Read Konyak Naga 1 PUTAHPANGAO 13 Bible Online

1 PUTAHPANGAO 13 - Konyak Naga bible

1 PUTAHPANGAO 13

¹David-e haja tangme hüyange gho tangme woipalan phei, hüke woipa pümlep-ipu phei teihüowe ngao;

²Iye Israel kahta khongkümpute hüke shingne tamme i, “Hatüo numante meima-a, hüyange hatüo Youngwanpa teman Kahwange mongpu ne mengma-a, iman phei ngengpa hüyange Levilan hahnyoi me kahtok ngohpalan tangte, iman jamshe teman tangte peilak ne üshei yete ngaolan shonhah.

³Hüyange teman-e teman Kahwang üjao ghonu teman tangte yah ye hah; hangjingne Saul hipak me teman-e hatüo winne tüoh.”

⁴Jemme ngohpu khongkümpuwe hüke linglak mong, hangjingne kahta lili mükte toishaowa shuwe ngoh yangki.

⁵Tüokhei Kiriath-Jearim mepu ghonu Jerusalem te yah yelak jingne, David-e kahmük üshei ye mepu Israellan heyekao me Egypt lan Shihor mepu apyekao me Lebo Hamath lamkeng ngoipu mepu jem ne tam.

⁶Hüyange David hüyange Israellan khongküm Baalah chingnyu, hatüowa Judah jing Kiriath-Jearim te Kahwang üjao ghonu yahne, hanghepa cherubim tangme shotte ngohpu Youngwanpa min me nyik-e ngoh nang, tüokente ong.

⁷Iman-e Kahwang üjao ghonuwa tongtoi üla ja me Abinadab nok mepu yah yüo, hüyange Uzzah hei Ahio niye tongtoi-a woi.

⁸David hüyange Israel khongkümpu Kahwang sheshao me iman wong khongküm puwe, hem phei kongki, kongkilah ha, pheamkao, yankok, hüyange nyawong wünge hoongli mongongpu ngoh yangki.

⁹Aope iman Chidon me tahnoijing taleng ngoiye pei, mahu üpong yashah hüo, hüwante Uzzahwe I yak nowe ngai hüyange ghonu te yakke jon.

¹⁰Youngwanpa mongshih ngaipu Uzzah phei tüi-e ngai hüyange Iye Ite shüt, hangjingne Iye ghonu te yoi yakke jon; hüyange I tüo me Kahwang sheshao me li.

¹¹Hüwante David mongshih ngai hangjingne Youngwanpawe Uzzah tangme mongshih ngai, hüyange tenyihte ngoiye tüopa nyoite Perez Uzzah she nyik nang.

¹²Tüophei me Kahwang te David nyam hüyange i, “Sha-a hangke taowe ghonu-a ü-phei yah teilak?”

¹³Tüokhei David-e ghonu-a Iphei Jerusalem te yah üye; hüpoi Iye tüopa-a Gath chingnyu mepu kahta ja Obed Edom she minpu nok me tüoh.

¹⁴Ghonu-a tüoken me lekeng lüm angetüoh; hüyange Youngwanpawe Obed Edom noksa hüyange I jing khongkümpu te moiman phatam.