Read Konyak Naga 2 AHNGPALAN 21 Bible Online

2 AHNGPALAN 21 - Konyak Naga bible

2 AHNGPALAN 21

¹Manasseh Judah ahngne menge wangwante I nyupuh wangpeng pen me ni lwngmei ne ngohyangki. Hüyange Iye Jerusalem me wangpeng denga me nga ahngne meng. Inyu min Hephzibah ngoh yangki.

²Youngwanpa sheshao me hanghe ümengne ngoh, jatlan aoyin Youngwanpawe Israellan sheshao mepu jange tei, iman-e jonpu nunushepu toishaolan kih-e Manassehwe ling.

³Hangjingne Ipa Hezekiawe menge winyangpu ülao kahwanglan linge ye, hüyange Iye Baal jingne wümjong ling, hüyange Israel ahngpa Ahab kih-e Asherah kahwanglan ling; hüyange wangmepu shanhalan te khüm, hüyange iman shaoshan.

⁴Hüyange Iye Youngwanpa khümjing me ülao kahwanglan wümjong ling; hanghe jeng Youngwanpawe Jerusalem me Taowe ü-min anglak she i.

⁵Iye Youngwanpa khümjing nokshao pekam mongme moini kao me wangdang shanhalan khongkümpu jingne Iye wümjong ling.

⁶Iye yoiha vün me jakke dopu pha. Iye phongyeng phonglaipu hüyange nyinnyenge lingpulan üpongyam, hüyange phongyenge ülam yampu toi ling. Iye Youngwanpa sheshao me I mongshih ngailak ne ümengpa üngang jonne ling.

⁷Khümjing me Iye Asherah kahwanglan moung angetam, hanghepa nyoi jeng Youngwanpawe David hüyange Iha Solomon te, “Hatüo Jerusalem me, hüyange tüopa nok me, hanghepa Taowe Israel jat hei li üshei yomepu leye ngohnang, tüoken nyoi-a üte khümpu nyoi ne menglak she i.

⁸Taowe imante ngaowe tampuke khongküm iman nehi linglakei she ima-a, hüyange Ü-shaoshanpa Mosawe imante ngaophapu kih-e khongkümpu linglakei she ima-a, Taowe iman payimlante phapu kahmük mepu Israel shaaji yaphei waakem ne yetamlak, she ngaowe tam.”

⁹Hüpoi Judah kahtalan-e Youngwanpa ngao yejai, hüyange Manassehwe jatlan kahta Israel jatlan sheshao mepu Youngwanpawe mahtam, iman phei nehoi shemeng she ümengpa linge woine tam.

¹⁰Youngwanpawe I shaoshanpa hipalan kaiye ngaowe i,

¹¹“Judah ahngpa Manassehwe tüolan nunushepu toishaolan lingtepuwe hüyange iman sheshao me ngohpu Kananlan phei nehoi shemeng she ümengpa ling hüyange kahyaklan kaiye Judah ünu omne tamtepuwe,

¹²hüke Youngwanpa, Israel Kahwange inang, Leihuyah, Jerusalem hüyange Judah tangme Taowe ümengpa wengtuh ja peine tamlak, hüke aoyinne tüopa jeng jailakei, na moini panlak.

¹³Taowe Jerusalem tangme Samaria te sheampu vee kanglak, hüyange ahngpa Ahab noksa te sheampu leng shuwe peilak: hüyange kahtawe nükhah sheng waoyange shongkülonge angpukih-e, Taowe Jerusalem phutte winlak.

¹⁴Ümothleipalan jetoha ngohpu-o winne tamlak; hüyange iman wepalan yak me iman phünne phalak hüyange iman-e wepalan üshei sheshao me iman toine tamlak hüyange kuhleihne tamlak.

¹⁵Hangjingne ü-sheshao me hanghe yemei hatüo iman-e ling, hüyange iman payimlan Egypt kahtok mepu ngaiyang phei me, tenyihte ngoipu mongme iman-e Tao mongshih ngaine tam.”

¹⁶Tüotokte Manasseh-e Jerusalem jaye üshuk mepu jaye üshuk ngoiye manmaa manmaa ümeng yenangpu kahtalan iy shai; ünyei ne üne-o I ünu hanghepa Youngwanpa sheshao me ümengpa ne ngoh tüopa lingpu kaiye Iye Judah te ünu jonne tam.

¹⁷Sha-a Manasseh towe ngohpu toishaolan hüyange Iye lingpu khongküm, hüyange Iye lingpu ünulan, tüolan-a Judah ahngpalan putahpangao laitep me nyanyange yengohpu a?

¹⁸Hüyange Manasseh li hüyange ahngnok pesha, Uzza pesha me mu; hüyange Iha Amon I nanleiye ahngne meng.

¹⁹Amon Judah tangme ahngne menge wangwante I nyupuh wangpeng da me ni lwngmei ne ngohyangki; hüyange Iye Jerusalem me wangpeng ni ahngne meng; hüyange Inyu min Jothbah ching mepu Haruz yhala Meshullemeth ngoh yangki.

²⁰Ipa Manassehwe lingpukih-e Youngwanpa sheshao me hanghe ümeng hatüo Iye ling.

²¹Ipa kempu lamnyu üshei me Iye kem, hüyange Ipawe shaoshanpu mounglante shaoshan, hüyange tüolante khüm.

²²Iye Ipayim Kahwang Youngwanpa winne tüoh, hüyange Youngwanpa lam me yekem.

²³Amon shaoshanpalan-e Ite lowelam ne tam, hüyange ahngpa-a I yoi ahngnok me toi.

²⁴Hüpoi Amon ahngpa phei tüi-e konmeng konpalan khongkümpu kahmük mepu kahtalan-e toiwin, hüyange pinnyuhalan-e I nanleiye Iha Josiah ahngne mengtam.

²⁵Sha-a Amon towe ngohpu toishaolan hanghepa Iye ling tüolan-a Judah ahngpalan putahpangao laitep me nyanne yengohpu a?

²⁶I yoi mangjong me Uzza pesha me muwe tüoh; hüyange Iha Josiah I nanlei ahngne meng.