Read Konyak Naga 1 PUTAHPANGAO 16 Bible Online

1 PUTAHPANGAO 16 - Konyak Naga bible

1 PUTAHPANGAO 16

¹Hüyange iman-e jiengjeppu ghonu paiye in, hüyange David-e tüopa jingne linge angpu nyenok ümongye me ang; hüyange Kahwang sheshao me iman-e jakke dopu hüyange chingmei dopu pha.

²Aope Davidte jakke dopu hüyange chingmei dopu phawe sho, Iye Youngwanpa min me kahtalante moiman pha.

³Hüyange Israel khongkümpute, netan hei sheko lilite ankhüo japong, hüyange mei oun japong, hüyange wuwünglick an japong tam-e pha.

⁴Üne-o David-e Levilan ütam jiengjeppu ghonu sheshao me shaoshanlak, yoppe khümpu woilak, mongmei hüolak, hüyange Youngwanpa Israel Kahwangte minyong phalak jingne le.

⁵Asaph woipa ne, hüyange Zekharia-a Ite jampupa ne le. Jeiel, Shemiramoth, Jehiel, Mattithiah, Eliab, Benaiah, Obed-Edom, hüyange Jeiel iman-a kongki ümtük loklak jingne. Asaph-e yankook konglak jingne,

⁶hüyange ngengpa ni, Benaiah hüyange Jahaziel jiengjeppu ghonu sheshao me yephünpe nyawong wünglak.

⁷Hüwante tüonyih David-e üwangne Asaph hüyange I pheipu Levilante Youngwanpate minyong phatamlak hemloklak tam.

⁸O Youngwanpate minyongpu phatüoh, I min pongtam tüoh; Iye hanghe lingyangki jatlante jaine tamtüoh.

⁹Ite loktam tüoh, I minyongpu hem loktam tüoh; Iye lingpu yashan yali toishaolan jaine tamtüoh!

¹⁰I Üjaopa min müktishiwatüoh; aoyin mongjange Youngwanpa yamnang hoongli mongong tüoh!

¹¹Youngwanpa hüyange I wongnangpu yamtüoh, yelakpe I ompu yamtüoh.

¹²Iye yashan yali toishaolan lingpu, Yashanlak Iye lingpu, ngaophün tampu Iye phapu teih tüohyah;

¹³Oh I shaoshanpa Israel hayimlan, Jacob hayim, Iye leyangpulan!

¹⁴I-a teman Kahwang Youngwanpa ngohnang; I ngaokhümlan-a kahtoknyu nopu jingne ngohnang.

¹⁵Iye jiengjeppu aope-o tahpe, hanghepa Iye jintok te jin ngohlak jingne ling;

¹⁶Abraham phei Iye yahpu jiengjeppu, Isaac phei Iye janpu yahpu;

¹⁷hanghepa Iye Jacob phei jiengjep, jin jinte ngohlak jingne Israel phei yah.

¹⁸Iye i, “Taowe numante Kanan kahtok phalak.” “Tüopa-a numan moth ne menglak.”

¹⁹Aope iman shangtoi üjingha hei, Kanan kahtok me yinpa ja ne ngoh,

²⁰iman kahmük ja mepu kahmük ja ngoiye, ahngching ja mepu ja ngoiye waa ngoh yangki.

²¹Hüpoi Iye aote-o iman shaoshi pongne yetam; iman yinlak jingne, Iye ahngpalante deingao phawe i;

²²“Üjingne leyangpu lante ümeng tahling; ü-hipalante tah let.”

²³Kahtoknyu üsheiye, Youngwanpate hem lok tüoh: Nyihjeih she ngaolan ümei pongtam tüoh, Iye teman yin yangki.

²⁴Jatlan tangte I müktishiwa, kahtalan üshei tangte Iye lingpu ütahpa toishao pongtam tüoh.

²⁵Hangjingne üyongpa-a Youngwanpa hüyange ütahpa me minyong phalak wangnang; Kahwanglan üshei tangme sheyong she Ite yihnoonlak yang.

²⁶Hangjingne ülao jatlan kahwanglan khongkümpu moung shaha ngoh nang, hüpoi Youngwanpawe wangdanglan ling.

²⁷Müktishiwa hüyange minyong ngampai I shüpneiye ngoh nang, wong hüyange mongmei I khümjing me ngohnang.

²⁸Kahtok me ngohpu kahta üsheiye, Youngwanpa minyong tüoh, I müktishiwa hüyange okkeshangpu te minyong phatüoh.

²⁹Youngwanpa müktishiwa min me minyong phatüoh; dopu yah peikei hüyange I khümjingte peikei. Aope I üjaopa me peiye ngoh, Youngwanpa sheshao me ümme khümtüoh.

³⁰Kahtoknyu üshei, I sheshao me nintüoh! Kahtoknyuwa nyoijing ja me mongju onge shotyange ngohnang hüyange po ne ye-oklak.

³¹Kahtok hüyange wangdang mongmei tüoh! Hüyange jatlante itamtüoh Youngwanpawe wanglam lamnang.

³²Yengching, hüyange nangme ngohpu yinmok liliye waotam tüoh; Kahjee, hüyange nang me ngohpu khongkümpuwe mongmeine tamtüoh!

³³Hüwante phao mepu peelan-e Youngwanpa sheshao me mongmei puwe üngwünlak, hangjingne I kahtoknyu te wanglam lamne peinang.

³⁴O Youngwanpate minyong phatüoh, hangjingne I-a meinang; Iye kenpuwa jinte ngohnang.

³⁵Ite itüoh, “O Kahwang toman yintampa, toman yinpha; toman jam-e jem ne tampha, jatlan mepu toman yinpha, hümme nakshih toman-e nangte minyong phalak hüyange nang üjaopa min yongtam lak.”

³⁶Israel Kahwang, Youngwanpa minyong tüoh! Sha-a hüyange I min jinte yongtüoh. Hüwante kahta liliye i, “Amen!” hüyange Youngwanpate minyong pha.

³⁷Tüokhei ahngpa David-e Asaph hüyange I jeiheinao Levilan tüoken me Youngwanpa jiengjeppu ghonu sheshao me nyih jeih she wongpongne ngaipu ke yelakpe ghonu sheshao me shaoshanlak jingne tüoh.

³⁸Jeduthun üha Obed-Edom hüyange iman puhu mepu dewok phei me tet imante teijam teiponglak jingne ang. Hosah hüyange Jeduthun üha Obed Edom petenlan yompu te nokpu ne ang.

³⁹David-e Zadok ngengpa hüyange Ipheipu ngengpalan, Gibeon mepu khümjing me Youngwanpate khümlak yakjongpa ne tüoh.

⁴⁰Youngwanpa ngaokhüm me nyan-e ngohpu hanghepa Iye Israel te phawe tampu khongkümpu kih-e jakke dopu wümjong tang me yelakpe napjeih yajeih she Youngwanpate jakke dopu phalak jingne Iye tüoh.

⁴¹Iman phei Heman hüyange Jeduthun, hüyange ülaolan tüopa jingne she leyange ngohpulan-a hüyange meimei-e min phawe ngohpalan-a Youngwanpate minyong phalak jingne ngoh yangki; hangjingne I yayeng shüpshe jinte ngoh.

⁴²Heman hüyange Jeduthun me üne-o aope üjao hem loklakei hüwante wünglak jingne nyawong, hüyange yankook üne-o ülao kongtoilan yak jongne tam. Jeduthun puhu kahtalan petenlan yomlak jingne tam.

⁴³Tüophei me kahta lili yoi yoi nokte yan, hüyange David-o yoi noksalan phei moiman teitamlak jingne nokte ye.