Read Konyak Naga 1 PUTAHPANGAO 23 Bible Online

1 PUTAHPANGAO 23 - Konyak Naga bible

1 PUTAHPANGAO 23

¹Aope David wu khangteiye ngoh, Iye Iha Solomon Israel tangme ahngne menge tam.

²Ahngpa David-e Israel woipalan, hei ngengpalan, hüyange Levilan khongkümpu jem ne tam,

³Levilan wangpeng delüm hüyange ütokye iye lei, hüyange khongkümpu shangtoi kahta haja delüm me tet ngoh yangki.

⁴“Tüolan yo me haja da me peli-a, Youngwanpa nok toishao me yak jongpalan ne menglak, haja wok wanglam lamlak hüyange kahpalan ne menglak,

⁵haja peli peten yomlak, hüyange haja peliye kongtoilan phei Youngwanpate minyong phalak jingne,” she David-e toishao tam.

⁶Iman puhu kih-e David-e Levilan ükhong lümne tam: Gershon, Kohath, hüyange Merari.

⁷Gershon me naoshe ni ngoh: Ladan hüyange Shimei.

⁸Ladan me naoshe lüm ngoh: Jehiel, Zetham, hüyange Joel.

⁹Shimei me naoshe lüm ngoh: Shelomoth, Haziel, hüyange Haran. Tüolan-a Ladan üpa huyim üshanglan ne ngoh yangki.

¹⁰Shimei me naoshe peli ngoh: Jahath, Zina, Jeush, hüyange Beriah.

¹¹Jahath-a ütahpa ne ngoh, hüyange Zina nishepupa; hüpoi Jeush hei Beriah hayim meiyange yenangpe ngoh, tüokhei iman-a puhu ja huhayimlan kih-e shangtoi ipu me om.

¹²Kohath me naoshe peli ngoh: Amram, Izhar, Hebron, hüyange Uzziel.

¹³Iha jeiyongpa Amram-a Aaron hei Mosa ni üpa ne ngohyangki. Aaron hüyange Ihuhayim lan-e Youngwanpa sheshao me jin jintepu jingne sünyet jaklak jingne, hüyange jintepu jingne I min me moiman phalak pa jingne, shejaopupa toinan phünne phalak jingne Aaron yanne ang.

¹⁴Hüpoi Kahwang kahta Mosa hayimlan-a Levi nokphong yo me om.

¹⁵Mosa me naoshe ni ngoh: Gershom hüyange Eliezer.

¹⁶Gershom hayimlan yo me woipa-a Shebuel ngohyangki.

¹⁷Eliezer me naoshe ja hei ngoh Rehabiah, hüpoi Rehabiah me huhayim maawe ngoh yangki.

¹⁸Kohath üha naolipa Izhar me naoshe ja Shelmomith she minpu ngoh, iman puhu me I üshang ne meng.

¹⁹Kohath üha lüm shepupa, Hebron me naoshe peli ngoh: Jeriah, Amariah, Jehaziel, hüyange Jekameam.

²⁰Kohath üha peli shepupa Uzziel me naoshe ni ngoh: Maika jeiyongpa hüyange Isshiah nishepupa.

²¹Merari me naoshe ni ngoh: Mahli hüyange Mushi. Mahli me-o naoshe ni ngoh: Eleazer hüyange Kish.

²²Hüpoi netan naha yenangpe sheko hayim shaha tüohyange Eleazer li. Ihayima jamshepu Kish hayimlan-e yah.

²³Merari mepu naolipa Mushi me naoshe lüm ngoh: Mahli, Eder, hei Jeremoth.

²⁴Tüolan-a Levi huhayim puhu hüyange nyahtaplan ngoh nang, iman moilan-e yoi yoi min nyan. Wangpeng da hüyange tüo tok tepu I huhayimlan liliye Youngwanpa khümjing me toi linglak meitam ngoh yangki.

²⁵Hangjingne David-e i, “Youngwanpa, Israel Kahwang, yoi kahtalan te chingmei pha; hüyange I Jerusalem me jin jinte ngohnang.

²⁶Tüokhei shaaji Levilan-e khümjing nyenok yejema-a tüome pu toinan yoppe khümwante jonpu hango yah yange yekemlak.”

²⁷David-e ükümpa ngao me ngaowe tampuke, aope iman wangpeng da ngoi, Levilan khongkümpuwe shaoshanlak jingne iman min nyan.

²⁸Hüyange tüolan toishao linglak jingne nyinge tam; “Khümjing yoppe khümpu me Aaron mepu ngaipu ngengpalante jamlak, longkon mong hüyange tüopa mepu tüplan te paowe tüklak, hüyange üjao toishao jingne jonne paipu khongküm yenu yeshakpe anglak jingne;

²⁹hüyange Kahwangte dopu an, hahying dopu phawantepu anhüng, do yenyütpu anhüng, lingyang phei an dopu, hüyange olive minnga phei nyütpu an te namnolak jingne; hüyange khümjing me dopu phapu itte shem-e tokke leilak jingne;

³⁰hüyange napjeih yajeih she Youngwanpate minyong phawe müktishiwa tamlak jingne,

³¹hüyange hangkih tingme Youngwanpate dopulan Sabbath me, Lela mo me, hüyange ülao mo tappu jakke dolakei namnolak jingne. Hipak lep iye tüopa khakshuwe linglak Levilan jingne nyanpu ngaokhüm ling. Levilan-e hipak khakshuwe Youngwanpa te yoppe khümlak toishao tam.

³²Hüke iman-e jemjing nyenok hüyange khümjingte namnolak, hüyange Youngwanpa nok mepu toishao jingne, hüyange iman jeiheinao Aaron mepu ngaipu ngengpalante jam-e ponglak jingne tam.”