Read Konyak Naga 1 PUTAHPANGAO 20 Bible Online

1 PUTAHPANGAO 20 - Konyak Naga bible

1 PUTAHPANGAO 20

¹Ahngpalan shapjute taipu juwan, lümlei hipak me, Joab-e wetaipalan ükhong woiyange tai, hüyange Ammonlan kahtok chinghah, hüyange peiye Rabbahte shüm. Hüpoi David Jerusalem me ngoh. Hüyange Joab-e Rabbah nao, hüyange hatüo omme yah.

²Ammonlan moung Milcom ahngpa shaoshaoh me hon kilogram delüm phei me peli nanjing ngoh yangki; Tüome toinyu long ngoh yangki, hatüo David-e yah hüyange I ahngpa shaoshaoh me tüopa yah. Hüyange Iye üne-o chingnyu mepu nyieyahpu toinyu nanha üngang yah.

³Iye chingnyu me ngohpu kahtalan woi yah hüyange pewetlak jingne, yanshüm hüyange wa jonne toi lingne tam; hüke muh Iye Ammonlan ülao chingshaolan kahtalante ling. Tüophei me David hüyange I kahtalan Jerusalem te leih ye.

⁴Tüophei me Philistialan phei Gezer me wehok ngai; hüwante Hushahlan Sibbecai-e kholanglan yo mepu ngaipu Sippai toi; hüyange Philistialan I phangte ong.

⁵Philistialan phei üne-o wehok shapju ja ngoh, hüyange Gath mepu Goliath, ao ngoulow inkhek taklak lenglao shinne ngoh, inao Lahmi-a Jair üha Elhanan-e toi.

⁶Gath me üne-o wehok shapju ja ngoh, tüoken me kholang ja ngoh, ao yak me yaklan wok wok nyim me ngoh, hüyange yalan wok wok nyimyange ngoh, khongkümpu sheiye da me peli; hüyange I-a kholanglan mepu ngaipu ne ngohyangki.

⁷Aope Iye Israel lan phei tüi-e yong, David ünao Shimea üha Jonathan-e I toi.

⁸Tüolan lüm aoyin David hüyange I kahtalan-e toi, iman-a Gath mepu kholanglan huhayimlan ne ngoh yangki.