Read Konyak Naga 2 AHNGPALAN 20 Bible Online

2 AHNGPALAN 20 - Konyak Naga bible

2 AHNGPALAN 20

¹Tüopa nyih hipak me Hezekia lilak ne dak-e ngohyangki. Hüyange Amoz üha Isaia hipa I phei ponglak jingne pei, hüyange Ite i, “Hüke Youngwanpawe inang, ‘Nenok khongkümpu üyin shinne tüm-e angyah; hangjingne nang lilak, hüyange nang meipu ye-oklak.’ ”

²Hüwante Hezekia yoi sheta jant yekaote lüp hüyange Youngwanpate yoppe i;

³“O Youngwanpa, hangke taowe nang sheshao me ütingpa me hüyange mongjang ngaotingpa phei kem, hüyange nang sheshao me hanghepa meipu ngoh hatüo taowe lingyangki, sha-a teihtüopha.” Hüyange Hezekia yeonge khah-e shap.

⁴Hipa Isaia, ahngpa tüohyange yayong, hüpoi I nokshao pekam kaiye mantaipe Youngwanpa ngao I tangte pei hüyange i:

⁵“Nishe leih yetüoh, hüyange ü-kahtalan woipa Hezekiate itüoh, hüke Youngwanpa nangpa David Kahwange inang: Taowe nange yoppu jaiteki, Taowe nang mükphi ngeteki. Leihuyah, Taowe nang mei tamlak. Nyihlüm mongme nang Youngwanpa nokte tailak.

⁶Hüyange Taowe nang jin wangpeng pen me nga paowe tamlak. Taowe nang hüyange tüopa Jerusalem chingnyu Assyria ahngpa yak mepu yinlak. Hüyange Taowe tüopa chingnyu yoi jingne, hüyange ü-shaoshanpa David jingne yinlak.”

⁷Hüyange Isaiawe i, “Phuklick an ja yahkei, hüyange iman-e hatüo yahyange tanti tangme neam-e tamtüoh, tüophei me I meikülak.”

⁸Ahngpa Hezekiawe Isaia te tong. “Youngwanpawe tao meiye tamlak hüyange lüm shepupa nyih me tao Youngwanpa nokte onglak she ipute leppu yepinlakpa hanghe ngohlak shi?”

⁹Isaiawe jan-e i, “Nang jingne Youngwanpa mepu tüopa yepinlakpa ngohlak, hüke Youngwanpawe Iye janpuwa linglak; Sha-a, nange yashüm-a yafünlam sheshao yete ya-kai pen tailak heiya yejema-a tokphei yete ya-kai pen leih yelak?”

¹⁰Hezekiawe jan-e i, “Yashüm jingne-a sheshao yete ya-kai pen taine tampu she-o! Tokphei yete ya-kai pen leih yene linge tamtüoh.”

¹¹Hüyange Isaia hipawe Youngwanpate yop hüyange Youngwanpawe ahngpa Ahaz angpu yafünlam yashüm mepu ya-kai pen tokphei yete leih yah ye.

¹²Tüopa nyih hipak me Babilon ahngpa Baladan üha Merodach Baladan-e Hezekia tangte nyanpulai hüyange hünghao phei shon: hangjingne Hezekia dak-e ngoh nang she Iye jai.

¹³Hezekiawe iman mongmei sheiye yah, hüyange imante Iye toinyu nanha yowe angjing nyoi khongküm, hon, khüm, üpeameipu muli, hüyange üpeameipu minnga, hüyange I jing oleng angjing nok, hüyange I me ngohpu yonglah khongkümpu hüo. Hezekiawe imante Inok me yejema-a I ahngching me nangpu khongkümpu yehüotampu yenangpe ngoh.

¹⁴Hüwante Isaia hipawe Hezekia ahngpa tangte pei hüyange Ite i, “Tüolan kahta ümeken mepu nang tangte peipu shi? Hüyange iman-e nangte hanghe i ei?” Hezekiawe jan-e i, “Iman kahmük üjai, Babilon mepu peipulan ngohnang.”

¹⁵Iye i, “Iman-e ahngnok me hanghe ngepu shi?” Hezekiawe jan, “Tenok me ngohpu khongküm iman-e ngeyangki, taowe imante ü-moth yehüotampu hango yenang.”

¹⁶Hüwante Isaiawe Hezekiate i, “Youngwanpa ngao jaitüoh.

¹⁷Leihuyah, ahngnok me ngohpu khongküm hüyange nang payimlan-e tenyihte ngoiye yowe angpu khongküm Babilon te yahteilak hipak ja peiküki; hango towe ye-anglak, she Youngwanpawe inang.

¹⁸Nang püm mepu ngaipu huhayim ütam-o yahteilak, hüyange Babilon ahngnok shaoshanlak jingne lingyangpu kahta ne menglak.”

¹⁹Ahngpa Hezekiawe I üyin jin hipak mongma-a chingmei hüyange okkeshangpu ngohlak te leppu she shinge pei, tüokhei Iye jan-e i, “Youngwanpa mepu nange üte yahpeipu ngaolan-a meinangki.”

²⁰Sha-a Hezekia towe ngohpu toishaolan, hüyange Iye hangke yengnung linge ngaiyange, tüomepu hangke yengto linge chingnyute yahpei, tüolan-a Judah ahngpalan putahpangao laitep me nyanyange yengohpu a?

²¹Hezekia ipayimlan phei shi: hüyange Iha Manasseh I nanleiye ahngne meng.