Read Konyak Naga 2 AHNGPALAN 2 Bible Online

2 AHNGPALAN 2 - Konyak Naga bible

2 AHNGPALAN 2

¹Sha-a aope Youngwanpawe Elijah yüpnyeih leipu me nowe teilak hipak ngoi, hüwante Elijah hei Elisha ni Gilgal mepu yayonge tai.

²Elijahwe Elishate i, “Chingmei lamlinge nanga tüome ngohkei; hangjingne Youngwanpawe tao Bethel te shonnang.” Hüpoi Elishawe jan, “Taowe jienge inang, Youngwanpa üyin ngohtepuwe, hüyange nang üyin ngohtepuwe taowe nang yetüohlak.” Tüokhei iman Bethel te tai.

³Hüyange Bethel me ngohpu hipalan ükhong ja peiye Elisha te tong, “Youngwanpawe nang nokpupa nang mepu tenyih yah teilak she nange shingya?” “Üm, taowe shingnang,” hüpoi tüojeng hüng tah i, numan jünge ngohkei she Elishawe jan.

⁴Elijahwe Elishate i, “Elisha, chingmei lam linge nang hümme tan ngohkei; hangjingne Youngwanpawe tao Jerikhote shonnang.” Hüpoi Elishawe jan, “Taowe jienge inang, Youngwanpa üyin ngohtepuwe, hüyange nang üyin ngohtepuwe taowe nang yetüohlak.” Tüokhei imni Jerikho te tai.

⁵Jerikho me ngohpu hipalan ükhong ja Elisha tangte pei hüyange Ite tong, “Youngwanpawe nang nokpupa nang mepu tenyih yahteilak she nange shingya?” “Üm, taowe shingnang,” “Hüpoi tüojeng hüng tah i, numan jünge ngohkei, she Elishawe jan.”

⁶Hüyange Elijahwe Elisha te i, “Elisha, chingmei lamlinge nanga hümme tanne ngohkei; hangjingne Youngwanpawe tao Jordan yengyinte shon nang.” Hüpoi Elishawe jan, “Taowe jienge inang, Youngwanpa üyin ngohtepuwe, hüyange nang üyin ngohtepuwe taowe nang yetüohlak.” Tüokhei imni yelakpe tai.

⁷Hipalan denga ngoiye imni phei Jordan te woi. Elijah hei Elisha ni Jordan yengme yong; hüyange hipalan denga shejai she yong.

⁸Hüwante Elijahwe yoi inkhek yahpuwe nüpyange tüophei yengte heap, hüyange yeng-a jaye jaye te yanne ngohwante, imni-a kahwan tok me janyekao te tai.

⁹Aope iman kaiye taiyapeih, Elijahwe Elishate i, “Tao nang mepu yah manteipe taowe nang jingne hanghe linglak tong pha.” Hüwante Elishawe i, “Taowe nangte yoppe tongnang, nang mepu yaha üngan meitam üphong ni nyeiye üte angtam pha.”

¹⁰Hüwante Elijahwe jan-e i, “Nange shewanpu tongküpu yang; tüoyangpoi, nang mepu tao yah teipu nange ngema-a, nange hüke tüolak, hüpoi ye-nge ma-a, hatüo hüke yetüolak.”

¹¹Hüke imni teingaowe kem ngohwante, leihuyah, vün tongtoi, vün koiponge shuyange imni pa me ngaiye imni yanne tam, hüyange Elijah-a yüpnyeih leipuwe wangte nowe in.

¹²Elishawe tüopa nge, hüyange Iye üngwün “Opa, Opa! Wongnangpupa Israel yintampa! Nanga taimah nangki!” Hüyange Iye shaaji ni she ye-nge. Hüyange mongmengpuwe Elishawe yoi inkhek ni ne hit.

¹³Hüyange Elijah jing inkhek I mepu yeipu toon, hüyange leihye, hüyange Jordan yengnah me yong.

¹⁴Hüyange Elijah mepu yeipu inkhek Iye toonne yahpu, tüowe yengte heapyange i, “Elijah Kahwang, Youngwanpa üpu?” Tüophei me üne-o Iye yengte heapwante yoi yoi ne tamme yan; hüyange Elisha linne tai.

¹⁵Aope Jerikho me ngohpu hipalan denga I nge, iman-e i, “Elijah yaha-a Elisha me ngoh nangki!” Hüyange iman I phei hüo ne wen, hüyange I sheshao me iman nying nyingke kahtokte khuh ta.

¹⁶Hüyange iman-e Ite i, “Sha-a leihuyah, nang shaoshanpa lan toman wongnangpu kahta denga ngohnang; chingmei lam linge toman taiye nang nokpupa yam ne tampha. Aoweshingpu Kahwang yahawe I nowe inyange kahtang ütamme, yejema-a kahjee ütamme, yeine tam-e ngohne ok.” Elishawe jan-e i, “Tah, numan yetailak yang.”

¹⁷Hüpoi iman taine mantam mantam she I te hei tai ne tampha she shaohwante Iye i, “Taitüoh.” Tüokhei iman kahta denga tai hüyange nyihlüm mongme iman-e kahjee phaotang üshei me Elijah yam, hüpoi iman-e I yetüo.

¹⁸Hüke I Jerikho me tanne ngohwante iman I tangte leihye; hüwante Iye imante i, “Taowe numante tahtai she ye-i a?”

¹⁹Sha-a Jerikho chingnyu mepu kahta lan-e Elisha te i, “Leihuyah, toman-e nangte yoppetong nang: üyongpa nange ngepu kih-e, chingnyu nyoijinga meinang; hüpoi yengpa-a yemei, hüyange kahtok-e ülick yepha.”

²⁰Iye i, “Ü-tangte hüm shokyange yengtük üla ja yah peikei.” Tüokhei iman-e hatüo I tangte yah pei.

²¹Hüyange Iye yengnungte wen, hüyange tüopa me hüm shok-e tam, hüyange i, “Hüke Youngwanpawe inang, Taowe tüolan yeng jaowe tamyangki; shaaji tüopa hipak me peiye lipu yejema-a ülick yelickpu yengohlak.”

²²Tüokhei tenyihte ngoiye Elishawe ngaowe tampu kih-e tüopa yeng jaowe ngoh nang.

²³Elisha Jerikho tüohyange Bethel te ong, hüyange I lam me kem-e ngohwante, hashih nahalan Iphei hüolak jingne pei, hüyange Ite phoitam, hüyange Ite yaowe i, “Tüomepu taitüoh, nang shangkopa, taitüoh nang shangkopa!”

²⁴Hüyange Iye lüppeye leiwante iman nge, hüyange Youngwanpa min me imante phoiwüm tam. Hüwante phao yo mepu shapnyu ünyu ni ngai, hüyange iman hashih nahalan deli me ni phünne hitte tam.

²⁵Tüomepu Elisha Carmel kahtangte ong, hüyange phei me I Samariate leihye.