Read Konyak Naga 2 PUTAHPANGAO 10 Bible Online

2 PUTAHPANGAO 10 - Konyak Naga bible

2 PUTAHPANGAO 10

¹Rehoboam Shekhem te tai, hangjingne Israel khongküm I ahngne menge tamlak jingne Shekhem me jem-e ngoh.

²Aope Nebat üha Jeroboam, aowe ahngpa Solomon te nyam-e Egypt me taiye ngoh, Iye tüopa ngaolan jaiyange, I nokte leih ye.

³Hüyange apyekao jatlan mepu kahtalan-e Ite nyiklak jingne shon; hüyange Jeroboam hei Israel jemme ngohpalan khongkümpu pei ngoi, hüyange iman-e Rehoboam te ngaowe i,

⁴“Nangpawe tomante yihpu sheam me paine tam; tüokhei nangpa toishao üwan hüyange toman tangme Iye paitampu sheam-a, shetan she linge tam pha; toman-e ngaoting iye nang shaoshan ning.”

⁵Rehoboam-e jan-e i, “Tüopa jeng teih nyüolak jingne üte nyih lüm hipak yahkei, tüophei me leih yekei.” Tüokhei kahtalan yanne tai.

⁶Ahngpa Rehoboam-e lwngmeilan phei juteih yam-e teingao, tüolan lwngmei Ipa Solomon üyin ngohwante shaoshanpalan ne ngohyangki. “Tüolan ükhongte janlak jingne hanghe juteih numan-e üte phalak shi?” she Iye tong.

⁷Iman-e Ite jan-e i, “Nange tüolan kahta te kenne jonma-a hüyange iman mongmei ne tama-a hüyange imante ngao mei ngaoma-a, hüwante jinte iman-a nang shaoshanpalan ne ngohkülak.”

⁸Hüpoi lwngmeilan-e Ite hanghe i, hatüo winne tüoh, hüyange naoshelan aoyin Iphei jam she jong, hüyange aoyin I sheshao me yong iman tangte tai, iman mepu Iye hengpu yah.

⁹Hüyange Iye imante i, “Aoyinne üte nangpawe paitampu sheam taanne tamtüoh she i, imante janlak jingne numan ne-o üte hanghe kon phalak shi?”

¹⁰Hüyange naoshelan aoyin Iphei jamshe jong iman-e Ite hüke i, “Nang phei aoyinne ngao nange imante hüke itüoh, ‘Nangpawe toman sheam yihtam hüpoi nange taanne tamtüoh’ she ipalante, ‘Ü-yaklan shonha-a üpa shieng phei nehoi shejeipu she itüoh!

¹¹Sha-a üpawe numan sheam yihtampu ne mengma-a, tüopa me taowe ünyei paowe tamlak, hüyange üpawe numante shetwuwe shaoshine tampu ne mengma-a, taowe numante toshitolaowe shette tamlak she itüoh.’ ”

¹²Tüokhei nyih lüm ngohyang phei me Iye imante ngaowe tampu kih-e, ahngpa Rehoboam tangte Jeroboam hüyange Israel kahtalan khongkümpu leih ye.

¹³Ahngpawe lwngmeilan-e ngaowe tampu ngao yeyah hüyange kahta lante yemeipe ngaowe tam;

¹⁴naoshe lan-e henge tampu kih-e, Iye hüke ngaowe i, “Üpawe numan tang me yihpu sheam paine tam; taowe tüolan-a üne-o sheloi she kitamlak. Iye numante shetwuwe shet; taowe numante toshitolao phei shünge tamlak!”

¹⁵Hatüowa Shiloh mepu Ahijah hipa kaiye Nebat üha Jeroboamte Iye ngaowe tampu ngailak jingne Youngwanpa Kahwange mongpu ngoh yangki. Tüojingne Ahngpawe kahtalante yejai hüyange iman ngao yeyah.

¹⁶Aope Ahngpawe iman ngao yeyah she kahtalan-e nge ok, iman-e hüke üngwün, “David me ükong wange hüyange Inok noksa phei nyoi peiwante, teman jingne iman-e hanghe linge tam ei? Israel kahtalan, yoi yoi nokte yanhah! Rehoboam-e I yoi jingne minlei yah!” Hüke Israel kahtalan-e moppe ngai,

¹⁷hüpoi Rehoboam shaha Judah yikeng pong me nyoipu kahtalan tangme ahngne tüohyange yan.

¹⁸Hüwante Ahngpa Rehoboam-e, toi lingpalan tangme yakjongpa ne ngohpu Adoniram Israellan tangte shon, hüpoi iman-e Ite longe shüppe toi. Hüke ngaipu jingne Rehoboam mamshe I jing pong tongtoi te onge shot, hüyange shaoyinne Jerusalemte leihye.

¹⁹Tüonyih mepu sha-a te ngoiye Israel ahngching apyekao kahtalan-e David huhayim phei we ne mengnang.