Read Konyak Naga 1 PUTAHPANGAO 28 Bible Online

1 PUTAHPANGAO 28 - Konyak Naga bible

1 PUTAHPANGAO 28

¹Jerusalem me Israel woipalan khongküm, nokphong woipalan ahngpa shaoshanpalan yoi yoi ülamtepu woipalan, haja tangme woipalan, ghoja tangme woipalan, ahngpa hüyange Ihayimlan toinyu nanha hüyange tampu yinmoklan tangme yakjongpalan, ahngnok woipalan, wong nangpu kahtalan, hüyange kongyang phei naomeilan jam she David-e jem ne tam.

²David iman sheshao me yong hüyange imante ngaowe i: “Ü-kahtalan, üte jai pha. Teman Kahwang Youngwanpa yashopjing, jiengjeppu ghonu jinte anglak nok taowe wehunangki. Ite wangshüm hüowe khümjing ja welak jingne taowe tümyangki.

³Hüpoi Kahwange üte i, Ü-min jingne nange nok ja yewelak, hangjingne nanga naomei hüyange iy shaiyangki.

⁴Tüoyangpoi Youngwanpa Israel Kahwange Israel tang me jinte ahngne menglak jingne üpa nok mepu tao le: woipalan ngaitamlak jingne Iye Judah nokphong le, hüyange Judah yo mepu Iye üpa noksa le ngai. Hüyange Judah nokphong me hüyange üpa nokphong, hüyange üpa hayimlan yo mepu Iye Israel üshei tangme ahngne menglak jingne Iye üte meiye lei.

⁵Iye üte naoshelan maawe puhtam, hüyange iman yo mepu Iye ü-ha Solomon Israel tangme Youngwanpa ahngching ahngpa shotjing me shotlak jingne le.

⁶“Youngwanpawe üte i, ‘Ü-nok hüyange ü-ngao phünpu nok welakpa-a nangha Solomon ne menglak, hangjingne Taowe I-a ü-ha ne menglak jingne leyangki, hüyange Taowa Ipa ne menglak.

⁷Iye taowe ngaowe tampulan hüyange linglak ngaokhümlan yelakpe tenyihpu kih-e jonne ngohma-a, Taowe I ahngching jintepu jingne lingne tamlak.’

⁸“Sha-a tüojing üne, Youngwanpa Bangjem me, Israel üshei sheshao me, hüyange teman Kahwange jaiye taowe numante ngaowe tamnang, Youngwanpa numan Kahwange nyinge tampulan khongküm jontüoh hüyange yam-e tüotüoh; hümme nakshih numan-e tüopa kahtok ümei-a yahpu oklak; hüyange numan phei me jintepu jingne numan hayimlan te mothlei lak jingne tüohpu oklak.

⁹“Hüyange nang, Ü-ha Solomon, nangpa Kahwang shingyah, hüyange mongjang khongkümpuwe hüyange hoongli mong ongpu phei I shaoshan tüoh she taowe nangte ngaowe tamnang; hangjingne Youngwanpawe mongjang yamnang, hüyange Iye teman-e teihpu juteih hüyange teman-e lahnyikke teihpu shingnang. Nange I yama-a nange I tüolak; hüpoi nange I winne tüohma-a, Iye nang jintepu jingne winne tüoh phalak.

¹⁰Youngwanpawe I üjao khümjing welak jingne nang letepu she nange shinglak yang. Sha-a lingne wangtüoh hüyange hatüowa monghah puphei lingtüoh.”

¹¹Tüophei me David-e Iha Solomon te khümjing hangke welak tümpu, hüyange nokmonglan, toinyu nanha anglak nyoi, ülao nyoijinglan, hüyange ümongpa üjao nyoi, ümeken me ünu winpu ok khongküm lingpu pha,

¹²Iye üne-o Youngwanpa nok me gho nyoi jingne I mongjang me ngohpu tümmetapu khongküm, tüopa neikon-e ngohpu tüolan, Kahwang nok me dojing nyoi, hüyange jaowe tam-e phapu dojing nyoi tümpu pha.

¹³David-e üne-o Ite ngengpalan hüyange Levilan toishao jingne itte shempu, hüyange Youngwanpa nok me shaoshanpu toishao khongküm; Youngwanpa nok me jonlak wanhei sheng khongkümpu jingne pha.

¹⁴Iye üne-o wan hei sheng linglak jingne hon hei khüm tok hangshinpong yahlak;

¹⁵Vüntük lili me hüyange vüntük yongjing jingne hangshin yahlak,

¹⁶Kahwang sheshao me angpu an jingne khao lep ipu me hon tok hangshin, khüm khao jingne khüm hangshin,

¹⁷hüyange meite tüplak tüpshan jingne hon shaha, yankhong hüyange sheng hon yankhonglan jingne hüyange tüopa lep ipu me tok hangshin; khüm yankhong hüyange tüopa lep ipu me tok hangshin;

¹⁸jaowe tamyang phei honne lingpu sünyet jaklak wümjong jingne, hüyange tüopa tokpu, üne-o Youngwanpa jiengjeppu ghonu cherubim yangteng saayange hüyange küpyange ngohpu cherubim hon tongtoi jingne Iye lingyange angpulan pha.

¹⁹Ahngpa David-e i, “Tüolan khongküm Youngwanpa yak mepu tüopa jeng nyanpu kaiye Iye shemei she shingne tam, hüke toishao lili Iye hanghe itte shem-e tam linglak jingne üte pha.”

²⁰Hüwante David Ahngpawe Iha Solomon te i, “Mong hahyah, hüyange mongyonge teihyah. Toikong wangtüoh hüyange hanghe-o nang toishao lakne tah tam. Youngwanpa Kahwang aohite taowe shaoshan nang, I nang phei ngohlak. Youngwanpa nok toishao khongküm mansho mansho Iye nang ye-angtüoh lak, yejema-a nang yewinlak.

²¹Hüyange leihuyah, Kahwang nok me toishao lili jingne ngengpalan hüyange Levilan yoi yoi toishao me tamyange ngohnang; hüyange nang phei toishao lili me monge teihpu kahta lili ao hanghepa toishao jingne üpong tüowe ngohnang I omme ngohkülak; üne-o woipalan hüyange kahta lili noshepu nange woipu phang me ngohkülak.”