Read Konyak Naga 2 AHNGPALAN 6 Bible Online

2 AHNGPALAN 6 - Konyak Naga bible

2 AHNGPALAN 6

¹Nyih japu hipak me hipalan ükhong jawe Elishate i; “Sha-a leihuyah, nang phangme ngohpu toman ngohpu nyoi, toman jingne jamloi shoiteki!

²Toman Jordan te lailak jingne o-ngao yahkei, hüyange tüomepu kahta liliye peshüm japong yahhah, hüyange toman ngoh oklakne toman jingne nyoijing ja weküning.” Hüyange Elishawe jan, “Taitüoh!”

³Iman yo me shejawe, iman phei jam-e tailak jingne Ite-o kangetong. Iye mong;

⁴hüyange iman jam-e tai. Aope iman Jordan ngoiyapeih, pee akne ükong wang.

⁵Hüke naoshe jawe pee akwante, wa yu hüyange yengmongte onge mah. Hüwante Iye Elishate üngwün, “Üyongpa, taowe hang ihah shi?” “Hangjingne, hatüowa mih mepu sea yuwe taipu wa ngohnang!”

⁶Hüyange Elishawe tong, “Ümeken me yeipu?” Hüyange kahtapawe yeipu nyoi Ite hüo. Hüwante Elishawe hansho ja lange yah hüyange yengte shüp, hüyange wa yeng me phonge ngaine tam.

⁷Iye ngaophawe i, “Hatüo yahtüoh.” Tüokhei I khuhta hüyange tüopa toonne yah.

⁸Aram ahngpa Israel phei wehokpu ngoh yangki. Iye yoi shaoshanpalan phei teingaoyange hüke i, “Taowe ü-lakjinga tüoken me hüyange hükih-e ngohlak.”

⁹Hüpoi Elishawe Israel ahngpa tangte shon hüyange i, “Nang tüopa nyoi shongte owe tah wen; hangjingne tüoken me Aramlan doyulak jingne tanne ngohnang.”

¹⁰Tüokhei tüopa nyoi me ngohpalante Israel ahngpawe deingao pha, hüyange iman yomyange ngoh. Hükih-e hipak lep iye ngaiyangki.

¹¹Hüyange Aram ahngpa tüopa toishao jeng me yeonge mong toloi yemei ok; Iye yoi shaoshanpalan nyik hüyange imante tong, “Numan yo me aohipa Israel ahngpa yekao me ngoh nangki?”

¹²Iman yo me shejawe jan-e i, “Sheja-o yenang, ü-nokpu O Ahngpa. Hüpoi Israel me ngohpu hipa Elishawe, nang shinleng tüp me ngaopu ngaolan Israel ahngpate inang.”

¹³Ahngpawe ngaophawe i, “I ümeken me ngohlakei yamtüoh.” “Hüyange taowe I pholak.” Elisha-a Dothan me ngoh nangki she aope Ite ngaowe tam,

¹⁴Iye koipong hüyange tongtoilan phei wetaipalan ükhong üngang tüoyete shon. Wangnyak me iman-e chingnyu te ngoi hüyange tüopa neikon.

¹⁵Ünenap Elisha shaoshanpa shonge shinlüo, hüyange nok mepu tai, hüyange Aram wetaipalan üngang iman koipong hüyange tongtoilan phei chingnyuwa neikonyange nge. Elisha tangte leih ye hüyange üngwün, “Üyongpa, teman mahlak yang! Teman-e hangke ihah!”

¹⁶Elishawe jan-e i, “Tahnyam! Hangjingne aoyin teman phei ngohnang, iman-a, iman phei ngohpalan phei shenyei she ngohnang.”

¹⁷Hüyange Elishawe yop, hüyange i, “Youngwanpa taowe nangte yoppetong nang, Iye ngelak ne I mük eppetam shih!” Hüyange Youngwanpawe Elisha shaoshanpa mük eppetam; hüyange Iye nge; hüyange leihuyah, “Elisha neikonne koipong hüyange vün tongtoiye kahtang maayange ngoh.”

¹⁸Aope Aramlan I tangte shümme pei, Elishawe Youngwanpate yop, hüyange i, “Taowe nangte yoppe tongnang, tüolan kahta mük pomne tamtüoh!” Hüyange Elisha yoppu kih-e Iye iman mük pomne tam.

¹⁹Tüophei me Elisha iman tangte wen, hüyange i, “Numan lam piennang, tüopa-a lamne yeje yejema-a tüopa-a numan-e yampu chingnyu ne yeje, ü-phei te woiyah, hüyange numan-e yampu kahta tangte taowe numan woipei phaning.” Hüyange Iye iman Samariate woi tai.

²⁰Aope iman Samaria chingnyute pei, Elishawe yop; “O Youngwanpa, tüolan kahtawe nge oklak ne nange tüolan mük eppe tamtüoh.” Hüyange Youngwanpawe iman mük eppe tam, hüyange iman-e nge; hüyange leihuyah, iman Samaria chingnyu ümong me ngohyangki.

²¹Aope Israel ahngpawe iman nge, Iye Elisha te tonge i, “Üyongpa, taowe iman toi küning yao? Taowe iman khongküm toikü ning yao?”

²²Iye jan, “Nange iman yetoilak yang; nang yanglow hüyange lah phei aoyin nange yepho iman nange toilak a? Iman hahying yange iman ahngpa tangte yelak jingne iman sheshao me hahying, hüyange yeng angtam tüoh.”

²³Tüokhei iman jingne Israel ahngpawe mo üyong tüm, hüyange iman-e hahying yange Iye iman Aram ahngpa tangte leihye ne tam, hüyange iman yoi nokpu tangte pei. Hüyange tüonyih me peiye shaaji Aramlan ükhonge Israel we te taipu mepu lakyangki.

²⁴Hipak üten ja ngohyang phei me Aram ahngpa Benhadad-e yoi wetaipalan ükhong khongkümpu nyik-e jem hüyange onge Samaria shümme yah.

²⁵Hüke shümpu kaiye Samaria me seanyao yenglepu üyong ngoh yangki: hüyange gado shang jate khüm ükhüw detet te hüyange gram gho ni ngoipu hoi ütoi ja te khüm ükhüw nga te manyüo manyüo iman-e yelakpe shümyange ngoh yangki.

²⁶Israel ahngpa chingnyu jant pee shüpnei-e kemme taiwante, Ite sheko jawe üngwünne i, “Üte jampha, ü-nokpu O Ahngpa!”

²⁷Iye jan-e i, “Youngwanpawe nangte yejampu ne mengma-a taowe nangte hanghe jampu oklak? Üme wheat tah yejema-a wuwüngti ngohyange yejampu a?”

²⁸Hüyange ahngpawe yhate tong, “Hanghe ye nang shaoshi pu shi?” Yhawe jan, “Hongnyih hatüo shekowe üte i, ‘Tenyih teman-e hahlak ne nangha yahkei, hüyange ngainyih-a tenok nao hah hah!’

²⁹Tüokhei toman-e ü-ha toi, hüyange toman-e I hah; hüyange üne nyih taowe yhate i, ‘Teman-e I toiyange hahlak ne nangha ngaikei’; hüpoi yhawe Iha lowe jüowe tüoh!”

³⁰Aope tüopa jai, yashanne mongshih ngaipu phei ahngpawe yoi inkhek hit; hüyange kahtalan aoyin chingnyu jantpe shongme ngoh, tüolan-e I inkhek mongme monnye yah yange nge.

³¹Iye üngwün, “Tüopa nyih linne mantaipe Elisha shang yelangma-a, Kahwange üte shütyange li netampha.”

³²Hüyange Iye Elisha yamlak jingne ngaolan kipalan shon. Tüopa hipak me Elisha Inok me Iphei hüo ne peipu lwngmeilan phei shotyange ngaowe ngoh. Ahngpawe shonpu ngaolan kipalan manngoipe, Iye lwngmeilante hüke i, “Kahta toipawe tao toilak jingne ütam shonnang! Sha-a, aope I tüopa nyoi ngoilakei, taküp küptam tüoh hüyange I noksa te ongne tahtam. Ahngpa-o yoi nying nyingke I tokphei me ngohkülak.”

³³Hüke Iye iman phei ngaowe ngohwante, leihuyah Ahngpa I tangte pei ngoi. Hüyange Iye i, “Leihuyah, hatüo ümengpa-a Youngwanpa mepu ngohnang! Hangne taowe üne-o Youngwanpawe ülam ja minling pha she tanne ngohlak?”