Read Konyak Naga 1 PUTAHPANGAO 14 Bible Online

1 PUTAHPANGAO 14 - Konyak Naga bible

1 PUTAHPANGAO 14

¹Tyre ahngpa Hiram-e David tangte ngaolan kipalan, hüyange I jingne ahng nok welak jingne cedar pee tangyang phei long hüyange pee ai jonpalan shon.

²Hüyange David-e Israel tangme I ahngne menglak jingne Youngwanpawe linge tamnang, hüyange I ahngching yoi kahta Israellan jingne jaalun-e nowe tam she mongme shinge pei.

³Jerusalem me Davidte shekonyu ünyei yah, hüyange David mepu hayim naoyim ünyei jaalun.

⁴Tüolan hayimlan Jerusalem me Ite puhtam: Shammua, Shobab, Nathan, Solomon,

⁵Ibhar, Elishua, Elpelet,

⁶Nogah, Nepheg, Japhia,

⁷Elishama, Beeliada, hüyange Eliphelet.

⁸Aope Philistia lan-e Israel üshei tang me David ahngne leyah she jai, iman wetaipalan David phowe yahlak jingne ong; hüyange David-e tüopa jaiyange iman phei hüolak jingne yayong.

⁹Philistialan Rephaim kahjee ngoi hüyange chinghah-e wang.

¹⁰Tüokhei David-e Kahwangte tong, “Taowe Philistialan phei hoklak jeyah? Nange üte okpupa phalak jeya?” Youngwanpawe jan, “Taowe nangte okpu phalak; hoktüoh!”

¹¹Tüokhei David-e Baal Perazim me iman phei hok; hüyange iman nao. Iye i, “Muleam puwe ompu kih-e ü-yak kaiye Kahwange ü-wepalan lüowe tamyangki.” Tüokhei tüopa nyoite Baal Perazim she nyik.

¹²Aope Philistialan nyam-e yan, iman-e iman jing moung tüohyange tai, hüyange David-e tüolan-a vün me jakke tamlak jingne ngao pha.

¹³Philistialan shonne yengohpe kahjee yete leih ye hüyange ni she chinghah.

¹⁴Tüokhei David-e Kahwangte nishe tong, Kahwange Ite i, “Nange iman phei tüoye me tah hok; hüpoi neikon-e ongtüoh, hüyange balsam pee shong me jaye kao me peitüoh.

¹⁵Aope nange wetaipalan yawüng balsam pee tang me jailakei, hüwante shapjute yutüoh; hangjingne, nang shao me Philistialan wetaipalan mahtamlak jingne Tao kemlak.”

¹⁶Tüokhei David-e Kahwange Ite ngaowe tampuke ling, hüyange iman-e Philistialan wetaipalan ükhonga Gibeon mepu Gezer lam püowe toi.

¹⁷Hüyange David okkeshangpu ngaolan üken phe me yan, hüyange jatlan-e Youngwanpa te I sheshao me nyamne tam.