Read Konyak Naga 2 PUTAHPANGAO 12 Bible Online

2 PUTAHPANGAO 12 - Konyak Naga bible

2 PUTAHPANGAO 12

¹Aope Rehoboam-e ahngja leye ahngchinga monge hüyange wongnange linge sho, I hüyange I kahtalan khongkümpuwe Youngwanpa ngaokhüm pemei.

²Rehoboam ahngpa wanglam lampu wangpeng nga shepupa me, iman-e Youngwanpa te mong yehümpu jingne, Egypt ahngpa Shishak Jerusalem hahlak jingne,

³pongtongtoi pheipu nyahponglan gho pen me ni, hüyange koipong pheipu wetaipalan haja dewok ong. Hüyange I phei peipulan-a Libyalan, Sukkitlan, hüyange Ethiopialan ipu yekümpe ngoh yangki.

⁴Iye chingtuk pepeyange ngohpu Judah chingnyulan chinghah, hüyange Jerusalem ngoiye chinghah-e pei.

⁵Hüwante hipa Shemaiah Rehoboam tangte hüyange Judah ngeng ahnglan tangte pei, iman Jerusalem me Shishak jengme jemme ngoh yangki, hüyange imante i, “Hüke Youngwanpawe inang, ‘Numan-e Tao winne tüoh, tüokhei Taowe numan Shishak yak me tüohnang.’ ”

⁶Hüwante Ahngpa hüyange woipalan-e iman-e ünu lingyangki she jan, hüyange iman-e i, “Hanghe Youngwanpawe lingnang hatüowa shu nang.”

⁷Aope Youngwanpawe iman nying nyingke mong lüppu nge, Youngwanpa ngao Shemaiah tangte pei: “Iman-e yoi nying nyingke mong lüppe yepu jingne, Taowe iman mahne yetamlak; hüpoi aope Shishak-e iman yahlakei; Taowe imante yintampu phalak, hüyange Jerusalem tangme Shishak yak me ü-mong shihpu üshao ngoiye peine yetamlak;

⁸tüoyangpoi iman Shishak shaoshanpalan ne menglak, tüome nakshih iman-e ü-shaoshanpu hei kahtoknyu wanglam lampalan shaoshanpu yoi yoi shinglak.”

⁹Tüokhei Egypt ahngpa Shishak Jerusalem phei tüi-e ong; hüyange Iye Youngwanpa khümjing mepu toinyu nanha hüyange ahngnok mepu toinyu nanha yah tai. Iye khongkümpu yahtai; Ahngpa Solomon-e lingpu ree lan-o omme yahtai.

¹⁰Tüokhei Rehoboam ahngpawe tüolan nanleiye shakphan yan reelan ling, hüyange tüolan-a ahngnok yompu woipalan yak me angne tam.

¹¹Hüyange hangshin me Youngwanpa nokte ahngpa tailakei, yompalan-e tüolan-a peiye yahtei yange, üne-o yah muh ye-e yompalan nok me angne tamme ngoh yangki.

¹²Hangjingne Iye Youngwanpa sheshao me ünu ümeng janpu jingne, Youngwanpa mongshih ngaipu, hüke I lanshe mahtamlak mepu mahne yetampe yinne tüoh; hüyange Judah yafün meiye muh taiyangki.

¹³Rehoboam-e Jerusalem me wanglam lam hüyange ahngpa ja leye I wong jaalun. Iye wanglam lam-e ükong wangwante wangpeng deli me ja ngoh yangki; hüyange Iye Jerusalem me wangpeng pen me nyit ahngne meng; tüopa chingnyu Youngwanpawe Israel jat hei li üshei mepu I min tüome anglak jingne leyange ngohyangki. Rehoboam ünyuwa Ammon kahtok mepu Naamah ne ngoh yangki.

¹⁴Hüyange Iye ümeng ling, hangjingne Iye Youngwanpa yamlak jingne I mongme yepei.

¹⁵Sha-a Rehoboam toishaolan üwang mepu üküm ngoiye, tüolan-a hipa Shemaiah hüyange Iddo hipa putahpangao laitep me nyanyange ngohnang. Rehoboam hei Jeroboam nipa me wehokpu yelakpe ngoh yangki.

¹⁶Rehoboam li hüyange David chingnyu me ngeng-ahng mangjong me mu; hüyange I ha Abijahwe I nanlei ahngne meng.