Read Konyak Naga 2 AHNGPALAN 23 Bible Online

2 AHNGPALAN 23 - Konyak Naga bible

2 AHNGPALAN 23

¹Ahngpa Josiahwe shonne tei, hüyange Judah hei Jerusalem me ngohpu lwngmei khongküm, I shongte jem ne tam.

²Hüyange Youngwanpa khümjing te ahngpa ong, hüyange Judah kahta khongküm hüyange Iphei Jerusalem me ngohpu khongküm hüyange ngengpalan, hipalan, hüyange kahta lili, üjoi üyong khongkümpu hüyange iman nasa me jaine tam-e jiengjeppu laitep hanghepa khümjing me tüo, tüolan ngao khongkümpu Iye iye hüo.

³Ahngpa ngeng-ahng nyoi me yong, hüyange Youngwanpa sheshao me jiengjeppu ja yah: Youngwanpa pheite kemlak hüyange Iye ngaowe tampulan jonlak hüyange I ngaokhümlan, hüyange Iye nyanpu ngaokhümlan, I mongjang üsheiye, I yaha üsheiye tüopa laitep me nyan-e ngohpu tüopa jiengjeppu ngaolan linglak she jieng. Hüyange kahta khongkümpuwe jiengjeppu ngao anglak jingne jiengpu yah.

⁴Hüwante ütahpa ngengpa Hilkiah, I phei mepupa ngengpalan, hüyange khümjing taten yompalante khümjing mepu Baal jingne, Asherah kahwanglan jingne, hüyange wangdang shanhalan jingne lingpu wan hei sheng khongküm yah yüolak jingne ahngpawe ngao pha. Tüophei me Kidron kahjee Jerusalem pephang me ahngpawe tüolan-a vün me jak hüyange tüolan vünla Bethel te yahtei.

⁵Hüyange kahyak te khümpu ngengpalan, aoyin Judah ahngpalan-e Judah chingnyulan ülao kahwanglan, hüyange Jerusalem neikonpu me üpe ümei peetamlak jaklak jingne le, hüyange üne-o Baal te, wanghete, linnyute, shanhalante, hüyange wangdang pümlan khongkümpu te üpe peetamlak jakpalan Iye lakne tam.

⁶Iye khümjing mepu, Jerusalem kaiye Kidron kahjee yete Asherah kahyak paiye tei hüyange hatüo Kidron kahjee me jakke tam, hüyange hatüo vünla ne menge paikhoih hüyange hatüo vünla bangnyuha mangjong yo me shaitam.

⁷Iye khümjing nok me khümjing me üshoyüonyulan nyoipu tüp menge win. (Asherah te yoppe khümne iwante yahpu nyemo takpu shekolan tüopa nyoi me ngoh yangki.)

⁸Iye Judah chingnyulan mepu ngengpalan khongküm Jerusalemte woijem, hüyange ngengpalan-e üpe peetamlak jingne jakpu nyoi ülao kahwanglan nyoijing Geba mepu Beersheba ngoiye nuwe tam; Iye üne-o chingnyu governor Joshuawe lingpu peten shongme ngohpu youn laalan jingne jaowe tam-e lingpu wümjong bheiye menge win, hanghepa chingnyute ongwante peten üjengpa yaknya ye me ngoh.

⁹Tüolan ülao kahwanglante khümpu ngengpalan-a Jerusalem me Youngwanpa wümjong me ongne yetam, hüpoi iman-e iman jeiheinao ngengpalan jingne phapu mepu do yenyetpu an hah.

¹⁰Hüyange Hinnom kahjee me, hüke kahta liliye yoi shela yejema-a yhala, Molech kahyak te vün me jakke yedotamlak jingne Iye Topheth nuwetam.

¹¹Hüyange Judah ahngpalan-e wanghe te jaowe tam-e phawe ngohpu koiponglan khümjing te ongpu taten pongme, moiko Nathan Melech nyoipu tüp phei owe hanghepa nokshao longkon me ngoh, tüolan-a Iye yahtei: hüyange wanghe tongtoilan-a Iye vün me jakke win.

¹²Hüyange wümjong hanghepa ahngpa Ahaz tüp ütangpa me ngoh, hanghe Judah ahngpalan-e lingyange ngoh, hüyange khümjing nokshao moini yekao me wümjong hanghepa ahngpa Manassehwe lingyange ngoh hatüo ahngpa Josiahwe mengwin, hüyange tüomepu sheihtei hüyange tüolan tüpla-a Kidron kahjee me shaitam.

¹³Hüyange Jerusalem heong yekao me ülao kahwanglan hanghepa Israel ahngpa Solomon-e Ashtoreth jingne Sidonlan nunushepu toi lingyange ngoh, hüyange Chemosh jingne Moablan nunushepu toishao, hüyange Milcom jingne Ammonlan nunushepu toishao Josiah ahngpawe nutam.

¹⁴Iye jaowetam-e angpu long shongnyulan khoihnyaiye menge win, hüyange Asherah kahyak lange win, hüyange iman angyangpu nyoi me kahta waanne maatam.

¹⁵Üne-o Bethel me ngohpu wümjong, hüyange Nebat üha Jeroboam, aohiye Israel ünu jonne tam, Iye ülao kahwanglan lingyange ngohpu, hüke tüopa wümjong hüyange ülao kahwanglan lingyange ngohpuwa Josiahwe mengwin. Hüyange Iye ülao kahwanglan vün me jak, hüyange tüpla ne menge paikhoih, hüyange Asherah kahyak jakke win.

¹⁶Tüophei me Josiahwe neikon-e lei hüyange kahtang yeme mangkoksa ütam nge; Iye tüolan mepu waan pheakke ngai hüyange wümjong tangme jakke tam. Hükih-e Iye wümjonga nuwetam, hatüowa üshongwante muh mopu hipak ja me ahngpa Jeroboam wümjong phin me yongyange ngohwante hipawe hanghe itte ngao, tüopa lingpu ne ngoh. Ahngpa Josiahwe neikon-e lei hüyange aowe tüopa itpu ngao i, tüopa hipa mangkoksa nge.

¹⁷Iye tonge i, “Hatüowa ao mongkoksa?” Bethel kahtalan-e jan-e i, “Hatüowa hipa mangjong ao Judah mepu pei hüyange nange tüolan wümjong te linge tamlak itpu phapupa hipa jing.”

¹⁸Josiahwe ngaophawe i, “I hüke toloimei ne tamtüoh; aowe-o I waan tahtei.” Tüokhei iman-e Samaria mepu ngaipu hipalan waan phei I waano hüke tüoh.

¹⁹Üne-o Israel chingnyulan me ngohpu ülao kahwanglan te khümpu nyoijing khongkümpu hanghepa Israel ahngpalan-e Youngwanpa mongshih ngai tamlak ne ling, ahngpa Josiahwe mengwin, hüyange tüolante Iye Bethel me lingpu toishaolan kih-e lingtam.

²⁰Hüyange ülao kahwanglan tepu ngengpa khongkümpu aoyin tüome ngoh, Iye wümjong tangme toi hüyange wümjong lili tangme kahta waan jak; tüophei me I Jerusalem te leihye.

²¹Ahngpa Josiahwe kahta lilite ngaophawe i, “Jiengjeppu tüopa laitep me nyanyange ngohpuke Youngwanpa numan Kahwangte lin ne taipu Mo motüoh;

²²Ütingpa me jatlan-tangme Israel ngao phünpu kahpalan hipak mepu, Israel ahngpalan hipak khongkümpu me, yejema-a Judah ahngpa hipak khongkümpu me tüokih-e linne taipu mo aowe-o yejon.

²³(Sha-a ükümpa me) Hüpoi Josiah ahngpa wanglam lampu wangpeng pen me tet shepupa me Youngwanpa te tüopa linne taipu mo Jerusalem me ngoh yangki.”

²⁴Ütahpa ngengpa Hilkiahwe khümjing me tüopu laitep me nyanpu ngaokhüm jonpu oklak jingne, ahngpa Josiahwe Jerusalem me ngohpu hüyange Judah me ngohpu ülam yampulan, hüyange phongyengpalan, hüyange noksa kahyaklan khongküm, moung, hüyange ülao kahwanglan te khümpu toinan khongküm sheih teine tam;

²⁵I shao te yoi mongjang khongkümpuwe, hüyange I yaha khongkümpuwe Mosa ngaokhüm khongkümpu kih-e Youngwanpa tangte lüppe yepu I kihpu ahngpa ao-o yenangpe ngoh, yejema-a I phei me I kihpu ja nehoi yengai.

²⁶Tüoyangpoi Youngwanpawe I mongshih Judah phei tüi-e ngaine tam-e ngohtepuwe I nyamlakpa mongshih üyong ngaipu mepu yelüp, hangjingne Ahngpa Manassehwe hengne tam-e mongshih ngaine tampu kaiye I mongshih ngaine tam.

²⁷Hüyange Youngwanpawe inang, “Taowe Israel yanne tampuke Taowe Judah-o ü-sheshao mepu yanne tamlak, hüyange hanghepa jeng, ü-min tüome ngohlak she i, Taowe lepu chingnyu, hüke Jerusalem, Taowe winne tüolak.”

²⁸Sha-a towe ngohpu Josiah toishaolan, hüyange Iye lingpu khongkümpu, tüolan-a Judah ahngpalan putahpangao laitep me nyanyange yengohpu a?

²⁹Aope Josiah ahngne ngoh, Egypt Ahngpa Necowe Assyria ahngpate jamlak jingne nyahponglan woiyange Euphrates yengyinte pei. Ahngpa Josiahwe Megiddo me Egypt nyahponglan te tienne ngang hüyange tüopa shapju me I toi.

³⁰I shaoshanpalan-e I tongtoi ja me Megiddo mepu mang yahtei, hüyange I Jerusalem te yah ye, hüyange ahngpalan mangjongme I mu. Hüyange Judah kahtalan-e Josiah üha Jehoahaz leyeyah, hüyange Ite minnga phowe tam hüyange Ipa nanleiye ahngne mengtam.

³¹Jehoahaz ahngne menge wangwante I nyupuh wangpang da me lüm lwngmei ne ngoh yangki, hüyange Iye Jerusalem me lekeng lüm ahngne meng. Inyu min Libnah ching mepu Jeremia yhala Hamutal ngoh yangki.

³²Ipuyimlan-e lingpu khongküm kih-e hanghepa Youngwanpa sheshao me ümengne ngoh hatüo Iye ling.

³³I wanglam lampu üküm ngoine tampuwa aope Egypt ahngpa Necowe Hamath kahtok mepu Riblah me I phowe küpnok me ang, hüyange Judah te khüm kilogram haja lüm phei me gho peli hüyange hon kilogram delüm me peli poonne pha ne tam, hüwante ngoiyangki.

³⁴Tüophei me Pharaoh Necowe Josiah üha Eliakim Ipa Josiah nanleiye ahngpane mengetam, hüyange I min Jehoiakim she leiye tam. Hüpoi ahngpa Necowe Jehoahaz Egypt te yahtei, hüyange tüome I liyangki.

³⁵Ahngpa Jehoiakim-e Egypt ahngpa Necowe yupu poon üshao ngoiye phawe oklak jingne kahmük me ngohpu kahta lilite iman me nangpu moth phei shuwe kahngin shai.

³⁶Jehoiakim ahngne menge wangwante I nyupuh wangpeng da me nga lwngmei ne ngoh yangki; hüyange Iye Jerusalem me wangpeng pen me ja ahngne meng. Hüyange Inyu min Rumah ching mepu Pedaiah yhala Zebidah ngoh yangki.

³⁷Hüyange Jehoiakim-e Ipayimlan-e lingpu khongkümpu kih-e hanghepa Youngwanpa sheshao me yemei hatüo ling.