Read Konyak Naga 1 PUTAHPANGAO 27 Bible Online

1 PUTAHPANGAO 27 - Konyak Naga bible

1 PUTAHPANGAO 27

¹Hatüowa Israellan aoyin nyahtap me hüyange puhu me woipalan hüyange ahngching me toilinge shaoshan iman üyonglan üshang ngoh nang. Wangpeng me lekeng lep iye lekeng ja jingne woipa ja phangme kahta haja da me peli pong yoi yoi ükhongne shaoshanpu me ngoh.

²Zabdiel üha Jashobeam-a üwangpa ükhong, üwangpa leat tepu yakjongpa; I phangme kahta haja da me peli;

³Iya Perez puhu mepu hüyange üwangpa leat tepu nyahpong üjupalan khongküm tepu üshang.

⁴Nishepupa leat yakjongpa-a Ahohilan Dodai. I ükhong me üshangpa-a Mikloth. I phang me kahta haja da me peli.

⁵Lümshepupa leat me lümshepupa nyahpong woipa-a Jehoiada ngengpa üha Benaiah. Iya üshang hüyange I phang me kahta haja da me peli.

⁶Iya Delüm yo me ütahpa ja. Iman ükhong tang me I ha Ammizabad yakjongpa ne meng.

⁷Pelishepupa leat jingne, pelishepupa-a Joab ünao Asahel; Iha Zebadiah-a I nanleipa ne mengyangki. I phang me kahta haja da me peli.

⁸Nga shepupa leat jingne, nga shepupa-a, Izrahilan woipa Shamhuth. I phang me kahta haja da me peli.

⁹Wok shepupa leat jingne, wokshepupa-a, Tekoa mepu Ikkesh üha Ira. I phang me kahta haja da me peli.

¹⁰Nyit shepupa leat jingne, nyit shepupa-a, Pelon mepu Ephraimlan Helez. I phang me kahta haja da me peli.

¹¹Tet shepupa leat jingne, tet shepupa-a, Hushatlan mepu Sibbecai, Zerah puhu mepu. I phang me kahta haja da me peli.

¹²Tu shepupa leat jingne, tu shepupa-a Benjamin nokphong yikengpong Anathoth mepu Abiezer. I phang me kahta haja da me peli.

¹³Pen shepupa leat jingne, pen shepupa-a Zerah puhu mepu, Netophah mepu Maharai. I phang me kahta haja da me peli.

¹⁴Penmeja shepupa leat jingne, penme ja shepupa-a, Ephraim nokphong yikeng pong Pirathon mepu Benaiah. I phang me kahta haja da me peli.

¹⁵Penme ni shepupa leat jingne, pen me ni shepupa-a, Othniel huhayim Netophah mepu Heldai. I phang me kahta haja da me peli.

¹⁶Hatüowa Israel nokphonglan yo me wanglam lampalan min ngohnang: Reuben tangme - Zichri üha Eliezer Simeon tangme - Maacah üha Shephatiah

¹⁷Levi tangme - Kemuel üha Hashabiah Aaron tangme - Zadok

¹⁸Judah tangme - Elihu, ahngpa David ünao yome ja Issakhar tangme - Mikhael üha Omri

¹⁹Zebulun tangme - Obadia üha Ishmaiah Naphtali tangme - Azriel üha Jeremoth

²⁰Ephraim tangme - Azaziah üha Hoshea Henyipye Manasseh tangme - Pedaiah üha Joel

²¹Heongye Manasseh tangme - Zekharia üha Iddo Benjamin tangme - Abner üha Jaasiel

²²Dan tangme - Jeroham üha Azarel. Tüolan-a Israel nokphong me woipalan.

²³Ahngpa David-e wangpeng da ümaiye kahtalan-a shangtoi ye i; hangjingne wangdang me shanhalan hangshin ngoh teshin-e Israel ngaitamlak Youngwanpawe jan.

²⁴Zeruiah nyuyong üha Joab-e shangtoi ine wang, hüpoi Iye hatüo yeshope tüoh. Tüopa shangtoi ipu nanjingne Kahwange Israel te shange pongpu pha; tüokhei Ahngpa David putahpangao nyan-e angpu me tüopa jeng ükümpa ngoiye nyanyange yenang.

²⁵Hatüowa ahngnok toinyu nanha tangme wanglam lampalan min: Ahngnok toinyu nanha angpu nyoi me: Adiel üha Azmaveth, Ükhongjing toinyu nanha angpu nyoi me: Uzziah üha Jonathan,

²⁶Kahhampalan tangme: Chelub üha Ezri,

²⁷Wuwünglick pesha te: Ramah mepu Shimei, Wuwüngti yüopute: Shepham mepu Zabdi,

²⁸Olive hüyange yengphuk tangme (henyipye kahtang yashong me): Geder mepu Baal Hanan, Olive minnga yopute: Joash,

²⁹Sharon kahjee (hahnyoi) me tampu yinmok te: Sharon mepu Shirtai, Kahjeelan me tampu yinmok te: Adlai üha Shaphat,

³⁰Udhlante: Ishmatlan Obil, Gado te: Mermonoth mepu Jehdeiah, Nyee hei younlante: Hagritlan Jaziz,

³¹Tüolan khongkümpuwa David ahngpa moth tang me shaoshanpalan ngoh yangki.

³²David Ipajoi Jonathan, okkeshangpu kahta ja hüyange manyangpu kahta ja, juteih ümei phapupa ja ne ngoh yangki; I hüyange Hacmoni üha Jehielwe ahngpalante shinge manpa ülam nyüo.

³³Ahngpate juteih ümei phapupa-a Ahithophel ngoh yangki, hüyange Arkitlan Hushai-a ahngpa shümpa hüyange teitahpu konphapa ne ngoh yangki.

³⁴Ahithophel li phei me Benaiah üha Abiathar hüyange Jehoiada juteih phapalan ne meng. Ahngpa nyahponglan tangme woipa ne Joab ngoh yangki.