Read Konyak Naga 1 PUTAHPANGAO 22 Bible Online

1 PUTAHPANGAO 22 - Konyak Naga bible

1 PUTAHPANGAO 22

¹Tüokhei David-e i, “Tüome Youngwanpa Kahwang nok ngohlak yang hüyange tüome Israel jingne jakke dopu wümjong ngohlak yang.”

²Hüyange Israel kahtok me ngohpu yinhulan khongkümpu jemlak jingne David-e ngaolan pha; hüyange Kahwang nok welak jingne Iye long paipalan long toi me, hüyange ülao lan-a ülao toishao me tam.

³David-e üne-o Peten taküplan jingne hüyange long hüplak yanlag jingne yan wangman-e yo, hüyange shakphan yan-o tokke leine ye-oklak ne tümme tam;

⁴hüyange cedar pekhüw yeyah kümlak ne tümme tam; hangjingne Sidon hei Tyre lan-e cedar pee üngang David tangte yah pei.

⁵Hüyange David-e i, “Üha Solomon naoshe ja hei hüyange toishao me juteih manwangpu; hüpoi Youngwanpa jingne khümjing welakne ngohpuwa jamloi nying-hawe wang ngoiye, hüyange kahtoknyu me ütahpa ne hüyange müktishiwa-e welak wongpong; tüokhei taowe tüopa jingne tümme talak.” Tüokhei David-e I manlipe muh toinan üngang, tümme yo.

⁶Tüokhei Iye Iha Solomon te nyik hüyange Youngwanpa Israel Kahwang jingne khümjing ja welak ngaowe tam.

⁷David-e Solomon te i, “Ü-ha, Youngwanpa Ü-Kahwang min me khümjing ja welak ü-mong jang me ngohyangki.

⁸Hüpoi Youngwanpa ngao ü-tangte peiye i, ‘Nange iy yeonge shai hüyange wehok üyong loishe hokyangki; nange ü-min jingne khümjing ja yewelak yang, hangjingne nange ü-sheshao me iy nangjange kahtokte shaiyangki.

⁹Leihuyah, nangte netan ha ja puh tamlak; I chingmei kahta ja ne menglak; hüyange I neikon-e ngohpu wepalan kümpu mepu Taowe Ite chingmei phatamlak; hangjingne I min Solomon she nyiklak, hüyange Taowe I hipak me Israel te chingmei hüyange toloimeipu phalak.

¹⁰Iye Ü-min jingne khümjing ja welak. I üha ne menglak, hüyange Tao Ipa ne menglak; hüyange Israel me Taowe I ahngpa shotjing jintepu jingne linglak.’

¹¹(David-e yelakpe ngaowe i) Sha-a ü-ha, Youngwanpa nang phei ngohtüoh, hüyange nang jeng ngaopu ke, nang moiman pheipupa ne mengtüoh, hüyange Youngwanpa nang Kahwang khümjing wetüoh.

¹²Hüyange Youngwanpawe, hüke aope Iye nangte Israel tang me woilak jingne tamlakei, nange Youngwanpa nang Kahwang ngaokhüm jonne oklak ne nangte konwong hüyange okkeshangpu phatamshih.

¹³Nange nyanpu ngaokhüm hüyange linglak ngaokhümlan hanghepa Israel jingne Youngwanpawe Mosate phawe tam hatüo kentinge jonma-a hüwante nang moimanlak. Monghah yah, hüyange wong nang yah. Tahnyam; mongshoiye tah teih.

¹⁴Shaoshi yateng üyong phei Youngwanpa khümjing jingne hon tok delüm nyippu tok (gee) haja gho ja, khüm tok delüm nyippu gee million ja, shakphan yan hüyange ülao yan ye-it oklak ne taowe yah jemteki, hangjingne hatüowa wangman-e ngoh nang; pekhüw hüyange long-o taowe yah angteki; tüolan tokte nange paowe tamlak yang.

¹⁵Nang me toi lingpalan üngang ngoh nang: long khüwpalan, long ai jonpalan, pee aijonpalan, toi ülam lili khongkümpu jingne ümük pheipu ye-i-kümpe,

¹⁶hon, khüm, shakphan yan, hüyange yan jingne ngohnang. Sha-a toikong wangtüoh, hüyange Youngwanpa nang phei ngohtüoh.”

¹⁷David-e üne-o Israel woipalan khongkümpute Iha Solomon te jamlak jingne ngaolan pha.

¹⁸Iye i, “Numan Kahwang Youngwanpa numan phei ngoh yangki, hüyange üshei ye me Iye numante chingmei pha. Iye kahmük me ngohpalan ü-yak me phünne pha; hüyange Youngwanpa hüyange I kahtalan sheshao me kahmük-a shotte ye-e ngoh nang.

¹⁹Sha-a Youngwanpa numan Kahwang numan mongjang üsheiye hüyange numan yaha üsheiye shaoshan tüoh. Khümjing we ne ükong wangtüoh, hümme nakshih Youngwanpa jiengjeppu ghonu hüyange Kahwang jing üjao wan hei shenglan Youngwanpa min jingne wepu nok ja me yah inne angpu oklak.”