Read Konyak Naga 2 AHNGPALAN 7 Bible Online

2 AHNGPALAN 7 - Konyak Naga bible

2 AHNGPALAN 7

¹Hüpoi Elishawe jan, “Youngwanpawe hanghe ngao i jaiyah! Ngainyih hakihting me pheng an kilogram lüm hüyange barley an kilogram wok khüm ükhüw ja te Samaria me numan-e shakpu oklak.”

²Hüwante woipa aohi me ahngpawe mongnyenge ngoh nang, Iye Elishate jan-e i, “Leihuyah, Youngwanpawe wangdang tawolan eppe tamyapeyoi hatüo oklak a?” Hüwante Elishawe jan, “Hatüo ngaipu nang mükke ngelak hüpoi nange tüolan hahying ja nehoi hahpu ye-ngelak.”

³Sha-a peten te ongpu lam me ngondak pheipu kahta peli ngoh yangki; hüyange iman-e shejawe shejate teingao i. “Hangne teman manli manli she tüome shotte ngohlak shi?

⁴‘Chingnyute teman-a onghah’ she ima-a, tüome chingnyu me-o seanyao yengle ngohnang, hüyange teman-o tüome omme lipha lak; hüpoi üne-o teman tüome hei shotte ngoh hah she iyapoi teman-a lilak. Tüokhei, kei, teman-a Aramlan lakjingte peihah; yemeipe linglak ne-a iman-e teman toi phalak hei ngohnang; tüoyangpoi aowe shing, iman-e teman üyin yintam phalak!”

⁵Tüokhei Aramlan lakjing te tailak jingne iman wangnyakpu phei jam-e yayong; hüyange aope iman Aramlan lakjing üjengpong ngoiye pei, leihuyah, tüome kahta ao-o yenangpe ngoh yangki.

⁶Hangjingne Youngwanpawe Aramlan nyahpong ükhong te tongtoi ngaowüng, hüyange wetaipalan koipong ngaowüng, hüke nyahponglan ükhong üngang ngaowüng imante jai ne tam; hüyange iman-e shejawe sheja te i, “Jaihuyah, Israel ahngpawe teman phei hoklak jingne Hit ahngpalan hüyange Egypt ahnglan teman tangte peilak jingne nyiktepu yang.”

⁷Tüokhei iman lüongai hüyange wangngai ju me yanmah; hüyange iman nyenok, hüyange koiponglan, hüyange gado, hüke iman lakjing hangke ngoh hüke tüohyange iman üyin yinlak jingne yanne taiküm.

⁸Aope tüolan ngonpalan naoshe peli lakjing shongte owe pei, iman nyenok jate ong, hüyange tüome hanghe ngoh hahying, hüyange tüomepu khüm, hon hüyange nyemo yah, hüyange taiye hatüo lowe ang; tüophei me iman leihye, hüyange nyenok ülao ja te ong, hüyange tüomepu-o yah, hüyange taiye hatüo lowe ang.

⁹Hüwante iman shejawe she jate i, “Teman-e hüke yelinglak yang. Tenyihpu nyih-a ngaolan ümei nyih ja ngoh nang, hüyange hatüo teman jing shaha ne ye-anglak yang. Teman-e napning wang ngaipute ngoiye hatüo ngaolan ye-i-pe tanne ngohma-a, shaoshi tampuwe teman yüophalak! Tüokhei sha-a kei, teman taihah, hüyange ahng nok me ngohpalante shingne tamhah!”

¹⁰Tüokhei iman-e Aramlan lakjing tüohyange ye hüyange Samaria chingnyu ngoiyange peten yompalante nyik; hüyange iman-e hüke i: “Toman Aramlan lakjing te pei, hüpoi tüome kahta ao-o ye-i-ma-a kahta ngaowüng hango yenang; hüpoi koiponglan hei shinyange, hüyange gadolan hei shinyange, hüyange nyenoklan hei hüke ngoh nang ei.”

¹¹Peten yompawe tüopa ngaolan ponge tam; hüyange hatüo ngaowa ahngnok ngoiye pei.

¹²Wang üne-o manngaipe ngoh; hüpoi ahngpa shinlüo, hüyange I shaoshanpalante i, “Sha-a taowe numante Aramlan-e temante hanghe linghu nang ipha ning! Teman seanyao yengle nang she iman-e shingnang; hüyange hüke teihnang, ‘Aope teman chingnyu mepu ngailakei, iman-e teman üyin me pholak hüyange teman chingnyute onglak’, she teihyange iman lakjing mepu iman nying nyingke lolak jingne phaote yanne taiye hüonang!”

¹³I shaoshanpalan yo me shejawe jan-e i, “Jaja kih-e iyapoi tüopa chingnyu me ngohpu kahtalan-a lilak ne ngoh nang; hüke Israellan aoyin mahteki hükih-e. Tüokhei towe ngohpu koiponglan nga phei kahta ütam shonhah, hümme nakshih hanghe ngainang teman-e shinglak.”

¹⁴Tüokhei iman-e tongtoi ni phei kahta ütam leye tam; hüyange ahngpawe Aramlan lakjing te shonne teiye i, “Taitüoh hüyange hanghe ngai leitüoh.”

¹⁵Hüyange kahtalan Jordan ngoiye iman pheite woi tai; hüyange leihuyah, “Lam paowe Aramlan-e iman mamme yanne taiwante winpu nyemo hüyange ngouyang maawe ngoh yangki.” Hüyange ngaolan kipalan leihye hüyange ahngpate i.

¹⁶Hüyange Samaria kahtalan pette ta hüyange Aramlan lakjing mepu toinan nyieye yah. Hüyange Youngwanpawe ngaowe tampuke, pheng an kilogram lüm yejema-a barley kilogram wok khüm ükhüw ja te yüo.

¹⁷Sha-a gho ja woipa ao te ahngpawe mongnyenge ngoh, Ite peten yomlak jingne ahngpawe tam. Hüyange peten pong me kahtalan-e pette ngaiwante I tangme yalokke kem hüyange I li. Hüyange Kahwang kahta aowe ahngpa I tangte peiwante ngaowe tam, Iye ngaowe tampuke ngai.

¹⁸Hüyange Kahwang kahta-e ahngpa te ngaowe tampuke, üne nyih hakih tingme pheng an kilogram lüm yejema-a barley an kilogram wok khüm ükhüw ja te Samaria me yüolak,

¹⁹hüke iwante gho ja woipawe jan-e i, “Youngwanpa Iye wangdang tawolan eppe tamyapeyoi hatüo oklak a?” Hüyange Iye jan, “Leihuyah, nange nang mükke hatüo ngelak, hüpoi hatüowa yehahlak.”

²⁰Hatüo hangke i, hüke, khakshuwe Ite ngai; hangjingne kahtalan-e chingnyu peten me I tangme yashoppe kem, hüyange I li.