Read Konyak Naga 2 AHNGPALAN 4 Bible Online

2 AHNGPALAN 4 - Konyak Naga bible

2 AHNGPALAN 4

¹Sha-a hipalan yo me shejawe tüohyangpu wamnyu ja Elisha tangte pei hüyange i, “Ü-netanpa liteki! Hüyange nang shaoshanpa ü-netanpa Youngwanpate nyam-e leye ngoh she nange shingnang; hüpoi sha-a ngin seaye phapawe ü-netanpawe yeshümtüohpe angpu phei sea jingne ü-ha ni rha ne yahning she peinang.”

²Elishawe yhate i, “Nang jingne taowe hanghe lingtamlak?” “Üte itehu, nenok me hanghe ngoh nangki?” Yhawe jan i, “Olive minnga sheng üjinghapu ja tokte kaiye nang shaoshannyu nok me hango yenang.”

³Hüwante Elishawe yha te i, “Taitüoh, yupilan üshei mepu yengtük ükeng nange okpu shinne seaye jemtüoh.

⁴Tüophei me nang hüyange nangha ni noksate ongtüoh, taküpyah, hüyange yengtüklan me minnga shokne wangtüoh, hüyange aope maalakei, nange yanne angtüoh.”

⁵Tüokhei I shongmepu yha tai, hüyange yha hüyange ha ni taküp küp, iman-e yengtüklan yha shongte yahpei; hüyange yhawe olive minnga shok.

⁶Aope yengtüklan-a maawe küm, yhawe Iha te tong, “Üne-o ü-tangte yengtük ja yahkei; hüyange Iye yhate i, shaaji yengtük yenang.” Hüwante minnga yupu lak.

⁷Hüwante Elisha hipa tangte yha leihye hüyange ngaowe tam. Hüyange Iye i, “Yetüoh, olive minnga yüotüoh, hüyange nang pheeisea lantüoh; hüyange towe ngohpulan me nang hüyange nanghalan üyin ngohpu oklak.”

⁸Nyih japu hipak me Elisha-a Shunem ching ümeken me haknyu ja ngoh, tüoken te Elisha pei; hüyange yhawe Elisha te nük hahne nyik; hüyange tüonyih me peiye aope Shunem te I peilakeih, tüopa shekonyu nok me hipak phe me hahyingpu ngoh yangki.

⁹Yhawe yoi netanpa te i, “Sha-a leihuyah, teman shongme yelakpe onge peipu hatüowa Kahwang Üjao kahta ja she taowe nge oknangki.

¹⁰Tüokhei teman-e nok tok me tüp üjinghapu ja jant shongyange wehah; hüyange tüome I jingne shinleng ja, khao ja, shotjing ja, hüyange vüntük ja anghah; hüyange hangke tingme I teman tangte peilakeih, I tüome ngohlak.”

¹¹Nyih ja Elisha Shunemte leih ye, hüyange tüopa tüp te ong, hüyange I tüome toloimei-e ngoh.

¹²Iye yoi shaoshanpa Gehazi te i, “Taiye tüopa Shunem sheko te nyiktüoh.” Hüyange aope Iye yhate nyik, I sheshao me yha pei yong.

¹³Hüyange Iye Gehazi te i, “Sha-a yha te itüoh, leihyah, nange toman jingne namnowe tüopa shanghah shaoshi khongkümpu yahteki. Nang jingne ahngpate yejema-a nyahpong woipate ngaowe tamhu nangkü a?” Yhawe jan, “Tao toman kahta phei ngohnang.”

¹⁴Elishawe Gehazi te tong, “Hüma-a yha jingne taowe hanghe linglak?” Iye jan “Üting me yha netan naha yenang, hüyange yha netanpa-a wuteiye ngoh nang.”

¹⁵Elishawe ngao phawe i, “Yha te tüome peikei she itüoh.” Yha peingoi hüyange tafün shong me yong;

¹⁶Elishawe yhate i, “Ngaiwang hakih ting me nang yak me netan nahaja paiyange ngohlak.” Yhawe jan i, “Oh! Ü-nokpu, nang Kahwang kahta, nang shaoshannyute tahleih tah i!”

¹⁷Hüpoi, shekonyu püm yekengpe ngai, hüyange Elishawe yhate ngaowe tampuke; ünepu wangpeng hakihting me yhawe netan ha ja puh.

¹⁸Aope naha kahta ne meng, nyih ja Ipa phei tah yahpalan tangte tai.

¹⁹Mokhshe Iye Ipate üngwün, “Ü-shang khüw teki! Ü-shang khüw teki!” Hüyange Ipawe Inok shaoshan pate i, “Inyu tangte I yah teitüoh.”

²⁰Aope shaoshanpawe paiyange I nyu tangte yahpei, tüopa naha heeitam hahpu ngoiye Inyu yungkeng tangme ngoh, hüyange li.

²¹Yhawe Kahwang kahta Elisha tüpte paiye in, hüyange I shinleng me tüohyange yha tokphei me ta küppe tüoh yange tai.

²²Hüyange yhawe yoi netanpa te nyik hüyange i, “Kahwang kahta tangte tao tai shih ning, hüyange mamshe leih yeküning, shaoshanpalan yo me sheja, hüyange gado ja she üte shonpha.”

²³Hüyange netanpawe tong, “Hangne nang tenyih I tangte tailak?” “Hatüowa lela mo ne-o yeje, yejema-a Sabbath ne-o yeje.” Yhawe jan, “Hango üje.”

²⁴Tüophei me yha gado ja me shot, hüyange yhawe shaoshanpate i, “Mam mamshe woitüoh, taowe nangte man i man i monglaowe kemne tah tam.”

²⁵Tüokhei yha yayong, hüyange Kahwang kahta ngohpu Carmel kahtangte ngoi. Hüyange aope Kahwang kahtawe yha üjai memuh nge, Iye yoi shaoshanpa Gehazite i, “Leihuyah, otüo yeme Shunemlan sheko peiküki!”

²⁶Yha tangte pongte phet tüoh, hüyange yha te itüoh, “Nang meiye ngoh nangpu ümuh ma? Nenok netanpa mei ngohnangpu ümuh ma? Hüyange naha meiye ngohnangpu ümuh ma?” Hüyange yhawe jan, “Moilan meiye ngohnangki.”

²⁷Hüpoi, aope yha kahtangte Kahwang kahta shongte pei ngoi, yha I shongme lamme ta, I ya me tük. Hüwante Gehaziwe yha shunge winlak jingne owe wen, hüpoi Kahwang kahtawe i, “Yha shaha tüotüoh: hangjingne yha khah mongshangpu ngohnang! Hüyange Youngwanpawe hatüo ü-mepu lowe angnang, hüyange üte ye i.”

²⁸Hüwante shekonyuwe Ite i, “Üyongpa, taowe nangte netan naha ja yu a? Üte lowe tahtam she taowe nangte ye i a?”

²⁹Elisha lüppe ye hüyange Gehazite i, “Shienghit nye hit yah, hüyange nang yak me ü-wongjoi jonyah, hüyange taitüoh. Nange kahta ütam hüoma-a Ite salam phalak jingne tahlak; hüyange ütam-e nangte salam phama-a, Ite salam phalak jingne hipak tahwin. Tingkhak-e nok ngoine taitüoh, hüyange naha tangme ü-wongjoi angtam tüoh.”

³⁰Hüwante shekonyuwe Elisha te i, “Youngwanpa üyin me ngohtepuwe, hüyange nang yaha üyin me ngohtepuwe taowe nang yetüohlak!” Tüokhei imni moini jamme yayong.

³¹Gehazi iman shaote tai, hüyange naha tangme Elisha wongjoi angetam, hüpoi hang ngao ngaipu-o yenang, yejema-a üyin ne menge yepu hango yenang. Tüokhei Elisha phei hüolak jingne leihye hüyange i, “Naha-a yelaopu yang.”

³²Aope Elisha peingoi, I shaha tüp te ong hüyange naha liteiye shinleng me lamyange nge.

³³Iye imni te taküp küp hüyange Youngwanpate yop.

³⁴Tüophei me naha tangme I onge lam, hüyange nahapa ju phei I ju hüo, hüyange I yak tang me I yak ang. Hüke I naha tangme lamwante, naha püm sheamme wang.

³⁵Elisha lao hüyange tüpsa me tai tai ye ye she kem; hüyange leihye hüyange üne-o naha tangme I nying nyingke lam. Hüwante tüopa naha nyit me hahshui, tüophei me I mük ep.

³⁶Elishawe Gehazi nyik, hüyange i, “Naha ünyu te nyiktüoh.” Tüokhei Iye yhate nyik, hüyange aope yha I tangte ong, Iye yhate i, “Nangha yahtüoh.”

³⁷Hüwante yha ümongte ong, hüyange I ya shongme lamme ta, hüyange kahtokte sheta khuhta khüm; tüophei me yhawe yoi ha yahpai hüyange yayonge tai.

³⁸Hipak ja me, aope kahmük nopu me seanyao yengle ngoh, hüwante Gilgalte Elisha leihye. Aope Iye hipalan ükhong ja te konnyüowe ngohyapeih, I shaoshanpa ja te hüke i, “Vün me tüknyu ja jantüoh hüyange iman jingne hoiyeng sheamtüoh.”

³⁹Hüyange iman yo me sheja hoilai yamlak jingne phaote tai, hüyange Iye awkha ümtoon tüo, üne-o maikook tüowe üngang yah ye. Iye tüolan khongkümpu ja ne khonyange tüolan-a hanghene lingnang hango yeshingpe hoitükte hüng.

⁴⁰Hüyange kahtalan-e hahlak jingne phaohoi phaolai-a pheih ngai, hüpoi iman-e jüppe nyüopu phei jamshe üngwün “O Kahwang kahta, hoitükma-a lilak ngoh nangki!” Iman-e tüopa yehah ok.

⁴¹Hüwante Elishawe i, “Hüma-a ankhioh ütam yahkhu.” Hüyange hatüo Iye hoitükte shüppe tam, hüyange i, “Iman-e hahlak jingne kahtalan te hoi pheih tüoh.” Hüyange hoitük me hang ümengo yenangpe ngoh.

⁴²Ülao hipak ja me, Baal Shalishah mepu kahta ja pei, hüyange Kahwang kahta te üwangpa pelick, barley tah an ünok da, hüyange wongli khaipu phei jamshe I nyekhok me yahpei. Elisha-e I shaoshanpate i, “Hipalante tüopa uhtam tüoh.”

⁴³Hüpoi I shaoshanpawe i, “Hatüowe kahta gho ja te wanglak she nange teih nangkü a?” Hüpoi Elishawe jan-e i, “Kahtalante iman-e hahlak jingne phatüoh; hangjingne hüke Youngwanpawe inang, ‘Iman-e hahlak, hüyange ütam üne-o tolak.’ ”

⁴⁴Tüokhei shaoshanpawe iman sheshao me angtam, hüyange iman moilan-e hatüo hah, hüyange Youngwanpa ngao kih-e ütam towe ngohyangki.