Read Konyak Naga 1 PUTAHPANGAO 11 Bible Online

1 PUTAHPANGAO 11 - Konyak Naga bible

1 PUTAHPANGAO 11

¹Hüwante Israel kahtalan khongkümpu Hebron me David tang te jem hüyange Ite i, “Leihuyah, toman-a nang iy hüyange nang mei.

²Lintepu hipak me, hüke Saul toman ahngpane ngohwante Israel woiyange taipa hüyange woiyange yepa-a nang ne ngoh yangki; hüyange Youngwanpa nang Kahwange nangte i, nanga ü-kahtalan Israel nyeeyompa ne menglak, hüyange ü-kahta Israel tangme nang ahngne menglak;”

³Tüokhei Israel lwngmeilan khongküm Hebron me Ahngpa David tangte pei; hüyange David te iman phei Hebron me Youngwanpa sheshao me jiengjeppu ja yah, hüyange Samuel kaiye Youngwanpa ngaopu ke, iman-e Israel tangme ahngne menglak jingne David minnga phowe tam.

⁴David hüyange Israellan khongkümpu yayonge tai hüyange Jerusalem chingnyu chinghah. Hüwante tüopate Jebus she nyik-e ngoh, hüyange tüopa kahmük me üwangne ngoh-e peipu Jebuslan tüoken me yelakpe nyoiye ngoh yangki.

⁵Jebuslan-e David te nang aope-o chingnyute ye-onglak she i; hüpoi chingtuk pepeyange ngohpu Zion David-e chinghah, hüyange tüopate “David chingnyu” she nyik.

⁶David-e i, “Jebuslan te üwangne aohepawe shümlakeih I-a nyahponglan woipa ne menglak!” Joab, ao Inyute Zeruiah she min, Iye woiyange shümme wang hüyange woipa ne meng.

⁷Tüophei me yomtep ümongme ngohlak jingne David pei, tüokhei tüopate “David chingnyu” she nyik.

⁸Hüyange Millo mepu neikon-e meimeiye ükam wange Iye chingnyuwa ling; hüyange Joab-e topulan chingnyuwa linge ye.

⁹Hüyange David wong shenang shenang she jong, hangjingne Ütahpa Youngwanpa I phei ngoh yangki.

¹⁰Sha-a David jing ütahpa wetaipalan-a tüolan ngoh nang; iman-e Ite Israellan khongkümpu phei jam-e, Israel jeng Youngwanpa ngao kih-e, I ahngne menge tamlak jingne jampu üyong (Ite) pha.

¹¹Tüolan-a David jingne ngangpalan ngohnang: Hachmon puhu mepu Jashobeam, “Lüm yo me” woipa; Iye yoi ngoulow no hüyange shapju ja me Iye gho lüm toi.

¹²Hüyange “Lüm” yo me I phei mepu naomei ütahpa-a Ahoh puhu mepu Dodo üha Eleazer ngohyangki.

¹³Aope Philistialan Pasdammim me shapju jingne jemyapeih, I David phei ngoh. Tüoken me barley tah üngang pheipu kah ja ngohyangki. Sha-a kahtalan-a Philistialan sheshao me nyam-e phet-yan küm;

¹⁴hüpoi David Imni kahko hotan me yongyange tien, hüyange Philistialan toi; hüyange yeonge okpu üyong phei Youngwanpawe iman yintam.

¹⁵Aope Philistia wetaipalan ükhong Rephaim me lakke ngoh, woipa kahta delüm yo mepu kahta lüm Adullam longsa me David tangte longnyoite lai.

¹⁶Hüwante David-a yomtep mongme ngoh, hüyange Philistialan ükhong jawe Bethlehem omme yah.

¹⁷David yoonge dak ngai hüyange i, “Oh, Bethlehem peten shongme ngohpu yengnung mepu üte yinglak yeng ütam-e phashih phang!”

¹⁸Hüwante tüolan wongnangpu ütahpa kahta lüm-e Philistialan lakjing lüowe yu, hüyange peten shongme ngohpu Bethlehem yengnung mepu yeng shao, hüyange hatüo David tangte yah pei. Hüpoi Davidte hatüo yeying; tüoleima Iye hatüowa Youngwanpate dopu ne shokke tam;

¹⁹hüyange i, “Taowe tüopa-a aope-o yeyinglak! Hatüowa tüolan kahta aoyinne iman üyin phünne pha tüolan iy yingpu ne ngohkülak!” Tüokhei Iye tüopa minying she i. Tüolan-a naomei ütahpa naoshe lüm-e lingpu toishao ngohnang.

²⁰Sha-a Abishai, Joab ünao, delüm yo me ütahpa ne ngoh yangki. Hüyange Iye gholüm phei tüi-e yoi ngoulow no, hüyange iman toi, hüyange naoshe lüm ngaipu kih-e I-o ütahpa ne meng.

²¹I-a Delüm yo me ütahpa ne meng, hüyange iman woipa ne meng; hüpoi Iye ütahpa “Lüm” pa-a yeyüo ok.

²²Kabzeel mepu Jehoiada üha Benaiah wongnangpu ütahpa ja ne ngoh yangki; Iye Moablan naomei ütah ni toi; hüyange wonge okpu toi maawe ling. Yi yeipu nyih hipak ja me kahkook te I lai, hüyange yengkong mailang ja toi.

²³Hüyange Iye Egyptlan ja toi, jin daowe kheyongpu, yakkong nga daopu kahta. Tüopa Egyptpa yak me inkhek taklak leng shinne laopu ngoulow üyong ja ngoh yangki; hüpoi Benaiah I tangte wongjoi ja yahyange lai, hüyange Egyptpa yak mepu ngoulow nyieye yah, hüyange I ngoulowe muh Ite lütte toi.

²⁴Tüoyin-a Benaiahwe lingpu wongnangpu yashan toilan, aohi “Delüm” yo me ja ne ngoh.

²⁵“Ütahpa delüm yo me I-o ütahpa ja,” hüpoi “Naoshe Lüm” shinne ütahte yengai ok. Hüyange David-e I yompalan tangme nokpu ne menge tam.

²⁶Tüolan-a ülao min ngaipu wetaipa ütahpalan ngohnang: Joab ünao, Asahel Bethlehem mepu Dodo üha Elhanan

²⁷Harod mepu Shammoth Pelot mepu Helez

²⁸Tekoa mepu Ikkesh üha Ira Anathoth mepu Abiezer

²⁹Hushah mepu Sibbecai Ahoh mepu Ilai

³⁰Netophah mepu Maharai Netophah mepu Baanah üha Heled

³¹Benjamin Gibeah mepu Ribai üha Ithai Pirathon mepu Benaiah

³²Gaash ü-o kahjee mepu Hurai Arbah mepu Abiel

³³Baharum mepu Azmaveth Shaalbon mepu Eliahba

³⁴Gizon mepu Hashem Harar mepu Shagee üha Jonathan

³⁵Harar mepu Sachar üha Ahiam Ur üha Eliphal

³⁶Mecherah mepu Hepher Pelon mepu Ahijah

³⁷Carmel mepu Hezro Ezbai üha Naarai

³⁸Nathan ünao Joel Hagri üha Mibhar

³⁹Ammon mepu Zelek Beeroth mepu Joab ngouyang jonpa Naarai

⁴⁰Ithri mepu Ira hüyange Gareb

⁴¹Hitlan Uriah Ahlai üha Zabad

⁴²Shiza üha Adina (Reuben nokphong mepu woipa ütahpa ja, I yoi ükhong mepu wetaipalan delüm phei)

⁴³Maacah üha Hanan Mithan mepu Joshaphat

⁴⁴Ashterah mepu Uzzia Aroer mepu Hotham hayim Shamma hüyange Jeiel

⁴⁵Tiz mepu Shimri hayim Jediael hüyange Joha

⁴⁶Mahavah mepu Eliel Elnaam hayim, Jeribai hüyange Joshaviah Moab mepu Ithmah

⁴⁷Mezobai mepu Eliel, Obed, hüyange Jaasiel.