Read Konyak Naga 2 AHNGPALAN 19 Bible Online

2 AHNGPALAN 19 - Konyak Naga bible

2 AHNGPALAN 19

¹Aope Ahngpa Hezekiawe tüopa ngaolan jai, Iye yoi inkhek hit, hüyange yoi nying nyingke monnye inyange Youngwanpa nokte tai.

²Hüyange Iye ahngnok yakjongpa Eliakim, Gho yaknyanpa Shebna, hüyange ngengpa lwngmeilan monnye inyange Amoz üha Isaia hipa tangte shon.

³Isaia phei ngaolak jingne ahngpawe tüolan ngao phei shonne tei; “Hatüowa mongmenglak, teetampu, hüyange wüotüopu nyih ngohnang. Toman-a moipaine tümpu sheko ja le nang, hüpoi tüopa linglak jingne jamloi wong yenang.

⁴Assyria ahngpawe üyin Kahwangte teetamlak jingne yoi shaoshanpa ütahpa shonne ngohnang; Youngwanpa nang Kahwange tüopa teetampu ngao jainang hüyange aoyinne ngaoyangki imante teetampu ngohkülak. Tüokhei towe ngohpu toman kahtalan jingne nange Kahwangte yoppha.”

⁵Aope Isaiawe Ahngpa Hezekia mepu ngaolan tüo,

⁶Iye tüopa ngao shonne ye, “Hüke numan-e numan nokpute ilak yang; ‘Hüke Youngwanpawe inang, nange jaipu ngaolan hanghe kaiye Assyria ahngpa shaoshanpalan-e Youngwanpa phoiwüm, hatüote nang nyam-e tah ngoh.

⁷Leihuyah, taowe Ite yaha ja ange tamlak, hüyange Iye ngaowoong ja jailak hüyange I yoi kahmükte yemahlak; hüyange iman kahmük me yanglow phei Taowe I mahne tamlak.’ ”

⁸Lachish tüohyange Assyria ahngpa leihye hüyange Libnah chingnyu neikonpu me hok nangki she Assyrialan woipa Rabshakehwe jai; tüokhei I phei ngaoshen ponglak jingne tüoyekaote I tai.

⁹Assyrialante ngaolan hüke pei, Sudan ahngpa Tirhakah woiyange iman chinghahlak jingne Egypt nyahponglan peiküki she jai. Aope ahngpawe tüopa ngaolan jai, Iye Judah ahngpa Hezekia te nyanpu laija shonne i,

¹⁰“Hüke numan-e Judah ahngpa Hezekia te ngaowe itüoh: ‘Nange monghümpu nang Kahwange, Assyria Ahngpa yak me Jerusalem yeyeilak she nangte i, hüpoi hatüo ngaowe nang lowelamne tahtam.

¹¹Assyria Ahngpawe Iye mahtamlak jingne teih yangpu jat hei li te hanghe ling nange jai yangki. Nang yinne oklak she nange teihnang kü a?

¹²Ü-puhei payimlan-e Gozan, Haran, hüyange Rezeph chingnyulan mahtampu, hüyange Telassar me nyoipu Eden kahtalan toi; hüpoi iman kahwanglan aohi-o iman yintampu ye-ok!

¹³Hamath, Arpad, Sepharvaim, Hena, hüyange Ivvah chingnyulan mepu ahnglan ümeken me ngohnangki?’ ”

¹⁴Ngaolan kipalan yak mepu nyanpu lai-a Hezekiawe yah, hüyange hatüo iyelei; hüyange Youngwanpa tangte Hezekia ong, hüyange hatüo Youngwanpa sheshao me laan.

¹⁵Hüyange Youngwanpate Hezekiawe yop, hüyange i, “O Youngwanpa, Israel Kahwang, cherubim tangme shotte ngohpu, kahtoknyu ahngching üshei tangme, hüke nang shaha Kahwang-a nang hei ngohnang; nange wang hei kahtoknyu linge ngai.

¹⁶O Youngwanpa, nang na shongpha, hüyange jaipha; nang mük eptam pha, O Youngwanpa, hüyange leihuyah üyin Kahwangte phoiwüm-e tamlak jingne Sennacherib-e shonpu ngaolan jaitüoh.

¹⁷Üting me Assyria ahngpawe jatlan maapu mahtam hüyange iman hango yenangpu ne linge tampu toman-e shingnang;

¹⁸hüyange iman kahwanglan vün me jakke tamteki: hangjingne iman kahwang ne yeje, hüpoi kahtawe lingpu yaktoi, long hei pee; tüojingne iman-e tüolan mah ne tamteki.

¹⁹Sha-a tüojingne, O Youngwanpa toman Kahwang, I yak mepu toman yinpha, hüyange nangte yoppe tongnang, hüke kahtoknyu ahngching khongkümpuwe nang hei Youngwanpa Kahwang, hüke nang hei she shingne oklak.”

²⁰Hüwante Amoz üha Isaiawe Hezekia tangte shonne i, “Hüke Youngwanpa Israel Kahwange inang: Nange Assyria ahngpa Sennacherib jengme üte yoppu kih-e taowe nangte jaiteki.

²¹Youngwanpawe I jingne ngaowe tampuwa hatüo ngohnang: “Zion wangngoipu yhalawe nangte phoiwüm tamnang, hüyange nangte nyiye phoiwüm tamnang; Jerusalem yhalawe nang tokphei te ngüm shengnang.

²²“Ao te nange phoiwüm-e yaoleye tam? Hüyange ao phei tüi-e nange nang ngaowüng ütangyete tei, hüyange nang mük ütang yete nganne lei? Israel Kahwang üjaopa phei tüi-e heiya!

²³Nang ngaolan kipalan kaiye nange Youngwanpa phoitam, hüyange hüke i, ‘Ütongtoilan üngang phei taowe kahmüoh ütangpa ngoiye, Lebanon ümongpa ngoiye ongnang; hüyange tüome cedar pee daopu, hüyange tüopa me shemeipupa cypress peelan taowe akke winlak; hüyange tao ngohjing shedaopupa I ülick lick tampu phaonyu jong ngoiye onglak.

²⁴Taowe yengnung shao hüyange kahheng jing yeng yingteki, hüyange ü-ya lokke tampuwe Egypt yengyin khongküm ea ne tam.’

²⁵“Hipak nangjange taiteki taowe hatüo hangke tüm-e ang, üshongwante taowe hatüo hangke lingne tam nange yejai a? Nange chingtuk pepeyange ngohpu chingnyulan ütük linge menge tüohlak jingne Taowe sha-a hatüo ngaine tam;

²⁶tüojingne tüolan kahta wong shoiye ngoh yangki; iman mokh hüyange yashan-e ngohyangki; iman phao mepu hüng kih-e, hüyange phümyak laipha üyoi kih-e, noktok me hüng ngaipu kih-e, hüyange ju manngoipe ngaipu wongli kih-e ngoh yangki.

²⁷Hüpoi nang shotpu hüyange nang taipu hüyange yepu hüyange Ü-phei tüi-e nang mongshih ngaipu taowe shing;

²⁸Ü-phei tüi-e nange mongshih ngaipu jingne, hüyange nang otamaohepu ü-nasa ngoiye ongtepuwe, Taowe nang nateang me üyankeilei shintamlak; hüyange nang jupen me lagam (yankam) shintam lak, hüyange nang peipu lamnyu temuh Taowe nang leih yene tamlak.”

²⁹Tüophei me Isaiawe ahngpa Hezekia te i, “Nang sheshao me füo hatüone ngohkülak: tüopa wangpeng me numan-e iman nying nyingke ngaipu hahlak, hüyange ni shepupa wangpengo jakih muh ngaipu mepu; hüpoi lüm shepupa wangpeng me numan-e üli deitüoh, hüyange tah yahtüoh, hüyange wuwünglick pesha me deitüoh, hüyange tüopa ülick hahtüoh.

³⁰Hüyange Judah nokphong jetohapulan nishe üya kahtok yete yulak, hüyange ütangye me ülick licklak.

³¹Hangjingne Jerusalem me hüyange Zion kahtang me jetohapulan ngohlak; hangjingne Youngwanpawe lahnyikpu üyong puphei tüopa-a linglak.

³²“Tüojingne Assyria ahngpa jeng Youngwanpawe hüke inang: ‘I tüopa chingnyute yepeilak, yejema-a tüome lahhan ükek ja nehoi yekeplak, yejema-a tüopa chingnyu yete Iye ree shongyange yepeilak, yejema-a tüopa chingnyu neikon pume kahtonne linge yengailak.

³³I peipu lamnyu temuh, tüoyekao temuh I lüppe yelak, hüyange I tüopa chingnyute yepeilak. Tao, Youngwanpawe ngaoyangki.

³⁴Hangjingne yoi jingne, hüyange ü-shaoshanpa David jingne, hatüowa hei yinlak, Taowe hatüo chingnyu yintamlak.’ ”

³⁵Hüyange tüoyape Youngwanpa shongmokpa Assyrialan lakjing te pei hüyange lakh ja detet me nga toi; hüyange napning kahtalan shinlüo wante, leihuyah, iman khongkümpu lipu mang shaha ne ngohyangki.

³⁶Tüokhei Assyria ahngpa Sennacherib yayonge tai; hüyange leihye-e Nineveh me ngoh.

³⁷Nyih ja, aope Ijing kahwang Nisroch khümjing me yoppe ngoh, Iha ni-Adrammelech hei Shahezer niye yanglow-e I toi; hüyange iman Ararat kahmükte chingtai. Ihalan yo me ja Esarhaddon-e I nanleiye ahngne meng.