Read Konyak Naga 1 PUTAHPANGAO 19 Bible Online

1 PUTAHPANGAO 19 - Konyak Naga bible

1 PUTAHPANGAO 19

¹Ütenja ngohyang phei me ahngpa Nahash li, hüyange Iha (Hanun) ahngne meng.

²Hüyange David-e i, “Nahash üha Hanunte taowe monghahpu hüolak, hangjingne Ipawe üte monghahpu hüowe ngoh yangki.” Tüokhei David-e I toloimeiye tamlak jingne ngaolan kipalan shon. Hüyange David ngaolan kipalan I toloimeiye tamlak jingne Ammonlan kahtokte Hanun tangte pei.

³Hüpoi Ammon lwngmei lan-e Hanunte i, “Davidte nang tangte toloimei tamlakpa shonpu kaiye Iye nangpate iyeshe nang she nange teihnang kü a? Tüo ne yejekülak! I ngaolan kipalanne yamlak hüyange toi taitamlak hüyange kahmük kuhshüklak jingne nang tangte yepei a?”

⁴Tüokhei Hanun-e David ngaolan kipalan pho, iman jumin linne tam, iman-e yahpu inkhek koongtoi ngoiye khüppe tam, hüyange iman shonne ye.

⁵Iman nokte yelak jingne jamloi wüo. Aope David-e hanghe ngai tüopa jai, iman tangte ngaolan shonne iman me jumin laowe manngai manngai Jerikho me nyoi ngohtüoh she i.

⁶Aope Ammon lan-e iman nying nyingke David sheshao me yashah hüolak ne lingyangki she shinge pei, Ahngpa Hanun, hüyange Ammon lan-e Mesopotamia ütok yemepu, Aram kahtok Maacah mepu hüyange Zobah mepu koipong hüyange tongtoi nanphenglak jingne khüm kilogram haja delüm phei me peli shon.

⁷Iman-e koipong tongtoi haja delüm phei me ni nanshak, hüyange ahngpa Maacah nyahponglan pei hüyange Medeba me lakjing ling. Ammonlan-o iman chingnyulan khongkümpu mepu jem hüyange hoklak jingne tüm.

⁸Aope David-e hanghe ngai tüopa jaiwante, Iye Joab hüyange nyahponglan khongkümpu shon.

⁹Ammonlan yayonge pei hüyange iman chongwang chingnyu Rabbah te ongpu lamme khünglenge tanne yong, hüyange ahngpalan aoyin imante jamlak jingne pei, iman-a kahko ye me iman dojing ling.

¹⁰Aope Joabte shapjuwa I phei tüi-e sheshao yeme hüyange tokphei yeme ngoh nang she nge ok, Iye Israel nyahponglan mepu ütahpalan te, hüyange iman-a Aramlan yekao shapju me yongne tam.

¹¹Topu wetaipalan-a Inao Abishai woipu phang me tüoh, hüyange iman-e Ammonlan phei hüolak jingne shapju yong.

¹²Joab-e hüke i, “Aramlan üjingne loishe wongnange ngema-a, peiye üte jampha, hüyange üne-o Ammonlan-e nangte loishe wongnange nge ma-a, tao peiye nangte jamlak.

¹³Wongnangyah hüyange mengha yah! Teman kahtalan jingne hüyange teman Kahwang chingnyulan jingne hokhah. Hüyange Youngwanpawe I sheshao me hanghe meinang she teih hatüo lingtam tüoh.”

¹⁴Tüokhei Joab hüyange I phei pulan Aramlan ngohpu nyoite shümlak jingne pei, hüwante Aramlan iman sheshao mepu nyam-e yan.

¹⁵Aope Ammonlan-e Aramlan nyam-e yanpu nge, iman-o hüke Joab ünao Abishai sheshao mepu nyam-e yan, hüyange chingnyute ong. Hüwante Joab Jerusalem te leihye.

¹⁶Hüpoi aope Aramlan-e iman Israellan te nao ne tamyangki she shinge pei, iman-e ngaolan kipalan shon hüyange Aramlan aoyin Euphrates yengyin kaiye taiye ngoh, Zobah ahngpa Hadadezer wetaipalan woipa Shophach, Iye woiyange yah pei.

¹⁷Aope David-e tüopa ngaolan jai, Iye Israel wetaipalan jemne tam, Jordan kai, hüyange Aramlan phei janhüowe iman khünglenge yonge tam, shapju ükong wang;

¹⁸Israellan-e Aramlan jange ye ne tam. David hüyange Iphei pulan ne Aram tongtoi woipalan haja nyit, hüyange ya me hokpalan haja deli toi. Iman-e üne-o Aram woipa Shophach toi.

¹⁹Aope Hadadezer pheipu ahngpa lan-e iman-a Israellan te naone tamyangpu yang she shinge pei, iman-e David phei chingmei ling, hüyange I kahtalan ne meng. Tüokhei shaaji Aram lan-e Ammonlante jamlak jingne monge yenangpe lak.