth yah hüyange tüome nyoi.

²⁵Aope iman tüome üwangne nyoiwang, iman-e Youngwanpate yekhüm, tüokhei Youngwanpawe iman yo me yengkong mailang shon, hanghe kaiye iman ütam toi.

²⁶Tüokhei iman-e Assyria ahngpate ngaowe i, “Nange yahtaipu, hüyange Samaria chingnyulan me tüohpu jatlan-e kahmük me ngohpu kahwanglan yoppe khümpu yeshing; tüokhei Iye iman yo me yengkong mailang shon, hüyange leihuyah, tüolan-e iman toinang, hangjingne iman-e kahmük me ngohpu kahwangpa yoppe khümpu wanglam yeshing.”

²⁷Hüwante Assyria ahngpawe i, “Taowe tüoyekao mepu yahteipu ngengpalan yo mepu sheja tüoyekaote shontüoh; hüyange I tüoyekao te taiye ngohne tamtüoh; hüyange imante tüopa kahmük mepu Kahwangpa yoppe khümpu wanglam nyüolak.”

²⁸Tüokhei iman-e Samaria mepu yahteipu Israel ngengpa yo mepu naoshe ja leihye, hüyange Bethel me ngoh, hüyange imante hangke Youngwanpa te yoppe khümlak, nyüowe tam.

²⁹Tüoyangpoi jat liliye iman kahwanglan ling, hüyange Samarialan-e wepu nyoilan khümjing me ülao kahwanglan khümjing me hüyange jat liliye iman ngohpu chingnyulan me tüolan-a ang;

³⁰Hüyange Babilon kahtalan-e Succoth-Benoth kahwang moung ling, hüyange Cuth kahtalan-e Nergal moung ling, hüyange Hamath kahtalan-e Ashima moung ling;

³¹hüyange Avva kahtalan-e Nibhaz hei Tartak moung ling; hüyange Sepharvaim kahtalan-e iman hayim Adrammelech hei Anammelech kahwanglan jingne vün me jakke do.

³²Iman-e üne-o Youngwanpate yopkhüm, hüyange iman jingne iman yo mepu ülao kahwanglan jingne ngengpalan le, hüyange yopnok me ülao kahwanglan iman jingne iman-e toidopu pha.

³³Tüokhei iman-e Youngwanpate khüm, hüpoi üne-o iman-e iman peipu kahmüklan yoppe khümpu wanglam kih-e iman kahwanglan te-o khüm.

³⁴Tenyihte ngoi-e iman-e üshongwan tepu khüm-e wümpu wanglam kih-e lingnang; iman-e Youngwanpate yenyam, ye-i-ma-a iman nyanpu ngaokhüm, yejema-a linglak ngaokhüm, yejema-a ngaokhüm kih-e, yejema-a ngaophawe tampu hanghepa Youngwanpawe Jacob, aote Iye Israel she nyik, I hayimlante pha;

³⁵Youngwanpawe iman phei jiengjeppu yah, hüyange ngaophawe imante i, “Numan-e ülao kahwanglan te tahkhüm, yejema-a iman shao tahshan, yejema-a imante yinmok dopu tah toi.

³⁶Hüpoi Youngwanpa aowe numan Egypt kahtok mepu wong üyong pu phei hüyange yak hongyange woi, Ite hei numan-e numan nying nyingke khümlak yang, hüyange Ite hei numan-e dolak yang.

³⁷Numan jingne Iye nyanpu nyanpu-ngaokhüm, linglak ngaokhüm, hüyange ngaokhüm hüyange ngaophapu numan-e jintepu jingne linge jonlak yang; hüyange numan-e ülao kahwanglante yekhümlak yang:

³⁸Taowe numan phei yahpu jiengjeppu numan-e yepelak yang; yejema-a ülao kahwanglan numan-e yekhüm lakyang;

³⁹hüpoi Youngwanpa numan Kahwangte numan-e nyamlak yang; hüyange numan wepa yak mepu Iye numan yintamlak.”

⁴⁰Hüpoi kahtalan-e ngao yejai, hüyange iman-e iman ülangpa khüm-e wümpu pheite yelakpe woi.

⁴¹Tüokhei tüolan jatlan-e Youngwanpa te khüm; hüpoi üne-o iman-e iman kahyaklan te-o khüm; hükih-e iman hayimlan-e hüyange iman huyimlan-e, iman payimlan-e lingpuke, hükih iman-e tenyih te ngoiye lingnang.