Read Konyak Naga 2 AHNGPALAN 8 Bible Online

2 AHNGPALAN 8 - Konyak Naga bible

2 AHNGPALAN 8

¹Sha-a Shunem sheko ao üha Elishawe üyin ne menge tam, yhate Elishawe ngaowe i, “Yayong tüoh, hüyange nang hüyange nenok taitüoh, hüyange ümeken me nang oklakei tüoken me lakyah; hangjingne Youngwanpawe seanyao yenglepu shonteki, hüyange hatüowa wangpeng nyit ngoiye ngohlak.”

²Yhawe Kahwang kahta-e ngaowe tampuke ling, hüyange yha noksa phei Philistia te wangpeng nyit mong me nyoilak jingne chingtai.

³Wangpeng nyit kümme peiwante shekonyuwa Philistia kahtok mepu Israel kahtok yamme leih ye; hüyange yhawe nok hüyange kahtok yahyelak jingne ahngpa tangte pei.

⁴Sha-a ahngpawe Kahwang kahta shaoshanpa Gehazi phei Elishawe lingpu yashan yali shinghuwe hüke teingaowe ngoh, “Chingmei lam linge Elishawe yashan toi lingpu jeng üte ikei.”

⁵Aope Elishawe hangke litepu üyin ne menge tam tüopa jeng ahngpate Gahaziwe iye ngohwante, hüke leihuyah, sheko ao üha Iye üyin ne menge tam, hatüo yhawe yoi nok hüyange yha kahtok jingne ahngpa te tonglak jingne peipu ngoh shu. Hüyange Gehaziwe i, “Ü-nokpu, O Ahngpa, shekonyuwa hatüo üja, hüyange Elishawe üyin leih yetampu yha üha-a hatüo ngohnang!”

⁶Aope ahngpawe shekonyute tong, yhawe Ite jan-e yewante Gahaziwe ipu ngaoting ne ngoh. Tüokhei ahngpawe yha jingne yakjongpa ja le, hüyange hüke i, “Yhawe kahtok tüohyange taipu nyih mepu tenyihte ngoiye, yha jing khongküm, hüyange kahtok mepu ngaipu khongkümpu yhate leih yene tamtüoh.”

⁷Sha-a Elisha Damascuste pei; hüyange Aram ahngpa Benhadad dak-e ngoh, hüwante Ite hatüo hüke i, “Kahwang kahta tüoyekao me peiye ngohnang.”

⁸Ahngpawe Hazael I yakjongpa yo me sheja te i, “Nang yak me hünghao ütam yayah, hüyange Kahwang kahta pongte yutüoh, hüyange I kaiye Youngwanpate ‘Tüopa dak mepu tao meilak jeyapu!’ she tongtüoh.”

⁹Tüokhei I phei hüolak jingne Hazael-e hünghao yahyange tai; hüke Damascus me shemeipupa ne ngaipu toilam lili, udh hangki deli yahyange I Elisha tangte peiye I sheshao me yong, hüyange i, “Nang shaoshanpa Aram ahngpa Benhadad-e, ‘Tüopa dakpu mepu I meilak jeya!’ she tonge nang tangte tao shon.”

¹⁰Elishawe Ite jan-e i, “Yetüoh, Ite itüoh: ‘Nang üting me meilak’; hüpoi Youngwanpawe üte hüoteki I üting me lilak.”

¹¹Tüophei me Hazael wüopuwe nyaikhaiye manta manta she Elishawe yelakpe mükshaoh-e lei. Mokhshe Elisha shap.

¹²Hüwante Hazal-e tong, “Üyongpa nang hangne shapke?” Iye jan, “Hangjingne nange Israel hayimlante ümeng linglak she taowe shing. Imanjing yomtep te nange vün woklak, iman naoshelan nange yanglow-e toilak, hüyange iman üjoilan khoihnyaiye ngütte tamlak, hüyange iman püm yekengpe ngohpu shekolan phünne hit tamlak.”

¹³Hazael-e jan-e i, “Hüpoi nang shaoshanpa kuiha ja-a hangne! Hükihpu toinyu üyong Iye linge oklak a?” Elishawe jan-e i, “Nang Aram tangme ahngne menglak she Youngwanpawe üte hüoteki.”

¹⁴Hüwante Hazael Elisha mepu yayonge tai, hüyange Benhadad tangte leih yepu ngoi. Hüwante Iye tong, “Elishawe nangte hangke i ei?” Hüwante Iye jan, “Iye ütingme nang meilak she i.”

¹⁵Hüpoi üne nyih Hazael-e shinleng inkhek üyong yahyange, hatüo yengme team hüyange tüopawe ahngpa shetate lüohitte manli manli she yüohtam, hüyange I lüomah. Tüophei me Benhadad nanleiye Hazael ahngne meng.

¹⁶Israel ahngpa Ahab üha Joram wangpeng nga shepupa wanglam lampu hipak me, Jehoshaphat ahngpa üha Jehoram-e Judah me ahngne meng.

¹⁷I ahngne mengwante nyupuh wangpeng delüm me ni ne ngoh, hüyange Iye Jerusalem me wangpeng tet wanglam lam.

¹⁸Iye Israel ahngpa lamnyu me kem, hüke Ahab noksawe lingpuke; hangjingne Ahab üha-a I sheko ne yah; hüyange Youngwanpa sheshao me hanghe ünu hatüo Iye ling.

¹⁹Hüpoi Iye David-e I mepu ülilan ne jinte wanglam lamlak she janyangpu jingne, David jingne Youngwanpawe Judah mah ne yetamhu.

²⁰Jehoram-e wanglam lampu hipak me Judah phei tüi-e Edomlan yong, hüyange iman bumei kahtok ne meng.

²¹Hüwante Jehoram-e I jing tongtoi khongküm I phei woiyange Zairte tai, ümeken me Edom nyahpong lan-e iman neikonne ngoh. Hüpoi wangnyak me I hüyange Ijing tongtoi woipalan-e taiye oklak ne ling, hüyange yinne ok; hüpoi Iphei wetaipalan yoi yoi nokte yan.

²²Tüokhei tenyihte ngoiye Edom me Judah wanglam lampu phei hokke yongnang. Tüophei me tüopa hipak me muh Libnah chingnyuwe hokke yong.

²³Hüyange towe ngohpu Jehoram toishao, hüyange Iye lingpu sheminlamphe, Judah ahngpalan putahpangao laitep me nyanne ngohnang.

²⁴Hüyange Jehoram yoi payimlan phei shi, hüyange David chingnyu me Ipayimlan phei mu; hüyange I nanlei-e Iha Ahaziah ahngne meng.

²⁵Israel ahngpa Ahab üha Joram wangpeng pen me ni shepupa wanglam lampu hipak me Judah ahngpa Jehoram üha Ahaziahwe ahngne menge wang.

²⁶Ahaziah ahngne mengwante I nyupuh wangpeng da me ni ngoh yangki; hüyange Iye Jerusalem me wangpeng ja ahngne meng, Inyuwa ahngpa Ahab üha hüyange Israel ahngpa Omri ühu Athaliah ne ngohyangki.

²⁷Hüyange Ahab noksawe lingpuke, Iye Ahab noksa lamnyu me kem, hüyange hanghepa Youngwanpa sheshao me yemei hatüo ling; hangjingne I Ahab nok phei mata ne meng.

²⁸Hüyange Ramoth Gilead me Aram ahngpa Hazael phei tüi-e Ahab üha Joram phei Iye hoklak jingne tai; hüyange Aramlan-e shapju me Joramte maapha.

²⁹Aram ahngpa Hazael phei hokwante Ramah me Aramlan-e Ite maaphapu jingne Jezereel me meitamlak jingne Joram ahngpa leih ye. Hüyange Judah ahngpa Jehoram üha Ahaziahwe, Jezereel me Ahab üha Joram phei hüolak jingne lai, hangjingne I dak-e ngoh.