Read Konyak Naga 1 PUTAHPANGAO 17 Bible Online

1 PUTAHPANGAO 17 - Konyak Naga bible

1 PUTAHPANGAO 17

¹Ahngpa David shaapa-a yoi ahngnok me ngoh. Nyih ja Iye Nathan hipa te hüke i, “Hatüo me tao cedar phei wepu nok me ngohnang, hüpoi Youngwanpa jiengjeppu ghonu-a nyenokja me ngohnang.”

²Nathan-e David te i, “Nang mongjang me hanghe ngoh khongkümpu lingtüoh, hangjingne Kahwang nang phei ngohnang.”

³Hüpoi tüoya muh Youngwanpa ngao Nathan tangte ngaowe pei,

⁴“Taitüoh hüyange Ü-shaoshanpa David te itüoh, ‘Hüke Youngwanpawe inang: Tao ngohlak khümjing ja üjingne welak-a nang ne yeje.

⁵Hangjingne Tao Israel woiteipu nyih mepu tenyih ngoiye Tao khümjing me yengohpei, hüpoi Tao nyenok ja mepu nyenok jate hüyange nyoijingja mepu nyoijingja ngoiye Tao kemyangki.

⁶Tao nyoijing hangshin me Israel khongkümpu phei kem üshei ye me Taowe Israel kahpalante, aoyinte ü-kahta nyeeyomlak jingne Taowe tam, imante, “Hangne numan-e üte cedar pee phei khümjing ja yewetampu!” she Taowe ngaopu a?’

⁷“Sha-a tüokhei hüke nange ü-shaoshanpa David te itüoh, ‘Ütahpa Youngwanpawe hüke inang, Taowe nang hahnyoi me nyeelan pheite woipu mepu ü-kahta Israel tangme woipa ne menglak jingne woiye peiyangki.

⁸Hüyange ümeken yekao te nang tai, Tao nang phei omme ngoh yangki; hüyange nang sheshao me wepalan khongküm lange winyangki. Taowe nanga kahtoknyu me ütahpa minngaipu ütahpa ne linge tamlak.

⁹Hüyange ü-kahta Israel jingne Taowe kahmük ja lelak; hüyange iman yoi ngohlaknyoi tüolak hüyange shaaji yepolak ne Taowe iman deilak; hüyange ü-kahta tangme Taowe kahpalan le-ngaipu hipak mepu üwangpa kih-e shaaji ümengpa hayimlan-e imante shümne yetamlak:

¹⁰hüyange Taowe nang wepa khongküm nang phang me angne tamlak. Tüo tokte kaiye Youngwanpawe nangte huhayimlan phatamlak she Taowe nangte shingne tamnang.

¹¹Aope nangpayimlan phei ngohlak jingne nang nyih hei hipak ngailakei, nang phei me Taowe nangha ngaine tamlak, nang hayim yo me ja, hüyange Taowe I ahngching yepope angne tamlak.

¹²Üjingne khümjing ja wetamlaka I ne menglak, hüyange Taowe I ahngching jinte yelakpe ngohne tamlak.

¹³Tao Ipa ne menglak, hüyange I-a ü-ha ne menglak. Hüyange nang shao me ngohpupa mepu Taowe yahteipuke Taowe I mepu yayeng shüpshe hango yah yetailak.

¹⁴Hüpoi Taowe ü-kahtalan hüyange ü-ahngching me jintepu jingne I mongne tamlak hüyange I ahngching jinte üküm yenangpe ngohlak.’ ”

¹⁵Nathan-e David te Ite ütahte ngaiye tampu khongküm ngaowe tam.

¹⁶Hüwante David ahngpa ong, hüyange Youngwanpa sheshao me shot, hüyange i, “O Youngwanpa Kahwang, Nange tao teshin-e woiye peipu taowa hüyange tenoka hangkihpu?

¹⁷O Kahwang, hatüowa nang mük sheshaoma-a üjoiha ja hei ngoh yangki; hüpoi nange üne-o nang shaoshanpa noksa jeng ngoikülak hipak nangjange ngohyange ngaoyangki, hüyange üte ngoikülak jinlan hüoyangki; O Youngwanpa ahngpa!

¹⁸Hüyange nang shaoshanpate wangshüm hüowe tampu jingne nang te David-e üne-o hanghe ngaopu oklak shi? Hangjingne nange nang shaoshanpa shinge ngohnang.

¹⁹Nang shaoshanpa jingne, O Youngwanpa, hüyange nang yoi mongjang kih-e, tüolan toishao üyong khongküm shingne tamlak nange tüopa toishao üyong ling.

²⁰Nang lepu me ao-o yenang, O Youngwanpa, toman na jaipu khongküm pume nang kaiye ülao Kahwang ao-o yenang.

²¹Nang kahtalan Israel, aoyin tangte yoi kahta ne menglak Kahwange yintamlak jingne tai, nange Egypt mepu aoyin yinne tam iman sheshao me jatlan jange teipu kaiye, nang nying nyingke min üyong hüyange nyamlakpa ne linge tam, iman lepu me kahtoknyu me hanghe jat ngohnang shi?

²²Hüyange nange nang kahta Israel jintepu jingne nang kahta ne mengne lingetam; hüyange nang, O Youngwanpa, iman Kahwangne meng.

²³Hüyange sha-a, O Youngwanpa, nange nang shaoshanpa jeng hüyange I huhayimlan jeng ngaopu ngaowa jintepu jingne ngohne tamtüoh, hüyange nange ngaopuke lingne tamtüoh.

²⁴Hüyange nang min jintepu jingne mongne tamlak hüyange yongne tam-e ilak, ‘Ütahpa Youngwanpa Israel Kahwang-a, lsrael jing Kahwang ngohnang,’ hüyange nang shaoshanpa David jat hei li nang sheshao me yongne tam-e ngohlak.

²⁵Hangjingne nang, Ü-Kahwang, nang shaoshanpa te I jingne huhayimlan jingne huhayimlan ngaine tamlak she ütahte ngai tamyangki; tüokhei nang shaoshanpawe nang sheshao me yoplak jingne mongyong nang.

²⁶Hüyange sha-a, O Youngwanpa, nanga Kahwang ngohnang, hüyange nange tüopa yashanyali toishao nang shaoshanpate jan yangki.

²⁷Tüokhei sha-a nang sheshao me jintepu jingne yelakpe ngohpu oklak ne, chingmeilam linge nang shaoshanpa huhayimlan moiman pha; hangjingne O Youngwanpa, nange hanghe moiman tamyangki hatüo jintepu jingne moiman tamyangki.”