Read Konyak Naga 1 PUTAHPANGAO 21 Bible Online

1 PUTAHPANGAO 21 - Konyak Naga bible

1 PUTAHPANGAO 21

¹Israel phei tüi-e satan yong, hüyange Israellan shangtoi iyeleilak David nowe shüp.

²Tüokhei David-e Joab hüyange ülao woipalante i, “Taitüoh, Israel jat khongkümpute ngoiye Dan mepu Beersheba ngoiye taitüoh, hüyange taowe kahta shangtoi shinglak jingne iyelei tüoh.”

³Hüpoi Joab-e i, “Youngwanpawe yoi kahtalante iman hangshin ngoh teshin-e gho ngoiye jaalun-e tamshih! Ü-nokpu ahngpa, iman khongkümpuwa ü-nokpu shaoshanpa lanne yeje a? Hüma-a hangne ü-nokpuwe wongpongne mengpu? Hangne Iye Israel tangte ünu omme tamlak?”

⁴Hüpoi Joab-e ahngpa ngao ye ok. Tüokhei Joab yayonge tai hüyange Israel kahmük khongküm pute kemme pong, hüyange Jerusalemte leih ye.

⁵Joab-e kahta shangtoi ipu David te pha. Israel me yanglow jonne okpu kahtalan khongkümpu million ja phei me lakh ja, hüyange Judah me yanglow jonne okpalan lakh peli haja denyit ngohyangki.

⁶Hüpoi Iye Levi hüyange Benjamin nokphonglan shangtoi ye i; hangjingne ahngpawe ngaowe tampu Joab-e yelengpe ngoh yangki.

⁷Hüpoi tüopa toishaowe Kahwang mong yemeipe ngai, hüyange Iye Israel te shüt.

⁸Hüyange David-e Kahwangte i, “Taowe tüopa toi lingpu kaiye taowe ünu jonyangki; taowe nangte yoppe tongnang, nang shaoshanpawe ünu ompu yah teitekei! Hangjingne taowe yeonge ngapa toi lingyangki.”

⁹Hüwante Youngwanpawe David jing hipa Gad te i,

¹⁰“Taitüoh hüyange David te itüoh, hüke Taowe Ite ülam lüm yo me ja lelak jingne phanang. Hanghepa Iye lelakei Taowe linglak.”

¹¹Tüokhei David tangte Gad wen, hüyange Youngwanpawe hanghe ngaowe tam Ite i, hüyange tong, “Hanghepa yah ning?

¹²Wangpeng lüm seanyao yenglepu hei ya? Yejema-a nang wepa nyahponglan shaote nyam-e lekeng lüm waalak? Yejema-a nyih lüm mongme Youngwanpa yanglow phei, kahmük me leamdak ümeng phei Youngwanpa shongnyingpalan-e Israel yikeng mong üshei ye me mahne tampu jeyah? Sha-a aowe tao shon I tangte taowe hanghe janpu yah yelak letüoh?”

¹³Hüwante David-e Gadte i, “Tao mongmeng üyong me ngoh nang! Youngwanpa yak me hei tao yeine tampha, hangjingne I shüpshe yeonge yonge ngoh nang; hüpoi tao kahtalan yak mepa-a yeine tah tam.”

¹⁴Tüokhei Youngwanpawe Israel tang me leam dak shon; hüyange tüome Israel lan haja denyit li.

¹⁵Tüophei me Kahwange shongmokpa-a Jerusalem mah tamlak jingne shon; hüpoi aope Iye hatüo mahtamlak jingne ngohwante, Youngwanpawe nge, hüyange ümengpa mepu I monglüp; hüyange Iye mahtampupa shongmokpa te i, “Laktüoh! Halanke!” Hüyange Youngwanpa shongmokpa Jebuslan Aruanah tahnoijing ü-o me yong yange ngoh yangki.

¹⁶David-e yoi mük wangyete nganne leiwante Youngwanpa shongmokpa-a wang hei kahtok nipa me yongyange nge, hüyange I yak me yanglow ja Jerusalem tangme noyange nge. Hüwante David hüyange lwngmeilan monnye inyange kahtokte sheta khuh ta.

¹⁷Hüyange David te Kahwangte yoppe i, “Kahtalan iyeleilak jingne taowe shonne teipu üje a? Aowe ünu om hüyange yeonge yemeipe ling hatüowa tao ngoh nang. Hüpoi tüolan nyeeha lan-e, iman-e hanghe ümeng lingpu? O Youngwanpa Ü-Kahwang, taowe nangte yoppe tongnang, nang yak ü-phei tüi-e hüyange tenok tangme hüng tamtüoh; hüyange nang kahtalan yintampha.”

¹⁸Hüwante Youngwanpa shongmokpawe Gad te, David-e Youngwanpa tangte Jebuslan Araunah tahnoijing te onge wümjong ja lingtüoh hüyange tüote ongtüoh she David te ngaowe tamlak jingne i.

¹⁹Tüokhei Youngwanpa min me Gad-e ngaowe tampu ngao me David yayonge ong.

²⁰Tüoken tahnoijing nyoi me Araunah hüyange I halan naoshe peli wheat tah noiye ngoh, hüyange aope iman-e wangdang shongmokpa nge, I hayimlan phette yan hüyange lo;

²¹Ahngpa David iman shongte owe peipu ngepu phei jamshe Araunahwe tahnoijing tüohyange phette yu, hüyange kahtokte I sheta khuh tayange salam pha.

²²Hüwante David-e Araunahte i, “Leamdak peipu laklak nanjingne, Youngwanpate wümjong ja wetamlak jingne, nang tahnoijing nyoi üte yüopha. Taowe nangte tüopa jingne ümee wange yahpha ning.”

²³Hüwante Araunahwe Davidte i, “Yayah, Nang Üyongpa Ü-nokpu ahngpawe I sheshao me hanghe meinang she teih hatüo lingtüoh; leihuyah, jakke dolak jingne mahu, hüyange han üne tahte heappu leng, hüyange hahying do ne yahlak jingne wheat tah taowe phanang. Taowe tüolan khongkümpu phanang.”

²⁴Hüpoi David ahngpawe Araunahte i, “Yeje, hüpoi taowe hatüo ümee khakshuwe phawe shaklak; hanghe nang jing ne ngoh nang Youngwanpa jingne taowe yeyahlak, yejema-a taowe hanghe ümee-o yenangpe jakke dopu yephalak.”

²⁵Tüokhei David-e Aruanahte tahnoijing jingne hon ngin ükhüw gho wok tokke pha.

²⁶Hüyange tüoken me David-e Youngwanpate wümjong ja ling hüyange jakke dopu hüyange chingmei dopu pha; hüyange Youngwanpate nyik, hüyange Iye jakke dopu tangme wang mepu vün peiye jan.

²⁷Hüwante Youngwanpawe shongmokpa te I yanglow shankhong me leplak jingne ngaowe tam; hüyange shongmokpawe hüke ling.

²⁸Tüohipak me, aope David-e Jebuslan Araunah tahnoijing me Ite Youngwanpawe jan nang she shinge ok; Iye yoi toidopu tüopa tangme pha.

²⁹Hangjingne Youngwanpate khümpu nyenok hanghepa Mosawe phaonyu jong me ling, hüyange jakke dopu, wümjonga tüopa hipak me Gibeon me khümjing nyoi me ngoh yangki;

³⁰hüpoi David-e tüopa tangme Kahwangte tonglak jingne yetai ok, hangjingne Iye Youngwanpa shongmokpa yanglowte nyampu ngoh yangki.