Read Konyak Naga 1 PUTAHPANGAO 10 Bible Online

1 PUTAHPANGAO 10 - Konyak Naga bible

1 PUTAHPANGAO 10

¹Sha-a Philistia lan-e Gilboa kahtang me Israellan phei tüi-e wehok. Tüoken me Israellan üngang toi, hüyange topulan (Ahngpa Saul hei Ihalan) nyam-e yan.

²Hüpoi Philistia lan-e jange taiye kemyüo, hüyange Saul hayim Jonathan, Abinadab, hüyange Malchishua iman lüm toi.

³Saul neikon-e shapjuwa jamloi she menge pei, hüyange wepa lah han-e Ite menge mayah tam.

⁴Hüwante Saul-e I ngouyang jonpa naoshete i, “Tüolan sho yekhüppalan peiye üte yaoweleye linge ngohlak yang, nang yanglow teaktüoh, hüyange hatüowe tao toitam tüoh.” Hüpoi I ngouyang jonpawe yejai, hangjingne I yeonge nyam. Tüokhei Saul-e yoi yanglow teakke yah, hüyange tüopa tangme yoi nying nyingke lütyange li.

⁵Aope naoshepawe Saul lipu nge, tüokhei I-o yoi yanglow tangme lütnetam yange limah.

⁶Tüo kaiye Saul li hüyange I halan naoshe lüm khongküm jam-e li, hüyange I nok khongkümpu jam she li.

⁷Aope Israel kahtalan Jezreel kahjee me ngohpu lan-e wetaipalan ükhong yanne mahpu hüyange Saul hei Ihalan lipu nge, iman-e yoi chingnyu tüoh hüyange yanne mah; tüophei me Philistialan pei hüyange tüolan nyoi omme yah.

⁸Üne nyih, aope Philistialan toi yangpu mang yahlak jingne pei, iman-e Saul hüyange Ihalan mang Gilboa kahtang me tüo.

⁹Iman-e Saul wehok o khokke yah hüyange I shang phün, hüyange I ngouyang yah, hüyange iman jing moung hüyange kahtalan tangte ngaolan ümei peilak jingne, Philistia kahmük khongkümpu yete ngaolan kipalan üngang shonne tei.

¹⁰Iman-e I ngouyang iman kahwanglan khümjing ja me ang, hüyange I shang Dagon iman kahwang yopnok me jhotte ang.

¹¹Aope Gilead mepu Jabesh kahtalan-e Philistia lan-e Saul te hanghe ling jaiyapeih,

¹²mongyonge wongnangpalan khongkümpu yayong, hüyange Saul mang hüyange Ihalan mang yah, hüyange Jabeshte yah ye. Hüyange iman-e iman waan Jabesh me longkham pee phang me mu, hüyange nyih nyit nyaowele.

¹³Hüke Saul yoi üting yelakpu nanjingne li; Iye Youngwanpa te mong yehüm, hüyange Youngwanpawe ngaophapu yejon, Iye teijam teiponglak yam-e phongyengpalan hei yaha ümenglan yam,

¹⁴Hüyange Youngwanpa yeyam. Tüokhei Youngwanpawe I toi, hüyange ahngchinga Jesse üha David yete lüp.