Read Konyak Naga 2 AHNGPALAN 9 Bible Online

2 AHNGPALAN 9 - Konyak Naga bible

2 AHNGPALAN 9

¹Hüyange Elishawe hipalan yo mepu shelaha ja te nyik hüyange Ite i, “Nyemo tümyah hüyange Ramoth Gilead te taitüoh. Nang phei hatüo olive minnga sheng yayah.

²Aope tüokente peilakeih, Nimshi üha Jehoshaphat hüyange Iha Jehu tüome leitüoh, hüyange ongtüoh, hüyange I jeihei naolan mepu yoi yoine yahtei tüoh, hüyange tüp ümongpate I woiye intüoh.

³Tüophei me minnga sheng yahpuwe I shang me shokke tamtüoh, hüyange hüke itüoh, ‘Hüke Youngwanpawe inang, Taowe nang Israel tangme ahngpa ne leye minnga phowe tamteki.’ Tüophei me taküp eptüoh, hüyange okpu shinne mam-e taitüoh, hüyange tanne tah ngoh.”

⁴Tüokhei hipa naosheha-a Ramoth Gilead te tai.

⁵Hüyange aope I pei, leihuyah, nyahpong woipalan bangjem jemme ngohpu Iye hüo, Iye i, “Üyongpa, taowe nangjingne ngaolan ja ngohnangki.” Hüwante Jehuwe i, “Toman yo me nange aohipa te ngao nangki?” Iye jan-e i, “Nangte o Üyongpa.”

⁶Tüokhei imni yayong hüyange noksate ong; hüyange Jehu shang me hipa shelahawe olive minnga shokke tam hüyange Ite i, “Hüke Israel Kahwang Youngwanpa inang, Taowe nang Youngwanpa kahtalan tangme, hüke Israel tangme ahngne menglak jingne minnga phowe tamteki.

⁷Nange nang nokpupa ahngpa, hüke Ahab üha toilakyang, tüome Taowe ü-hipalan hüyange ülao shaoshanpalan toiyangpu jingne Taowe Jezebel te phuh hahlak.

⁸Hangjingne Ahab noksa khongkümpu mahlak; hüyange Taowe Ahab mepu netan naha lili hüyange Israel me küowe angpu hüyange bumei yafün me angpu lange winlak.

⁹Taowe Ahab noksa Nebat üha Jeroboam noksa kih-e, hüyange Ahijah üha Baasha noksa kih-e linge tamlak.

¹⁰Jezebel mang yemulak; yha manga Jezreel yikeng pongme kuihalan-e hahlak.” Tüolan ngao iyang phei me hipa naosheha-a tüp mepu yayong hüyange phette tai.

¹¹Tüophei me Jehu Iphei pu üyonglan tangte leih ye, iman yo me shejawe Ite i, “Lampheli meiye ngohnangpu ümuh ma? Hangne tüopa ngapa kahta nang tangte peipu?” Jehuwe jan-e i, “Iye hanghe yahhu numan-e shingnang.”

¹²Iman-e jan, “Yeshing toman-e yeshing! Iye hanghe ngao tomante itehu?” Hüwante Iye, “Üte hüke i, she Iye jan, ‘Hüke Youngwanpawe inang, Taowe nang Israel tangme ahngne menglak jingne minnga photeki.’ ”

¹³Hüwante iman kahta lili, shai yafün tangme Jehu ya shongme yoi inkhek angtamlak jingne pette jem, hüyange “Jehu-a ahngpa ngohnang” she üngwün hüyange nyawong wüng!

¹⁴Tüokhei Nimshi üha Jehoshaphat I üha Jehuwe Joram phei tüi-e konkon, sha-a Joram hüyange Israel khongkümpuwe Aram ahngpa Hazael phei tüi-e Ramoth Gilead yomyange ngoh!

¹⁵Hüpoi Joram ahngpa-a Iye Aram ahngpa Hazael phei hokwante, Aramlan-e I mayah tampu maa meilak jingne Jezereel me leihye-e ngoh yangki. Tüokhei Jehuwe i, “Nang mongjang hatüo ne mengma-a, kahta aowe-o tüopa-a Jezreel me ngaolak jingne ching mepu yanne taine tahtam.”

¹⁶Tüokhei Jehu tongtoi ja me shot, hüyange Jezreel te tai; hangjingne tüome Joram lamyange ngoh. Hüyange Judah ahngpa Ahaziah-o Joram phei ponglak jingne laiye ngoh yangki.

¹⁷Sha-a Jezreel me weyompa yomtep me yongyange ngoh, hüyange Jehu peiwante iman ükhong Iye nge, hüyange hüke nyik-e i, “Taowe ükhong ja peipu ngenangki!” Hüwante Joram-e i, “Koipong me shotpu kahta ja shontüoh, hüyange wepa heiya chingmei me peipu she tongne tamtüoh.”

¹⁸Tüokhei Jehu pongte naoshe ja koipong me phet, hüyange i, “Hüke ahngpawe inang, chingmei me heiya?” Hüwante Jehuwe jan-e i, “Nange chingmei hangke sheine!” “Nang ü-tokphei te yetüoh.” Hüyange yomtep me ngohpu weyompawe ngaolan phawe i, “Ngaolan kipa-a iman ükhong ngoitepu, hüpoi leih üyepu yang.”

¹⁹Hüwante ngaolan kipa ülao ja üne-o koipong me shotyange shon; ao iman tangte ngoi hüyange hüke i, “Hüke ahngpawe inang, ‘Chingmei me heiya?’ ” Hüwante Jehuwe jan-e i, “Nange chingmei hangke sheine! Nang ü-tokphei te yetüoh.”

²⁰Üne-o weyompawe ngaolan phawe i, “Ngaolan kipa-a iman ükhong ngoitepu, hüpoi leih yeyepuyang. Hüyange Iye paowe i, ükhong woipawe I jing tongtoi-a ngapa kih-e woiyangki, Nimshi üha Jehu meimei kih-e ngenangki!”

²¹Ahngpa Joram-e ngao phawe i, “Ü-tongtoi tümtüoh.” Hüyange iman-e hüke tüm-e tam. Hüyange Israel ahngpa Joram hüyange Judah ahngpa Ahaziah yoi yoi tongtoi me shotyange Jehu phei hüolak jingne tai; hüyange Jezreellan Naboth jing kah me iman hüo.

²²Joram-e Ite tong, “Nang chingmei me peipu jeya?” Hüwante Jehuwe jan, “Nangnyu Jezebel nuweshakpu hüyange phongyeng phonglaipu toishao teshin-e ngohyange hanghe chingmei ngoh oklak shi?”

²³Hüwante Joram-e, “O Ahaziah, khaoteki, hatüowa lowelampupa yang!” she üngwün yange yoi tongtoi lüp hüyange phette tai.

²⁴Hüwante Jehuwe yoi jing wenglah nowe yah, hüyange I wong khongkümpuwe Joramte I üngtok me keppe tam, hüyange lahhan-a I mongjang phuklüowe peilak hong, hüyange I tongtoi me toita.

²⁵Hüwante Jehuwe Ite jampa Bidkarte i, “I mang yahtüoh, hüyange I Jezreellan Naboth nok kahko me tüotüoh; hangjingne tao hüyange nang jam she Ipa Ahab pheite ongyange taiwante, hangke Youngwanpa I kaiye tüopa ngao ngaowe ang, teih tüoyah:

²⁶Youngwanpawe inang, ‘Ütingme Taowe menyih Naboth iy hüyange Ihalan iy ngeyangki; hüyange tüopa kahko memuh Taowe nangte nishe leih phalak.’ Sha-a tüojingne Youngwanpa ngao kih-e I mang yahtüoh hüyange I kahtok me tüotüoh she Ite jampa te Jehuwe ngao pha.”

²⁷Aope Judah ahngpa Ahaziahwe hanghe ngai tüopa nge, tüokhei I tongtoi me shotyange Beth Haggan ching yekaote phette tai; hüpoi I pheite Jehu woi hüyange i, “I-o toitüoh!” Tüokhei Ibleam ü-o me ngohpu Gur te ongpu ye me iman-e I tongtoi me mayah tam. Hüpoi I Megiddo chingnyu ngoiye phette taipu ok, hüyange I tüome li.

²⁸I shaoshanpalan-e tongtoi ja me I Jerusalemte yahtai, hüyange David chingnyu me I payimlan mangjong me I muwe tam.

²⁹Hüyange Israel ahngne Ahab üha Joram wangpeng pen me ja shepupa me Ahaziahwe Judah tangme ahngne menge wang.

³⁰Aope Jehu Jezreel ngoi; Jezebel-e tüopa jai; hüyange yhawe yoi mük min me muli pho tüm, hüyange yoi shangwüo shatüm; hüyange ahngnok me shotyange chingkeng lamnyute tawo mepu leiye tai.

³¹Hüyange Jehu Peten kaiye ongwante, yhawe nyik-e i, “Nang chingmei me heiya Zimri! Nang nokpu toipupa! Nang hangne tüome peipu?”

³²Jehuwe ütang yete leiye in hüyange üngwün, “Ü-yekao me ao ngohnangki? Ao?” Hüwante lingyangpu ahngnok yompu kahtalan ni lüm ngoipuwe tawo mepu Ite leiye tai.

³³Jehuwe imante i, “Yha shunge yeitam tüoh!” Tüokhei iman-e yha shunge yeitam; hüyange yha iy ütam-a jant me hüyange ütam-a koipong lante shah. Hüyange Jehuwe yoi koipong hüyange tongtoilan yha tangme linne kem;

³⁴tüophei me I ahngnok te ong, hüyange hahying. Tüophei me nakshih Iye i, “Tüopa phoiwümpu shahpu sheko te leitüoh, hüyange yha muwe tamtüoh; hei ipu japa yha-a ahngyha ngohnang.”

³⁵Hüpoi aoyin yha mang mulak jingne tai, yha shangwaan, hüyange ya hei yak waan tokte kaiye hango yenangpe ngoh.

³⁶Aope iman-e tüopa jeng ngaolan Jehute pha, Iye hüke i, “Hatüowa Youngwanpa ngao ngohnang; hanghepa Iye I shaoshanpa Tishbilan Elijah te, Jezreel kahmük yikeng pongme Jezebel mei kuihawe hahlak.

³⁷Hüyange Jezebel manga Jezreel kahmük kahko me mahu ih kih-e teeshai ngohlak; tüokhei tüopa-a Jezebel yang she aowe-o yeshing oklak.”