Read Konyak Naga 2 AHNGPALAN 25 Bible Online

2 AHNGPALAN 25 - Konyak Naga bible

2 AHNGPALAN 25

¹Sha-a Zedekiahwe Babilon ahngpa phei tüi-e yong. Hüyange I ahngne mengpu wangpeng tu shepupa me, lekeng pen shepupa me, Babilon ahngpa Nebuchadnezzar I hüyange I jing nyahpong üngang Jerusalem chinghah pei, hüyange iman-e chingnyu pephang me lakjing ling, hüyange tüopa neikon-e iman-e yomtep ling.

²Hüyange chingnyu-a Zedekiah ahngne mengpu wangpeng pen me ja manngoi manngoi tukh yange ang.

³Lekeng peli shepupa nyih tu shepupa tüopa wangpeng me muh chingnyu me seanyao yenglepu jamloi ngohyangki, tüokhei kahmük me kahtalan jingne hahlak yenangpe ngoh yangki.

⁴Babilonia lan-e chingnyuwa neikon-e ngohya peyoi, chingnyu jantpe-a püppe lüo hüyange ahngpa hüyange nyahponglan khongküm wangnyak me jant nipa hanghepa ahngpa pesha shongme ngoh, peten lamnyu yete lowe tai; hüyange iman Arabah yekaote tai.

⁵Hüpoi Babilon nyahponglan ükhong jawe ahngpa pheite jange phet, hüyange Jerikho kahjee me I kemyüo; hüwante I jing nyahponglan ükhong khongkümpu I shong mepu yanne mahküm.

⁶Hüwante iman-e Zedekiah pho, hüyange Babilon ahngpa Nebuchadnezzar tangte Riblah te woi in, hüyange tüome Nebuchadnezzarwe I tangme ngao phünpu pha.

⁷Zedekiah sheshao me Ihayimlan toine tam; tüophei me Nebuchadnezzarwe Zedekiah mük yokke win, hüyange yankeileiye Ite phün, hüyange I Babilonte yahtei.

⁸Sha-a Babilon ahngpa Nebuchadnezzar wangpeng pen me tu leat nga nyih nyit shepupa me ahngpate yakjongpa hüyange nyahponglan woipa Nebuzaradan Jerusalem te ong.

⁹Iye khümjing, ahngnok, hüyange Jerusalem me ngohpu woipa üyih üyonglan nok khongkümpu jakke win;

¹⁰hüyange I jing nyahponglan-e chingnyu chingtuk penyuwa khüwmeng tam.

¹¹Tüophei me chingnyu me tüohpu towe ngohpu kahtalan, hüyange tüohyange phette taipalan aoyin Babilon ahngpa shao mepu phette tai, hüyange towe ngohpu ükhong khongkümpu woipa Nebuzaradan-e phowe tei.

¹²Hüpoi Iye Judah me jamloi toinanpalan ütam wuwünglick ngütlak hüyange kah hampalan-e menglak jingne tüoh.

¹³Khümjing me ngohpu shakphan yan shongnyulan, hüyange yajenth hüyange shakphan yan yengkook khümjing me ngohpu, Babilon lan-e khoih nyaiye mengtam, hüyange tüolan shakphan yan-a Babilon te yahtei.

¹⁴Hüyange tüklan, hüyange kahhoklak, jeplak, hüyange muktük hüyange iman-e jonpu shakphan yan tük hei sheng khongkümpu iman-e yahtai.

¹⁵Hüyange muktük, hüyange yankhong, hangheyin hon mepu ngoh hatüo hon, hüyange hanghepa khüm mepu ne ngoh hatüo khüm, kih-e muh woipa Nebuzaradanwe yah tai.

¹⁶Shongnyu ni phei, yengkook ja-a, hüyange yajenth hanghepa ahngpa Solomon-e khümjing jingne ling; tüolan tük hei sheng shakphan yan-a tokke leine ye-okpe ngoh yangki.

¹⁷Shongnyu ja-a yakkong penmetet laowe ngoh yangki; hüyange tüopa tangme shakphan yan phei shongju lingyange ngoh yangki; hüyange shongju me yakkong lüm daowe ngoh yangki. Tüopa shongju neikonpu khongkümpu me shakphan yan phei shemeipupa oleng hüyange chamuk lingyange ngoh yangki. Hüyange tüolan muh leye nishepupa shongnyu me-o oleng ümei phei lingpu ne ngoh yangki.

¹⁸Tüo tokte, Nebuzaradan ütahpa woipawe ütahpa ngengpa Seraiah, nishepupa ngengpa Zephania, hüyange khümjing shaoshanpalan kahta ümei naoshe lüm phowe tei.

¹⁹Hüyange chingnyu mepu wehokpu kahtalan tangme woipa ütahpa ne tüohpupa, hüyange ahngpa phei jam-e ngohpu kahta nga aoyin chingnyu me tüoh, hüyange kahmük me wetaipalan ükhong taishenge nyik-e jempu me woipa hüyange yaknyanpa, hüyange chingnyu me ngohpu tüopa kahmük me ngohpu kahta dewok, Iye pho.

²⁰Nebuzaradan-e iman-a Babilon ahngpa ao Hamath yikengpong mepu Riblah chingnyu me ngoh I tangte yahtei.

²¹Tüome ahngpawe iman yahyange shütte tam hüyange li ne tam. Tüokhei Judah kahtalan iman kahtok mepu yahtei hüyange phowe teiyangki.

²²Babilon ahngpa Nebuchadnezzarwe, aoyin kahta Babilon te phowe yeteipe towe tüoh tüolan kahta tangme Judah governor ne Ahikam üha hüyange Shaphan ühu Gedaliah mengetam.

²³Sha-a Judah mepu woipalan hei wetaipalan aoyin Babilon phangte manong, iman-e Babilon ahngpawe Gedaliah governor ne mengtamteki she jaiwante, iman Mizpah me Gedaliah tangte, hüke Nethaniah üha Ishmael, Kareah üha Johanan, Netophah ching mepu Tanhumeth üha Seraiah, hüyange Maacah ching mepu Jaazaniah iman woipalan hüyange iman kahtalan pei.

²⁴Gedaliahwe imante i, “Taowe numan phei jiengjeppu ngao inang, Babilonlan woipalante nyamlak hango yenang. Tüopa kahmük me nyoitüoh, Babilon ahngpa shaoshan tüoh, hüyange numan jingne sheminlam phe meiye tailak.”

²⁵Hüpoi tüopa wangpeng lekeng nyit shepupa me, Ishmael, Nethaniah üha hüyange Elishama ühu, ahngnok phong mepu kahta pen yahyange Mizpahte ong, hüyange Gedaliah te shüm hüyange I toi, Iye üne-o Israellan hüyange Babilon lan aoyin tüome I phei ngoh, tüolan-o toi.

²⁶Hüwante Israellan khongkümpu, üjoi üyong lanshe, hüyange nyahponglan tangme woipalan moilan yayong, hüyange Egypt te tai; hangjingne iman Babilon lante nyam.

²⁷Hüyange Judah ahngpa Jehoiachin phowe teipu wangpeng delüm me nyit shepupa, lekeng pen me ni shepupa nyih da me nyit shepupa me, Babilon ahngpa Evil-Merodachwe I ahng ne mengpu üwangpa wangpeng me, Judah ahngpa Jehoiachin küpnok mepu laantam.

²⁸Evil-Merodachwe Ite yayeng phei jon, hüyange I phei jam-e Babilonte phowe teiye angpu ahngpalan üshei yo me Ite sheyong she namnowe pao.

²⁹Tüokhei Jehoiachin, Iye yah ngohpu küpnok nyemo khokke angne tamyange, hüyange I nyihjeih ahngpa khao me yelakpe hah ngoh yangki.

³⁰Nyih jeih she, I üyin me ngohpu nyih hipak khongkümpu me, Ite yelakpe I wongpongte jonlak jingne ngintam pha.