Read Konyak Naga 1 PUTAHPANGAO 29 Bible Online

1 PUTAHPANGAO 29 - Konyak Naga bible

1 PUTAHPANGAO 29

¹Ahngpa David-e jem-e ngohpu ükhongte shingne tam-e i, “Solomon-a ü-ha, Kahwange leye ngaipu ja ngohnang, hüpoi I-a naoshe ha hüyange juteih manwangpe ngohnang. Linglak toi-a toinyu ja ngoh nang, hangjingne hatüowa kahtalan jing ahngnok ne yeje, hüpoi hatüowa Youngwanpa Kahwang Khümjing.

²Tüokhei Ü-Kahwang nok jingne, taowe okpu shinne toinan yahteki, hon toishao jingne hon, khüm toishao jingne khüm, shakphan yan toishao jingne shakphan yan, yan toishao jingne yan, pee toishao jingne pee; tüopa tokte kaiye onyx (shuthün) hüyange yajenth jingne long üngang, hase ülam lili, toinyu long ülam lili, hüyange phutti long yahteki.

³Tüolan tokte kaiye taowe ü-toinyu nanha ne angpu üjing hon hei khüm, taowe ü-Kahwang nok jingne taowe ü-mongjang lanshe phapu jingne taowe hatüo ü-Kahwang nok te phanang.

⁴Shemeipupa hon tok delüm nyippu gee haja lüm, hüyange shejaopupa khüm tok delüm nyippu gee haja nyit, khümjing jant te pholak jingne,

⁵hüyange yak ai manpalan-e linglak toishao khongkümpu jingne, hon hei khüm yoi yoi toishao jingne. Hüma-a aowe mongongpu phei yoi nying nyingke tenyih Youngwanpate phünne phalak?”

⁶Hüwante puhu üshanglan-e, nokphong woipalan-e, nyahponglan woipalan-e, hüyange ahngnok toinyu nanha te yakjongpa lan-e ngangpu dopu pha.

⁷Tüokhei Kahwang nok toishao jingne iman-e tok delüm nyippu nginmei gee haja nga, hüyange hon ngin haja pen, tok delüm nyippu khüm gee haja pen, shakphan yan tok delüm nyippu haja pen me tet, hüyange tok delüm nyippu yan gee lakh ja.

⁸Hüyange ao me toinyu longlan ngoh Youngwanpa nok dojing me, Levi puhu Gershonlan Jehiel yak me tüolan-a pha.

⁹Hüwante kahtalan mongmei hangjingne iman-e tüolan-a mongong mongle puphei pha, hangjingne mongjang üsheiye mongong puphei Youngwanpate pha. Hüyange ahngpa David yeonge mongmei.

¹⁰Tüokhei bangjem ükhong sheshao me David-e Youngwanpate minyong pha; hüyange ahngpa David-e i, “O Youngwanpa, toman pajeiyong Jacob Kahwang, jinte üküm yenangpe nang moimanpa ne mengtüoh!

¹¹O Youngwanpa, kheyongpu, hüyange üngan, hüyange müktishiwa, hüyange okpupa, hüyange yihnoonpu üyonga nang jing ngoh nang; hangjingne wangdang me hüyange kahtoknyu me ngohpu khongküm nang jing. O Youngwanpa, ahngchinga nang jing, hüyange üshei tangme nang muh üshangne nowe inne ngoh nang.

¹²Hakke helak hüyange toinyu nanha khongkümpu nang mepu peinang; nange khongkümpu tangme üngan hüyange wong phei wanglam lamnang; hüyange nange üshei üyongne menge wongnange tamlak okke ngoh nang.

¹³Sha-a, toman Kahwang, toman-e nangte minyong phanang, hüyange toman-e nang müktishiwa minyong nang.

¹⁴“Tüoyangpoi tao hüyange ü-kahtalan-e nangte ütingpa me hango phawe yenang, hangjingne ülam lili-a nang mepu hünghao ja hei ngoh nang, hüyange hanghe nangjingne ngoh yangki tüophei toman-e nangte phawe yenang.

¹⁵Hangjingne toman pajeiyonglan kih-e toman nang sheshao me yinpalan hei ngohnang; kahtoknyu me toman jin yashüm ja kih hei tainang, hüyange hango mong hümlak ne yenang.

¹⁶O Youngwanpa toman Kahwang, nang üjaopa min jingne nangte nok ja wetamlak üngang, toman-e shaijem-e angpu tüowa khongküm nang yak mepu hüyange khongküm nang jing hei ngohnang.

¹⁷Taowe shing, Ü-Kahwang, hüke nange moilan mongjang me tokke leinang, hüyange innenyaipu kenmongte mongmei nang; ü-mongjang ütingpa phei tüolan toinan khongküm hoongli mongongpu phei phayangki; hüyange tüome ngohpu nang kahtalan-e hoongli mongonge hüyange mongmei sheiye nangte phapu taowe ngeyangki.

¹⁸O Youngwanpa, toman pajeiyong Abraham, Isaac, hüyange Jacob Kahwang, jintepu jingne nang kahtalan jingne shomme aipu hüyange mongjang me teihpulan tüo kih-e ang tampha, hüyange iman mongjang nang yekao me hüt ne tamtüoh.

¹⁹Ü-ha Solomon te nange ngaowe tampulan, nang sakilan, hüyange nang jing nyan-e angpu ngaokhümlan khongkümpu jonne, hüke taowe tüm-e tüohpuwe Iye khümjinga we oklak wange ngoipu mongjang phatam shih.”

²⁰Hüwante David-e jem-e ngohpu khongkümpute i, “Numan Kahwang Youngwanpa te minyong tüoh!” Hüyange jem-e ngohpu khongkümpuwe iman pajeiyong Kahwangte minyong pha, hüyange iman sheta khuhta, hüyange Youngwanpate khüm, hüyange ahngpa te-o wangshüm hüo.

²¹Üne nyih iman-e Youngwanpate jaowe tam-e toidopu yinmok toi, hüyange kahtalante hahlak jingne pha. Tüotok te paowe iman-e mahu üpong haja ja, nyeepong haja ja, hüyange nyeeha haja ja, toiyange no shepu iman-e wümjong me jakke do. Iman-e üne-o dolak jingne wuwüngti yah pei.

²²Tüokhei tüopa nyih-a iman-e Youngwanpa sheshao me hoongli mongong üyong puphei hah hüyange ying. Hüyange iman-e David ahngpa üha Solomon ün nishepupa ahngne menge tampu üngwün, hüyange iman-e Youngwanpa jingne I woipa ne le, hüyange Zadok ngengpa ne mengetam.

²³Tüokhei Solomon, Ipa David nanleiye Youngwanpawe linge tampu ahngching me shot. I okkeshangpu ahngpa ne meng, hüyange Israel jat khongkümpuwe I ngao jai.

²⁴Woipalan khongküm hüyange nyahponglan hüyange üne-o David hayim ülaolan khongküm puwe Solomon ahngpa te wangshüm hüowe I peitüp phang me ngohlak jan.

²⁵Hüyange Youngwanpawe Israel khongküm pu sheshao me Solomon yeonge yongne tam, hüyange Ite phapu kih-e I sheshao me Israel me aohi ahngpa te-o ahngpa wangshüm üyong yepha.

²⁶Hüke Jesse üha David-e Israel khongkümpu tangme ahngne meng,

²⁷Iye Israel tang me wangpeng deli ahngne meng, Hebron me I wangpeng nyit ahngne meng, hüyange Jerusalem me wangpeng delüm me lüm ahngne meng.

²⁸Tüophei me I wu-khang teiye, hak yange hüyange iyeshepu phei li; Hüyange Iha Solomon I nanleiye ahngne meng.

²⁹Ahngpa David pungao üwang mepu üküm ngoiye hipalan lüm-Samuel, Nathan, hüyange Gad putahpangao nyanpu laitep me ngohnang.

³⁰Tüopa nyan-e angpu me hangke Iye wanglam lam, I hangshin wongnange ngoh, hüyange Ite ngaipu jeng khongkümpu, Israel te ngaipu, hüyange neikon-e ngohpu ahngching lante ngaipu jeng inang.