Read Konyak Naga 1 PUTAHPANGAO 18 Bible Online

1 PUTAHPANGAO 18 - Konyak Naga bible

1 PUTAHPANGAO 18

¹Hipak ütenja ngohyang phei me Ahngpa David-e üne-o Philistialan chinghah hüyange iman naowe tam. Iye iman phang me ahngpu Gath chingnyu hüyange neikonpu chingshaolan yah.

²Iye üne-o Moablan nao, hüyange Moablan David shaoshanpa lan-e meng hüyange poon yah peiye pha.

³Üne-o David-e (Syrian kahtok) Zabah Ahngpa Hadadezer phei Hamath yikeng pongme hok, hangjingne ima-a, Euphrates ütokye yikeng I phang me anglak jingne Hadadezer ngang.

⁴David-e I mepu tongtoi haja ja, koipong pheipu wetaipalan haja nyit, hüyange ya pheipu wetaipalan haja da pho; Iye tongtoi gho ja jingne wangman-e koiponglan yah angyange ülaolan khongküm ya phakke tam (kongkante metyange tüoh.)

⁵Aope Damascus mepu Aram nyahponglan ahngpa Hadadezerte jamlak jingne pei; David-e Aram kahtalan haja da phei me ni toi.

⁶Tüophei me David-e iman yikeng mongme wetaipalan lakjing ling; hüyange Aramlan David shaoshanpalan ne meng, hüyange Ite poon pha. Youngwanpawe David te I taipu üshei ye me okpu pha.

⁷Hadadezer shaoshanpa lan-e jonpu hon ree lan-a David-e yah, hüyange tüolan-a Jerusalemte yah pei.

⁸Hüyange Hadadezer chingnyulan Tibhath hüyange Kun mepu shakphan yan üngang David-e yah. Tüopa phei Solomon-e shakphan yan yengkook hüyange shongnyulan hüyange shakphan yan tük hei sheng ling.

⁹Aope Hamath ahngpa Tou-e Hadadezer nyahponglan khongkümpu David-e naowe yahteki she jai,

¹⁰Iye yoiha Hadoram David ahngpa tangte, Ite salam phalak hüyange okpu te minyong phalak jingne shon; hangjingne David-e Hadadezer phei hokyange naowe tam; ao phei Tou ahngpa-o hipak lep iye hokpu ngoh. Hüyange Iye hon, khüm, hüyange shakphan yan toinan wangman-e shon.

¹¹Tüolan-a üne-o David ahngpawe Youngwanpate phünne pha, Iye jatlan üshei mepu, Edom, Moab, Ammon, Philistia, hüyange Amalek mepu Iye yah peiye angpu hon hüyange khüm phei jam-e pha.

¹²Zeruiah nyuyong üha Abishai-e Hüm kahjee me Edomlan nao, hüyange haja pen me tet toi.

¹³Hüyange Iye Edom me wetaipalan lakjing ling, hüyange Edomlan khongküm David shaoshanpalan ne meng, hüyange Youngwanpawe David te I taipu ye üshei me okpu pha.

¹⁴Tüokhei David-e Israel üshei tangme wanglam lam; hüyange Iye ngaotingpa phei ngaophün hüyange kahta üsheite ja kih kih-e jon.

¹⁵Zeruiah üha Joab, nyahponglan tangme woipa; Ahilud üha Jehoshaphat, yaknyanpa me üjengpa;

¹⁶hüyange Ahitub üha Zadok hei Abiathar üha Ahimelech ngengpalan ne ngoh; hüyange Shavsha gho me yak nyanpa;

¹⁷Jehoiada üha Benaiah-a David yompalan tepu woipa; hüyange ahngpa David hayimlan-a ahngpa shaoshanpu toishao ütah shaha me ngoh yangki.