Read Konyak Naga 1 PUTAHPANGAO 15 Bible Online

1 PUTAHPANGAO 15 - Konyak Naga bible

1 PUTAHPANGAO 15

¹David-e yoi jingne David chingnyu me nok we; hüyange Kahwang üjao ghonu jingne nyoi jing ja ling, hüyange tüopa jingne nyenok ja ling.

²Hüwante David-e i, “Levilan tokte kaiye aowe-o Kahwang üjao ghonu yepailak, hangjingne Youngwanpawe iman-a Kahwang üjaopa ghonu pailak hüyange jintepu jingne Ite shaoshanlak jingne le.”

³Youngwanpa üjao ghonu, Iye jintepu jingne tüm-e angpu nyoite yah inlak jingne David-e Israel khongküm Jerusalem me jemne tam.

⁴Tüophei me Iye Aaron huhayim hüyange Levilan jemne tam.

⁵Levi puhu mepu Kohath hayim ütahpa Uriel, hüyange I jeiheinaolan gho ja phei me da pei;

⁶Merari puhu mepu, gho ni phei me da tepu nokpu Asaiah pei;

⁷Gershon puhu gho ja phei me delüm tepu nokpu Joel pei;

⁸Elizaphan puhu, gho ni tepu nokpu Shemaiah;

⁹Hebron puhu, detet tepu nokpu Eliel;

¹⁰hüyange Uzziel puhu, gho ja pen me ni tepu nokpu Amminadab pei.

¹¹Tüophei me David-e Zadok hei Abiathar ngengpalan hüyange Levilan wok-Uriel, Asaiah, Joel, Shemaiah, Eliel, hüyange Amminadab nyik;

¹²Iye Levilante hüke i, “Numan Levi puhu tepu woipalan ngohnang. Hüke Youngwanpa Israel Kahwang üjao ghonuwa, taowe tüopa jingne tümyange angpu nyoite numan-e yah-e in oklak üne, numan nying nyingke numan hüyange numan jeiheinaolan jaowe shawe ngohyah.

¹³Numan Levilan-e üwangpa me tüopa yepaipu jingne, Youngwanpa teman Kahwang mongshih ngai, hangjingne teman-e wanglamme jonne pailak kih-e yeling.”

¹⁴Tüokhei ngengpalan hüyange Levilan-e Youngwanpa Israel Kahwang üjao ghonu yah inlak jingne iman nying nyingke jaowe sha.

¹⁵Hüyange Youngwanpa ngao kih-e Mosa ngaowe tampuke Levilan-e Kahwang üjao ghonuwa iman phaktang me sheam me pai.

¹⁶Üne-o David-e Levilan üshanglante, mongmei ngaowüng wünlak jingne, hemlok-e kongki ümtük, hüyange yankook wünge hem loklaklan iman jeihei naolan lelak jingne tam.

¹⁷Tüokhei Levilan-e hemlokpu puhu mepu Joel üha Heman le; I pheipu Berechiah üha Asaph; hüyange Merari puhu mepu Kushaiah üha Ethan le-ngai.

¹⁸Hüyange iman phei jam-e nishepupa wen me Zekharia, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, hei Mik-neiah, hüyange peten yompalan Obed-Edom hei Jeiel.

¹⁹Hemlokpalan Heman, Asaph, hei Ethan lan-e shakphanyan peiwang konglak;

²⁰Zekharia, Aziel, Shemiramoth, Jehiel, Unni, Eliab, Maaseiah, hei Benaiah lan-e Alamoth kih-e pheamkao konglak;

²¹Hüpoi Mattithiah, Eliphelehu, Mik-neiah, Obed-Edom, Jeiel, hei Azaziah lan-e Sheminith kih-e (sheboshe) kongki lahha wünglak.

²²Lokleipu me Iye okkeshangpu jingne hem lokpu Levilan yo me woipa ne Chenaniah leyangki.

²³Berekhiah hei Elkanah ni-a jiengjeppu ghonu peten yomlak jingne leyangki.

²⁴Shebaniah, Joshaphat, Nethanel, Amasai, Zekharia, Benaiah, hei Eliezer ngengpalan-e Kahwang ghonu sheshao me nyawong wünglak. Obed-Edom hei Jehiah ni-o jiengjeppu ghonu peten yomlak.

²⁵Tüokhei David hüyange Israel lwngmeilan, hüyange haja tangme woipalan Obed Edom nok mepu jiengjeppu ghonu yah inlak jingne mongong mongle pu phei tai, hüyange iman-e mo üyong ngoh.

²⁶Levilan aoyinne jiengjeppu ghonu paiyange tainang tüolante Kahwange jampu ütingpa me tüolak jingne iman-e mahu üpong nyit hüyange nyee nyit toidopu pha.

²⁷Sha-a David nyemo pengkhai inkhek ünyai phei o-yange ngohyangki, hüyange hüke ghonu paipu Levilan khongküm, hem lokpalan, hüyange hem lokpalan woipa Chenaniah o-yange; hüyange David te pengkhai inkhek ngengpa phakshaoh yahyange ngoh yangki.

²⁸Hüke Israel khongkümpuwe Youngwanpa jiengjeppu ghonuwa, Jerusalem ngoiye, pongwong, nyawong, hüyange kongki ümtük ngaowüng tangme üngwünne, kongkilahha hüyange wette lokpu kongki ngao üyong phei paiyange ong.

²⁹Hüke Youngwanpa jiengjeppu ghonu David chingnyute peiwante, Saul yhala Michal-e tawo mepu leiye tai, hüyange David ahngpa polokke mongong monglepu nge; hüyange yhawe yoi mongjang me Ite nyiye teih.