Read Konyak Naga 2 AHNGPALAN 22 Bible Online

2 AHNGPALAN 22 - Konyak Naga bible

2 AHNGPALAN 22

¹Josiah nyupuh wangpeng tet lwngmei ne ngohwante Judah tangme ahngne menge wangyangki; hüyange Iye Jerusalem me wangpeng delüm me ja ahngne meng, hüyange Inyu min Bozkath ching mepu Adaiah yhala Jedidah ngoh yangki.

²Iye hanghe Youngwanpa sheshao me ütingpa ngoh hatüo Josiahwe ling, hüyange Ipayim David ahngpa kempu lamnyu üshei me I kem, hüyange yakjah ye yejema-a yaknya yete yelüp.

³Josiah lye wanglam lampu wangpeng pen me tet shepupa me, gho yaknyanpa Meshullam üha Azaliah üha Shaphan, Youngwanpa nokte Ahngpawe shonne i,

⁴“Ütahpa ngengpa Hilkiah tangte taitüoh, hüyange khümjing taten pongme khümjing te peipulan mepu ngin shaiye yom-e ngohpu ngengpalan mepu ngin hangshin peiye ngoh ngaolan yahkei.

⁵Hüyange iman-e hatüo Youngwanpa nok me yakjongpa ne menge toi lingpalan yak me pha ne tamtüoh; hüyange hatüo iman-e Youngwanpa nok me, nok mengpulan linge yelak ne ngohpu toi lingpalan kahtalante,

⁶pee aijonpalan, nokwepalan, hüyange long aijonpalante, hüyange nok linge yelak me yahlak pekhüw hüyange long shaklak jingne pha ne tamtüoh.

⁷Hüpoi toishao me yakjongne mengpu kahtalan-a khakshuwe ngaoting ipalan, tüokhei iman phei ngin jeng tokkeheiye itte sheamlak wongpongne yeje.”

⁸Ütahpa ngengpa Hilkiahwe yaknyanpa Shaphante i, “Taowe khümjing me Ngaokhüm laitep tüoteki.” Hüyange Hilkiahwe laitep-a Shaphan te pha hüyange Iye hatüo i.

⁹Hüyange nyanpa Shanphan ahngpa tangte leihye, hüyange nishe ahngpa tangte ngaolan yahpei hüyange i, “Nang shaoshanpalan-e khümjing me peipu ngin-a ngaiteki, hüyange hatüowa Youngwanpa nok me yakjongpa ne ngohpu toi lingpalan yak me phateki.”

¹⁰Yaknyanpa Shaphan-e ahngpate i, “Ngengpa Hilkiahwe üte laitep ja phawe ngohnang.” Hüyange Shaphan-e ahngpa shongme hatüo üngwün-e i.

¹¹Aope ahngpawe ngaokhüm laitep me ngohpu ngaolan jai, Iye yoi inkhek hit;

¹²hüyange ahngpawe ngengpa Hilkiah, Shaphan üha Ahikam, Micaiah üha Acbor, yaknyanpa Shaphan, hüyange ahngpa yompa Asaiah imante ngao phawe i;

¹³“Numan taitüoh, üjingne hüyange kahtalan jingne hüyange Judah khongkümpu jingne tüopa laitep me nyüowe ngohpu ngao jeng Youngwanpate tongtüoh. Hangjingne teman phei tüi-e Youngwanpa mongshih ngaiye ngohnang, hangjingne teman payimlan-e tüopa laitep me ngohpu ngao, hüyange teman jeng nyanpu khongküm pu kih-e linglak ngao yejai.”

¹⁴Tüokhei ngengpa Hilkiah, Ahikam, Acbor, Shaphan, hüyange Asaiah, Jerusalem üla nyoi omme lingpu nyoi me ngohpu hinyu ja min Huldah tangte tonge ngaolak jingne tai. (Yha netanpa Shallum, Tikvah üha hüyange Harhas ühuwa khümjing nyemo tepu yakjongpa ne ngoh.) Hanghe ngai tüopa jeng iman-e yhate i;

¹⁵Hüyange yhawe imante i, ahngpa tangte leih yetüoh hüyange

¹⁶Youngwanpa mepu tüolan ngaolan Ite phatam tüoh; “Leihuyah, Taowe Jerusalem tangte hüyange tüome ngohpu kahtalan tangte, hüke Judah ahngpawe iyeleipu laitep me ngohpu ngao khongkümpu, wengtuh ümeng peine tamlak.

¹⁷Hangjingne iman-e Tao winne tüoh, hüyange iman yakke lingpu toishaolan khongküm puwe iman-e Tao mongshih ngai tamlak jingne ülao kahwanglante üpe meipu jak teki. Ümongshihpu Jerusalem phei tüi-e ongteki, hüyange hatüowa meiye yemahlak.

¹⁸Hüpoi Judah ahngpa, aohiye numan Youngwanpa mepu tonglak jingne shon, hüke numan-e Ite ilakyang; Hüke Youngwanpa Israel Kahwange inang, nange jaipu ngaolan jeng

¹⁹nang mongjang me lahnyik mongkopu ngohtepuwe hüyange nang nying nyingke Youngwanpa sheshao me innenyaipu jingne aope Taowe Jerusalem phei tüi-e hüyange tüopa me ngohpu kahtalan phei tüi-e, hüke iman wanwüng jengme hüyange phoiwümpu ja she nange jai, nang inkhek hit hüyange ü-sheshao me shap; Taowe-o nangte jaiteki she Youngwanpawe inang.

²⁰Tüokhei, leihuyah, Taowe nang puyimlan tangte nang woipeilak hüyange nang mongme toloimei me peine tamlak; yejema-a Taowe Jerusalem tangme hanghepa wengtuh yah peilakeih hatüo nang mükke ngene yetamlak.” Kahtalan-e ahngpa Josiah tangte tüopa ngaolan yah ye.