Read Konyak Naga 2 AHNGPALAN 24 Bible Online

2 AHNGPALAN 24 - Konyak Naga bible

2 AHNGPALAN 24

¹Aope Jehoiakim ahngne meng, Babilon Ahngpa Nebuchadnezzarwe Judah chinghah, hüyange wangpeng lüm mongme I wanglam phangme ngohlak jingne Jehoiakim te kang; tüophei me I hokke ngai.

²Youngwanpawe I phei tüi-e Babilonlan, Aramlan, Moablan, hüyange Ammonlan ükhong ükhong shon, hüyange Youngwanpa ngao I shaoshanpalan hüyange hipalan-e ngaopuke, Judah mahtamlak jingne iman shon.

³Youngwanpawe ngaowe tampuke tüopa-a I sheshao mepu yahteilak nanjingne Judah kahtalan tangme hatüo ngai: hatüowa Manasseh ünu jingne, Iye lingpu khongkümpu kih-e,

⁴hüyange üne-o Iye hanghepa ümeng yenangpu iy shai, hangjingne Iye ümeng yenangpu iy shaipuwe Jerusalem maane tam, tüojingne Youngwanpawe ümeng yewin.

⁵Sha-a Jehoiakim towe ngohpu toishaolan, hüyange Iye lingpu khongküm, tüolan-a Judah ahngpalan putahpangao laitep me nyanyange yengoh a?

⁶Tüokhei Jehoiakim yoi pajeiyonglan phei shi; hüyange Iha Jehoiachin I nanleiye ahngne meng.

⁷Egypt ahngpa hüyange I nyahponglan shaaji nishe Egypt mepu ya yeyong, hangjingne Babilon ahngpawe shaaji Egypt jingne ngohpu yikengpong khongkümpu, Euphrates yengyin mepu Egypt apyekao yikeng ngoiye omteiye ngoh.

⁸Jehoiachin Judah tangme ahngne menge wangwante I nyupuh wangpeng pen metet lwngmei ne ngoh yangki: hüyange Iye Jerusalem me lekeng lüm ahngne meng. Hüyange Inyu min Jerusalem mepu Elnathan yhala Nehushta ngoh yangki.

⁹Ipawe lingpu wanglam kih muh, Jehoiachin-e Youngwanpa sheshao me hanghe ünu ling.

¹⁰Iye wanglam lampu hipak me Nebuchadnezzar shaoshanpalan-e woiyange Babilon nyahponglan Jerusalem chinghahlak jingne yayong hüyange tüopa-o om.

¹¹Chinghah wante Nebuchadnezzar I omme Jerusalem te pei,

¹²hüyange ahngpa Jehoiachin, Inyu, Ihalan, I shaoshanpalan, hüyange ahngnok yompalan, Iphei jam-e Babilonlan phang te ong. Nebuchadnezzar Iye wanglam lampu wangpeng tet shepupa me Jehoiachin küpnokte yahtei.

¹³Hüyange khümjing me hüyange ahngnok me ngohpu toinyu nanha khongkümpu Babilonte yahtai. Youngwanpawe ngaoyangpu ke, khümjing me jonnepailak jingne ahngpa Solomon-e lingpu hon tük hei sheng khongkümpu Nebuchadnezzarwe paiye win.

¹⁴Hüyange Nebuchadnezzarwe Jerusalem kahtalan, ahnghalan khongkümpu, woipalan khongkümpu, hüke khongkümpu, sheiye haja pen phowe tei. Iye üne-o hi wongnange toilingpalan khongkümpu, tüome yantep palan-o omme, ha-khah wümnyu hei mok yeokpalan shaha Judah me tüohyange yahtei.

¹⁵Nebuchadnezzarwe Jehoiachin, Inyu, I shekonyulan, ahngnok yompalan, hüyange Judah mepu woipalan khongkümpu Babilon te phowe tei.

¹⁶Hüyange wongnangpu kahtalan khongküm, hüke haja nyit, hüyange yaopa hei yanteplan haja ja, iman khongkümpu wongnange ngohpulan hüyange wehokpu oklaklan, iman-a Nebuchadnezzarwe phowe Babilon te yahtei.

¹⁷Nebuchadnezzarwe Jehoiachin Ipajoi Mattaniah, Judah me ahngne menge tam hüyange I min Zedekiah she jeilei tam.

¹⁸Zedekiah Judah tangme ahngne menge wangwante I nyupuh wangpeng da me ja lwngmei ne ngoh yangki: hüyange Iye Jerusalem me wangpeng pen me ja ahngne meng: hüyange Inyu min Libnah ching mepu Jeremia yhala Hamutal ngoh yangki.

¹⁹Iye Jehoiakim-e lingpu khongkümpu kih-e, hanghepa Youngwanpa sheshao me ümengpa ne ngoh hatüo ling.

²⁰Youngwanpawe Jerusalem hei Judah kahtalante jamloi mongshih ngai, tüokaiye I sheshao mepu iman yahtei.