Read Konyak Naga 2 PUTAHPANGAO 11 Bible Online

2 PUTAHPANGAO 11 - Konyak Naga bible

2 PUTAHPANGAO 11

¹Aope Ahngpa Rehoboam Jerusalem ngoi, Iye Benjamin hüyange Judah jatlan mepu shemei meipu naomei lakh ja haja detet jamshe nyik-e jem. Hokne tailak hüyange apyekao Israel nokphonglan I phangme angne yah yelak she Iye teih.

²Hüpoi Youngwanpawe hipa Shemaiah te i,

³tüopa ngaolan Solomon üha Ahngpa Rehoboam hüyange Judah hei Benjamin nokphong kahtalante itüoh:

⁴“Numan pheipu Israellan phei tahhok. Numan khongkümpu yoi yoi nokte leih yetüoh. Hanghe ngaiyangki hatüowa ü-mepu ngohnang.” Tüokhei iman-e Youngwanpa ngao jaiyah, hüyange Jeroboam phei hokne yetaipe nokte leihye.

⁵Rehoboam Jerusalem me ngoh, hüyange Judah hei Benjamin yinlak nanjingne tüolan chingnyu chingtuk pepeye ling:

⁶Bethlehem, Etam, Tekao,

⁷Beth-zur, Soco, Adullam,

⁸Gath, Mareshah, Ziph,

⁹Adoraim, Lachish, Azekah,

¹⁰Zorah, Aijalon, hüyange Hebron.

¹¹Iye tüolan-a yeonge monge chingtuk penyu pee, hüyange woipa ümei japong ange tüoh, hüyange moilan me hahying anglak nyoi, olive minnga, hüyange wuwüngti angetüoh;

¹²Iye ree hei ngoulow üyong chingnyu lili me tüoh, hüyange iman yeonge wongnangne tam. Tüokhei Judah hüyange Benjamin-a I phang me ngoh yangki.

¹³Israel üshei yeme ngohpu ngengpalan hüyange Levilan iman ngohpu nyoi mepu I tangte Judah te pei.

¹⁴Levilan-e iman hahnyoi kahmük hüyange iman me nangpulan tüoh, hüyange Judah hei Jerusalem te pei: hangjingne ahngpa Jeroboam hüyange I nanleipalan-e, hüke iman-e Youngwanpa jingne ngengpa toishao yelingtamlak she jange tei.

¹⁵Jeroboam-e ülao kahwanglan jingne, hüyange younpong peshao hüyange Iye lingpu mahu üha peshaolan jingne ülao ngengpalan le.

¹⁶Hüyange aoyinne yoi mongjang me Youngwanpa Israel Kahwang yamlak jingne monge teih, iman Israel nokphong üshei mepu Jerusalemte Youngwanpa iman pajeiyonglan Kahwang tangte shaoshan ne pei.

¹⁷Iman-e Judah ahngching wongnang ne tam, hüyange wangpeng lüm jingne Solomon üha Rehoboam yinne angne tam; hangjingne iman-e wangpeng lüm Ahngpa David hüyange Ahngpa Solomon lamnyu me kem.

¹⁸Rehoboam-e David üha Jerimoth me puhpu Mahalath, ao yha ünyu Abigail Eliab üha hüyange Jesse ühu ne ngoh yoi sheko ne yah.

¹⁹Yhawe Ite netan lüm puhtam: Jeush, Shemariah, hüyange Zaham.

²⁰Yha phei me Iye Absalom yhala Maacah yah, hüyange yhawe naoshe peli puhtam: Abijah, Altai, Ziza, hüyange Shelomith.

²¹Khongkümpu sheiyange Rehoboam me I sheko penmetet hüyange phongphe nyu dewok ngoh yangki; hüyange I-a naoshe da me tet hüyange naoyha dewok üpa ne meng. I sheko hei phongphe nyu üshei yo me Iye Maacahte ünyei sheken she ngoh;

²²hüyange Ihalan üshei yo me yhawe puhpu Abijah te ken, tüokaiye I phei me ahngne menglak jingne leyangki.

²³Hüyange Rehoboam-e kon nangpu phei jon, hüyange Judah hüyange Benjamin kahmük üshei me chingtuk pee peyangpu chingnyulan üshei me Ihayimlan tam-e tüoh; hüyange Iye imante hahying wangman-e pha; hüyange iman jingne shekolan yam-e tam.