Read Konyak Naga 1 PUTAHPANGAO 26 Bible Online

1 PUTAHPANGAO 26 - Konyak Naga bible

1 PUTAHPANGAO 26

¹Levilan aoyin khümjing yomlak jingne le, iman toishao tüolan te tampu ngoh yangki. Asaph nyahtap mepu Korah puhu Kore üha Mashelemiah.

²Ime naoshe nyit ngoh yangki, jeiyongpa me wange hüke ngenang: Zekharia, Jediael, Zebadiah, Jathniel,

³Elam, Jehohanan, hüyange Eliehoenai:

⁴Üne-o Obed Edom te hayimlan naoshe tet ngoi-e moiman tampu yome, jeiyongpa me wange hüke nge nang; Shemaiah, Jehozabad, Joah, Sachar, Nethanel,

⁵Ammeil, Issakhar, hüyange Peullethai.

⁶Obed Edom üha jeiyongpa, Shemaiah me naoshe wok ngoh: Othni, Rephael, Obed, Elzabad, Elihu, hüyange Semaciah.

⁷Iman yeonge okkeshangpu kaiye iman puhu me iman-a yeonge min ngai kahtalan ne ngoh yangki; ünyei ne ükümpa ni me hünghao ünyei ngoh yangki.

⁸Obed-Edom noksa mepu tüopa toishao jingne wangngoiye okkeshangpu kahta khongkümpu dewok phei me ni ngoh yangki.

⁹Meshelemiah noksa mepu wange ngoipu kahta penme tet ngai.

¹⁰Merari puhu mepu Hosah, ao me naoshe peli ngoh I ngoh yangki: Shimri (I, jeiyongpa ne yejeyapoi Ipawe woipa ne I menge tam,)

¹¹Hilkiah, Tabaliah, hüyange Zekharia. Khongkümpu yo me khümjing yompalan ne Hosah noksa mepu kahta pen me lüm ngoh.

¹²Tüolan-a khümjing yompalan tampu, hüyange iman kahta üshanglan-e linglak toishaolan, hüke iman jeiheinao lan-e lingpuke, Youngwanpa nok me shaoshan-e ngoh yangki.

¹³Hüyange iman-e noksa phe mepu, üjoipa hei ükhong üyongpa tampu yenangpe, peten hanghepa me shulak phongyeng.

¹⁴Heongye peten jingne phongyengpu te Shelemiah te hüt. Iman-e üne-o Iha Zekharia aowe hipak lep iye juteih ümei phawe ok I jingne phongyeng hüyange apyekao peten jingne hüt.

¹⁵Obed-Edom jingne shüpwante heyekao peten hüt, hüyange I halan jingne shüpwante bung yomlak ne hüt.

¹⁶Shuppim hüyange Hosah ni jingne henyip ye peten hüt hüyange ütokpa lamnyu me Shalleketh peten. Yomlak jingne hipak ityange ja phei me ja japhei me ja she tamyange yong.

¹⁷Nyihjeih she, heong yekao me yompalan wok, apyekao me peli, hüyange heyekao me peli. Nyihjeih she bung yomlak jingne yompalan peli, bung tüp lep ipu jingne nipong.

¹⁸Henyip yeme pemsheam jingne lamnyu me peli, hüyange pemsheam me ni.

¹⁹Tüolan-a Korah puhu hüyange Merari puhu yo me peten yompalan tampu ngoh yangki.

²⁰Iman phei jamshepu ülao Levilan ngin angnyoi hüyange Kahwangte hünghao ne jaowe tamyangpu angpu nyoite yakjonge leipa ne ngoh.

²¹Ladan, Gershon hayim yo me ja-a, Iha Jehiel noksa-o om-e, noksa ükhonglan maapu pajeiyong ne meng.

²²Ladan hayim ülao naoshe ni, Zetham hei Joel, khümjing ngin angnyoi hüyange bung tepu yakjongpa ne meng.

²³Amram, Izhar, Hebron, hüyange Uzziel huhayimlante toishao tamyangki.

²⁴Mosa üha Gershon puhu mepu Shebuel, khümjing ngin angnyoi yakjongpa ütah ne ngoh yangki.

²⁵Gershon ünao Eliezer kaiye I-a Shelomith phei pune ngoh. Eliezer-a Rehabiah üpa, ao Jeshiah üpa ne meng, Joram üpa ne, Zichri üpa ne, Shelomith üpa.

²⁶Tüopa Shelomith hüyange I jeiheinao lan-a phünne phapu hünghaolan hanghe David ahngpawe hüyange puhu hei nyahtap tepu woipa ütahpalan ne hüyange haja hei gho tangme woipalan ne, hüyange wetaipalan ükhong woipalan ne, jaowetam-e phapu hünghao khongkümpu tangme yak jongne menge ngohyangki.

²⁷Shapju me nyieyahpu mepu iman-e Youngwanpa nok wongpong jingne jaowe tamyange pha.

²⁸Üne-o hipa Samuel, Ahngpa Saul, Ner üha Abner, hüyange Zeruiah üha Joab lan-e jaowe tam-e phapu hünghao khongkümpute Shelomith hüyange I noksalan-e yakjongpane menge lei.

²⁹Izhar huhayim mepu Kenaniah hüyange I hayimlan-a Israel ülao toishaolan jingne woipalan hüyange kahpalan ne le.

³⁰Hebron huhayimlan mepu, Hashabiah hüyange I phei pulan haja ja phei me gho nyit minngai kahtalan-a Jordan yengyin henyip yekao me Israel me Youngwanpa toishao khongkümpu jingne hüyange ahngpa toishao shanlak jingne ngoh yangki.

³¹Hebron huhayimlan me woipa-a Jeriah ngoh yangki. David ahng ne menge wangpeng deli shepupa me Hebron huhayim jaalunpu teiyam-e tongwante iman yo me wong shenangpu okkeshangpu kahtalan Gilead yikengpong me Jazer me nyoipu tüo.

³²Ahngpa David-e Jeriah phei pulan iman puhu mepu Üshanglan kahta haja ni phei me gho nyit leyah, hüyange iman-a Jordan yeng heong yekao Reuben, Gad, hüyange Manasseh heongye yikenglan me Israel me Youngwanpa toishao khongkümpu jingne, hüyange ahngpa toishaolan shao shanlak jingne ange tam.