Read Konyak Naga 1 PUTAHPANGAO 12 Bible Online

1 PUTAHPANGAO 12 - Konyak Naga bible

1 PUTAHPANGAO 12

¹Aope Kish üha Saul mepu yinlak jingne David taiye Ziklag me nyoi ngoh, I phei üpong tüoyang phei hüyange monghümlak naomeilan peiye om.

²Saul pheipu Benjamin nokphong mepu üngang pei. Iman wenglah jonpu kahtalan, hüyange long lahhan yakjah ye hüyange yaknya ye yakphei keppe okke ngoh yangki.

³Iman-a Gibeah mepu Shemaah hayim Ahiezer hüyange Joash woipu phangme ngoh yangki. Azmaveth hayim, Jeziel hei Pelet Anathoth mepu Beracah hei Jehu

⁴Gibeon mepu Ishmaiah, ütahpalan yo me ja hüyange “Delüm” yo me woipa ja Gederah mepu, Jeremia, Jahaziel, Johanan, hüyange Jozabad

⁵Haruph mepu, Eluzai, Jerimoth, Bealiah, Shemariah, hüyange Shephatiah

⁶Korah puhu Elkanah, Isshiah, Azarel, Joezer, hüyange Jashobeam,

⁷Gedor mepu Jeroham hayim, Joelah hüyange Zebadiah.

⁸Gad nokphong mepu wong pheipu hüyange naomeilan, ree hüyange ngou jonpu me ütah, aoyin sheta yengkong mailang kih-e ngoh, hüyange aoyin waktang me meiyah kih-e phette ok, phaonyu jong yomtep me David ngohwante iman peiye om.

⁹Ezer ütahpa, Obadia nishepupa, Eliab lümshepupa,

¹⁰Mishmannah pelishepupa, Jeremia nga shepupa,

¹¹Attai wokshepupa, Eliel nyit shepupa,

¹²Johanan tet shepupa, Elzabad tu shepupa,

¹³Jeremia pen shepupa, Machbannai pen meja shepupa.

¹⁴Gad nokphong mepu tüolan kahta ütam-a haja tangme ütam-a gho ja tangme woipa shenao lipalan ngoh yangki.

¹⁵Iman-e wangpeng me üwangpa le, hangkih tingme Jordan yengyin yengnah tangme muleam-e yün yapeih, iman-e yengyin-a kai, hüwante yengyin kahjee heong hei henyip yeme nyoiye ngohpu kahtalan yanne tam.

¹⁶Hipak ja me Benjamin hüyange Judah nokphonglan mepu kahtalan David ngohjing yomtep te pei ngoi.

¹⁷David iman phei hüolak jingne ngai hüyange imante i, “Numan ü-phei shümpa ne menge üte jam ne peipu ne mengma-a, ü-mongjang numan phei ja ne menglak; hüpoi üme ümeng yenang yahpeyoi, ü-phei wepane mengpu lante tao lowe tam ne peipu ne mengma-a, hüwantepa-a teman pajeiyonglan Kahwange tüopa shinglak hüyange numante tee tamtüoh.”

¹⁸Hüwante “Delüm” yo me woipa Amasaite yaha pei, hüyange Iye nyik-e i, “O David, toman-a nangjing; O Jesse üha! Hüyange nang phei chingmei, chingmei nang me, hüyange nangte jampalante chingmei! Hangjingne nang Kahwange nangte jamnang.” Tüophei me David-e iman yah, hüyange I nyahponglan tangme iman woipalan ne menge tam.

¹⁹Manasseh nokphong kahta ütam-o David Philistialan phei Saul phei tüi-e shapjute peiwante, tüohyange David tangte pei. Tüoyangpoi Iye imante yejam; hangjingne Philistialan nokpulan-e taishoyange I-a Ziklag te shonne yetam, hüyange i, “Teman woipa ütuh me yeilak ne Iye yoi nokpu Saul tangte muh taimah külak.”

²⁰Ziklag te leih yewante Manasseh kahta tüolan David tangte woi pei: Adnah, Jozabad, Jediael, Mikhael, Jozabad, Elihu, hüyange Zillethai. Manasseh me ngohwante iman khongkümpu haja tangme woipalan.

²¹Iman-e I wetaipalan tang me woipa japongne David shaoshan, hangjingne ima-a iman khongkümpu woipa ütah shaha. Phei me iman-a Israel nyahponglan tangme woipalan ne meng.

²²Hüke wanghe ngaipu lep iye David tangte kahtalan, wetaipalan ükhong üyong, Kahwang wetaipa ükhong kih-e manngai manngai pei khan pei yangki.

²³Youngwanpa ngao kih-e, David te Saul ahngching phalak jingne Hebron me David tangte peipalan, wehoklak jingne tümyange ngohpu naomeilan-a tüolan ngohnang:

²⁴Judah: Ree hei ngoulow hüyange yonglah khakwange tümyangphei kahta haja wok phei me gho tet;

²⁵Simeon: Khak wange tümyang phei kahta haja nyit phei me gho ja;

²⁶Levi: Kahta haja peli gho wok;

²⁷Aaron huhayim Jehoiada pheite woipalan mepu kahta haja lüm gho nyit;

²⁸Hüyange Zadok pheipulan, hokke okpu naoshe ütahlan da phei me ni;

²⁹Benjamin (Saul iman nokphong): Kahta haja lüm (Benjamin nokphong mepu sheyongpu jinga Saul phei muh omme ngohyangki;)

³⁰Ephraim: Iman nokphong mepu ütahpalan haja da gho tet;

³¹Manasseh henyipye: Kahta haja pen me tet, aoyin peiye David ahngne menge tamne yong;

³²Issakhar: Iman phang me kahta üngang woiyange woipalan gho ni pei (Israel hanghe linglak hüyange toi linglak jingne hipak ümei she tüolan woipalan-e shing;)

³³Zebulun: Yonglah hüyange ngouyang jonlak jingne thrimlei yah yange tümyang phei ütingpa kahtalan haja denga;

³⁴Naphtali: Yonglah, ngou hei ree khak wange tümyang phei kahta haja delüm phei me nyit woiyange woipalan haja ja;

³⁵Dan: Thrimlei yahyang phei kahta haja da me tet phei me gho wok;

³⁶Asher: Shapju jingne tümyang phei kahtalan haja deli;

³⁷Heongye Jordan nokphonglan: Reuben, Gad, hüyange heongye Manasseh: yonglah ülam lili jonlak jingne thrimlei yahyang phei kahta lakh ja haja da.

³⁸Tüolan wetaipalan, hoklak te lahnyikpalan, shapju jingne oleng khak wange yah yange, Israel khongkümpu tang me David ahngne menge tamlak te monge Hebron te peiyangki. Hüke muh towe ngohpu Israel khongküm David ahngne menge tamlak jingne mong ja ne ngoh yangki.

³⁹Tüo me iman David phei nyih lüm, hahyinge mo hah-e ngoh yangki; hangjingne iman pheipu jeiheinao lan-e iman jingne tümyange ngoh yangki.

⁴⁰Hüyange üne-o iman chingyo yupi nokphong lan hüke Issakhar, Zebulun, hüyange Naphtali ngoipu mepu-o Gado me, udh me, lwngkoi me, hüyange mahu üpong me hahying wangman-e awkek an, wuwünglick, wuwünglickwan, hüyange wuwüngti hei minnga yah pei. Iman-e üne-o mahu hüyange nyee woi pei hüyange hah ne toi; Tüolan khongkümpuwa Israel me mongmeipu hüowe lingpu ngoh yangki.