Read Konyak Naga 2 AHNGPALAN 3 Bible Online

2 AHNGPALAN 3 - Konyak Naga bible

2 AHNGPALAN 3

¹Judah ahngpa Jehoshaphat wangpeng pen metet shepupa wanglam lamwante, Samaria me Israel tangme Ahab üha Jehoram ahngne menge wang, hüyange wangpeng pen me ni ahngne meng.

²Youngwanpa sheshao me hanghe ümeng hatüo Iye ling; hüpoi Ipa hüyange Inyu Jezebel mengpu shinnepa-a yemeng; hangjingne Ipawe lingyange angpu Baal üjao shongnyu Iye yahwin.

³Tüoyangpoi Iye Nebat üha Jeroboam ünute kenyange ngoh, hanghe kaiye Iye Israel te ünu omne tam; tüopa mepu I yeyan.

⁴Sha-a Moab Ahngpa Mesha, nyeetampa ja ne ngohyangki, hüyange wangpeng lep iye Iye Israel ahngpate nyee üha lakhja hüyange nyee üpong lakh ja mepu ümin (mat) poon phapu ngoh.

⁵Hüpoi aope Israel ahngpa Ahab li, Moab ahngpa Meshawe Israel phei tüi-e yong.

⁶Hüwante muh Ahngpa Jehoram Samaria tüohyange yayong hüyange yoijing ngangpalan ükhong jemne tam.

⁷Hüyange Iye Judah ahngpa Jehoshaphat tangte ngaolan shonne i, “Moab ahngpawe ü-phei tüi-e yongteki; nang ü-phei Moab phei hoklak jingne shapjute taine ü-phei om ningya?” Ahngpa Jehoshaphat-e jan-e i, “Tao tailak.” “Nang hanghe tao-o hatüo hei ngoh nang; ü-kahta nang kahtalan kih-e, ü-koiponglan-a nang jing kih-e ngohnang.

⁸Chinghahlak jingne toman hanghepa lam me tailak?” Jehoram me jan-e i, “Edom phaonyu jong kaiye shelaopupa lamnyute tailak.”

⁹Tüokhei Israel ahngpa, Judah ahngpa, hüyange Edom ahngpa yayong; hüyange iman-e nyih nyit mongme neikonne kem; hüwante wetaipalan jingne hüyange iman pheite woipu yinmoklan jingne yeng yenangpe ngai;

¹⁰Hüwante Israel ahngpa Jehoram me ngao ngaiye i, “Onyukei! Hangjingne Youngwanpawe tüolan ahngpalan lüm-a Moab ahngpa yak me phalak jingne jamshe nyikteki!”

¹¹Hüpoi ahngpa Jehoshaphat-e tong, “Youngwanpa hipa ja, teman-e I kaiye Youngwanpate tonglak jingne yenanglak a?” Hüwante Israel ahngpa Jehoram shaoshanpa jawe jan hüyange hüke i, “Shaphat üha Elisha, aowe Elijah yakte yeng shok-e tam, I tüome ngohnang.”

¹²Ahngpa Jehoshaphat-e jan, “I-a ütingpa hipa ngohnang.” Tüokhei Ahngpalan iman lüm Elisha tangte tai.

¹³Elishawe Israel ahngpate i, “Taowe nangte hangne jam ne?” Nange nangnyu hei nangpa lan-e tonghümpu hipalan tangte taitüoh, hüyange tongyah. Hüpoi Israel ahngpa Jehoram jan-e i, “Yeje!” “Hangjingne toman ahngpalan lüm Moab ahngpa yak me phatamlak jingne Youngwanpawe nyik yangki.”

¹⁴Hüyange Elishawe jan-e i, “Ütingme ngangpupa Youngwanpa ao sheshao me tao yongnang üyin ngohtepuwe, Judah ahngpa Jehoshaphat jing üne taowe yeteihtüo shihma-a, taowe nang yekaote yeleihah shepu, yejema-a nang ye nge hah shepu.

¹⁵Hüpoi sha-a, ü-tangte hem lokpa ja woi peikei.” Hüyange aope hemlokpawe kongki wüng, Youngwanpa üngan Elisha tangte pei;

¹⁶hüyange Iye i; “Hüke Youngwanpa inang, ‘Tüopa kahwantok kahkooksa maatam tüoh.’

¹⁷Hangjingne hüke Youngwanpawe inang, ‘Numan-e wangyang yejema-a waikeipu ye-ngelak; tüoyangpoi tüopa kahjee-a yeng-e maa ngohlak; hüyange numan, numan jing mahu ükhong, hüyange numan yinmoklan-e yinglak.’

¹⁸Youngwanpa sheshao me-a hatüowa toi üjoiha ja hei ngohnang; Iye üne-o Moablan numan yak me phünne phalak.

¹⁹Numan-e meipe latyangpu chingnyulan, hüyange leyangpu chingnyu lili ching hahlak, hüyange pelick pee khongkümpu akke winlak, hüyange yengpeiwo khongkümpu lakne tamlak, hüyange kahyao ngohpu kah khongkümpu long phonge tamyange meng tamlak.”

²⁰Üne nap toidopu phapu hipak phei shuwe leihuyah, Edom yekao mepu yeng yünne ngai, hüyange kahtok maa.

²¹Aope Moablan-e iman phei hoklak jingne ahngpalan lüm peiteki she jai, ngou yang jon-e okpu üjoipa mepu üyongpa te ngoiye nyik-e jem, hüyange jayekao yikeng me yong.

²²Aope iman shomme shonge lüo, hüyange wanghe yasha yeng tang me hüt, hüyange Moablan-e iman sheshao me yeng-a iy kih-e tak-e nge.

²³Hüyange iman-e i, “Hatüowa iy yang!” “Ütingme wetaipalan ükhong lüm-a iman iman teihok yangpu yang! Tüokhei sha-a taihah, hüyange iman lakjing shüm-e yah hah!”

²⁴Hüpoi aope iman Israel lakjingte pei, Israellan yayong hüyange Moablan phei hok, tüokhei Israel shaote nyam-e phette yan; hüyange shaote Israellan phette ong;

²⁵hüyange iman chingnyu menge tam. Hüyange Israellan-e kahyao ngohpu nyoi linne taiwante iman kahta lili-e yoi yoi-e longe shüp, hüyange hatüo maatam; hüyange iman-e yengpeiwo khongkümpu lakne tam, hüyange pelick pee ümei khongkümpu akke win; üküm ne Kir-heres chingnyu shaha to; hüyange shümpalan-e neikon hüyange tüopate shüm.

²⁶Aope Moab ahngpawe I jingne shapju-a jamloi yemeipe nge, yanglow pheipu wong nangpu kahta gho nyit phei, Edom ahngpa tangte lüowe ngailak jingne ngang; hüpoi I taipu ye-ok.

²⁷Tüokhei I nanleiye ahngne mengne ngohpu Iha jeiyongpa Iye yah hüyange chingtuk penyu tangme Moab kahwang te toidopu pha. Hüwante Israellan me mongshih ngaipu üyong pei; hüyange iman-e I mepu yanne tai, hüyange iman yoi yoi kahtokte leihye.