Read Konyak Naga 2 AHNGPALAN 18 Bible Online

2 AHNGPALAN 18 - Konyak Naga bible

2 AHNGPALAN 18

¹Sha-a Israel ahngpa Elah üha Hoshea wangpeng lüm shepupa wanglam lamwante, Judah ahngpa Ahaz üha Hezekia ahngne menge wang.

²I ahngne mengwante I nyupuh wangpeng da me nga lwngmei ne ngoh yangki; hüyange Iye Jerusalem me wangpeng da me tu ahngne meng. Hüyange Inyu min Zekharia üha Abijah ngoh yangki.

³Hüyange Ijing pajeiyong David-e lingpu khongkümpu kih-e, Youngwanpa sheshao me hanghe ütingpa hatüo Iye ling.

⁴Iye ülao kahwanglante khümpu nyoilan menge tam hüyange yahtei; long shongnyulan paiwin, hüyange Asherah langewin. Iye üne-o Mosawe lingpu shakphan yan pu khoihnyai-e menge tam, hangjingne tüolan nyih hipak te ngoiye Israel kahtalan-e tüopate sünyet jakke wangshüm pha, hüyange Iye tüopate Nehushtan she nyik.

⁵Hezekiawe Youngwanpa Israel Kahwang te ütinglak; Judah me I shao me jeyah yejema-a I phei me jeyah I kihpu ahngpa ao-o mannang.

⁶Hangjingne Iye Youngwanpa te mongjüonge tük; Iphei te woipu mepu I yeyan, hüpoi Youngwanpawe Mosate ngaowe tampu, I ngaokhümlan Iye kentinge jon.

⁷Hüyange Youngwanpa I phei ngoh; ümekente I tailakei, okpu nge. Iye Assyria ahngpa phei tüi-e yong, hüyange I shao yeshanpe lak.

⁸Iye Philistialan Gaza hüyange tüopa neikon-e ngohpu yikenglan, chingshao üjoipa mepu wange chingtuk penyuwe neikon yangpu chingnyulan te ngoiye naowe tamyange om.

⁹Hüyange Hezekia ahngpa wangpeng peli shepupa wanglam lamwante, hatüowa Israel ahngpa Elah üha Hoshea wangpeng nyit shepupa ne ngoh. Assyria ahngpa Shalmanaser Samaria phei tüi-e ong, hüyange hatüo om.

¹⁰Hüyange wangpeng lüm shepupa üküm ye me iman-e hatüo yah: hüwante Hezekia wangpeng wok shepupa wanglam lampu hipak, hüyange Hoshea wangpeng tu shepupa wanglam lampu hipak ne ngoh yangki.

¹¹Hüyange Assyria ahngpawe Israel kahtalan Assyriate phowe tei, hüyange Halah me, Gozan mepu yengyin Habor me, hüyange Media chingnyulan me iman tüoh.

¹²Samaria toitapu hangne ngaipu she ima-a, iman-e Youngwanpa iman Kahwang ngao yejai, hüyange Iphei jiengjeppu ngaokhüm meng; hüke Youngwanpa shaoshanpa Mosawe ngaowe tampu khongküm, iman-e yeyah hüyange iman-e yejai.

¹³Hezekia ahngpa wangpeng pen me peli shepupa wanglam lampu hipak me Assyria ahngpa Sennacherib meipe latyange ngohpu Judah chingnyulan chinghah ne pei, hüyange tüolan-a om.

¹⁴Judah ahngpa Hezekiawe Assyria ahngpa, I Lachishme ngohwante ngaolan shonne hüke i, “Taowe püoh-e lingyangki; chingmei lamlinge chinghahpu mepu laktepha, hüyange nange hanghe yulakei taowe yah phaning.” Assyria ahngpa mepu ngao hüke ye; Hezekia ahngpawe Ite khüm kilogram haja pen, hüyange hon kilogram haja ja shonne tamtüoh.

¹⁵Hezekia ahngpawe khümjing me ngohpu khüm khongküm, hüyange ahngnok ghonu me angpu khongküm Ite shon.

¹⁶Iye üne-o Youngwanpa khümjing nok taküp me ngohpu hon khüw yah, hüyange Hezekia ahngpa Iye muh paowe lingpu taten shongnyu mepu hon yahyange, Iye tüolan-a khongkümpu Sennacherib tangte shon.

¹⁷Assyria ahngpawe nyahpong üngang phei Lachish mepu woipa ütah Tartan, Rabsari, hüyange Rabshakeh lan-e woiyange Hezekia phei hoklak jingne Jerusalem te shon. Aope iman onge ngoi, pheeileihjee lam-ang me ngohpu ütangpa yengnung yengto shongte iman pei hüyange yong.

¹⁸Hüyange iman-e Ahngpa Hezekia te nyik; hüwante I shaoshanpalan naoshe lüm Hilkiah üha Eliakim, ahngnok tepu yakjongpa; Shebna gho yaknyanpa; hüyange Asaph üha Joah, putahpangao tepu yakjongpa iman phei hüolak jingne shon.

¹⁹Rabshakeh, Assyria shaoshanpalan yo me naoshe jawe imante i, “Hezekia te itüoh, ‘Hüke Ahngpa üyonge Assyria ahngpawe inang: Nanga hanghe me monghüm yange mongyongpu shi?

²⁰Ju ükeng ngao shaha-a wehok jingne kon ümei hüyange wong she nange teih nangkü a? Sha-a numan-e Assyria phei tüi-e yongtepuwe numan-e aote monghüm nangki?

²¹Sha-a leiyah, nange tüopa paitepu ngeihyan shengshaoh, hüke Egypt te monghüm nang; hanghe tangme nange nyeng nang, hatüowe nang yakte lakülak hüyange hatüo lüokülak. Ite mong nyengpu lilite Egypt ahngpa hüke ngoh nang.

²²Assyria woipawe yelakpe ngaowe i, hüpoi numan-e üte, “Toman-e Youngwanpa toman Kahwang te monghüm nangshe” ima-a, hüma-a hatüowa I aohi ülao kahwanglan khümjing hüyange wümjong Hezekiawe yahtei, hüyange Judah hei Jerusalem te hüke i, “Numan-e tüopa wümjong tangme Jerusalem me khümlak yang,” she ngaopuwa Ine yeje a?

²³Assyria ahngpa min me taowe nang phei ngao inang: Nangehi teshinpu tangme shot-e oklak kahta yapha ning she ima-a, taowe nangte koiweipong haja ni yapha ning!

²⁴Nanga Assyria woipalan yo mepu üjoipa ja phei nehoi yeweih oklak, tüoyangpoi nange Egypt lan-e koipong pheipu hüyange tongtoilan shon phalak she teihnang!

²⁵Taowe Youngwanpa ye-ompe numan kahmük chinghah yange menge winnang she nange teih nangkü a? Youngwanpa, Iye üte i, Tüopa kahmük ching hahtüoh, hüyange mah tamtüoh.’ ”

²⁶Hüwante Eliakim, Shebna, hüyange Joahlan-e Assyria woipa Rabshakehte i, “Üyongpa, chingmei lamlinge nange tomante Aramaic ngao me ngaopha; hangjingne toman-e hatüo jainangki. Hebrew ngao me tahngao kei; hangjingne jantpe tangme ongyange ngohpu kahta liliye jainangki.”

²⁷Hüpoi Rabshakeh-e imante jan-e i, “Tüolan ngao ngaolak jingne ü-nokpuwe numan nokpu hüyange numan tangte tao shonpu a? Jantpe tangme shotte ngohpu mahlakpa kahtalan, aoyinne numan phei yoi ih hahlak hüyange yoi shokpu sea yinglak, iman tangte Iye tao yeshontampu a?”

²⁸Hüwante Rabshakeh yong, hüyange Hebrew ngao me üngwün, “Numan-e ahngpa üyong, Assyria ahngpawe hanghe i jaiyah!

²⁹Hüke ahngpawe inang, ‘Hezekiawe numan lowelamne tahtam; hüyange Iye numan I yak me yinne tampu ye-oklak.

³⁰Youngwanpawe ütingme teman yinphalak, hüyange tüopa chingnyu Assyria ahngpa yak me yephatamlak, she Hezekiawe ngaowe Youngwanpa te numan ütinglak ne tahtam.’

³¹Hezekia ngao tahjai; Assyria ahngpawe hüke inang, ‘Ü-phei chingmei lingyah, hüyange ü-tangte peiyah. Numan khongkümpute numan wuwüngkah mepu wuwünglick hahne, hüyange numan phukpee mepu phuklick hahne, hüyange numan yengnung mepu yeng yingne tamlak.

³²Numan kahtok lepu kahmük jate, tah hei wuwüngti ngohpu kahmük, hahheiying hei wuwünglick ngohpu kahmük, olive minnga hei zahtai jelo ngohpu kahmük, hüke numan yelipe üyin ngohlak ne numan tao peiye woiye mantei manteipu mongme. Hüyange Youngwanpawe teman yintam phalak she ngaowe Iye numan yoh tamwante Hezekia ngao tah jai.

³³Assyria ahngpa yak mepu jatlan kahwang jawe nehoi yoi kahmük yinne tamya ei?

³⁴Hamath hüyange Arpad kahwanglan ümeken me ngoh nangki? Sepharvaim, Hena, hüyange Ivvah kahwanglan ümeken me ngoh nangki? Ü-yak mepu iman-e Samaria yintampu a?

³⁵Aope tüolan kahwanglan shejawe nehoi iman kahmük toman Ahngpa mepu yintam ya ei? Hüma-a Youngwanpawe Jerusalem yintam külak she numante hangke teih ne tampu?’ ”

³⁶Hüpoi kahtalan-e ngao yengaipe ngoh yangki, hüyange Ite hango yejan; hangjingne Hezekia ahngpawe imante hango yejanlak jingne ngaophawe ang.

³⁷Hüwante Eliakim, Shebna, hüyange Joah mongmeng ngaiye iman inkhek hit, hüyange leihye, hüyange Assyria woipa jawe hanghe ngao i, Ahngpate ngaolan pha.