Read Konyak Naga 2 PUTAHPANGAO 15 Bible Online

2 PUTAHPANGAO 15 - Konyak Naga bible

2 PUTAHPANGAO 15

¹Kahwang yaha Obed üha Azariah tangte pei:

²I ahngpa Asa phei hüolak jingne ngai tai, hüyange Ite i, “Numan-e ü-ngao jaiyah, Asa, hüyange Judah hei Benjamin üshei! Youngwanpa phei numan hipak hangshin ngoh, teshin-e I numan phei ngoh nang; hüyange numan-e I yamma-a, numan-e I tüolak; hüpoi numan-e I winne tüohma-a Iye numan winne tüohlak.

³Hipak nangjange laowe Israellan ütingpa Kahwang yenangpe imante nyüolak jingne ngengpa yenangpe, hüyange ngaokhüm yenangpe nyoi ngoh yangki.

⁴Hüpoi aope iman shanghah shaoshiwante iman-e Youngwanpa Israel Kahwang tangte lüppe ye hüyange I yam, iman-e I tüo.

⁵Tüolan nyih hei hipak me kahmük üshei yeme ütuh ümeng shaha ngohpu jingne ao-o yenyampe kemme yongpu ye-okpe ngoh yangki.

⁶Jat jawe jat ja phei tüi-e yong, hüyange chingnyu jawe chingnyu ja phei tüi-e yong, hangjingne Kahwange imante shanghah shaoshi hüyange shaoshi yatengpu pei ne tam; iman yeonge paikhoih.

⁷Hüpoi numan wongnange ngohyah, hüyange wongyenangpe tah ngoh, hangjingne numan-e lingpu toishao me küw tüolak.”

⁸Aope Asawe tüolan ngao hüyange Obed üha Azariah hipawe itpu jai, I wong shenang she nang, hüyange Judah hei Benjamin kahmük üshei mepu, hüyange Iye ompu Ephraim phaotang kahmük chingnyulan mepu peshaolan winne tam; hüyange Iye Youngwanpa khümjing ghonyoi me ngohpu Youngwanpa wümjong lingeye.

⁹Hüyange Judah hei Benjamin khongküm, hüyange Manasseh mepu hüyange Simeon mepu iman phei teishinne ngohpalan Iye jemne tam, hangjingne aope iman-e Youngwanpa Kahwang I phei ngohnang she shinge ok, Israel mepu kahta üngang I phei omme pei.

¹⁰Asa ahngne mengpu wangpeng pen me nga shepupa lekeng lüm shepupa me iman Jerusalem me jem.

¹¹Tüonyih iman-e chinghahwante yahyepu mepu Youngwanpate mahu gho nyit hüyange nyee haja nyit phei dopu pha.

¹²Hüyange Youngwanpa iman pajeiyonglan Kahwang, iman mongjang üsheiye iman yaha üsheiye yamlak jingne jiengjep.

¹³Hüyange aowe Youngwanpa Israel Kahwang yeyamlakei, naosheha ne jeyah, lwngmei ne jeyah, sheko jeyah netan jeyah li ne tamlak.

¹⁴Hüyange ngao üyong ngaiye hüyange üngwünne, hüyange nyawong wünge iman-e Youngwanpate jiengjep.

¹⁵Hüyange Judah khongkümpuwe jiengjeppu me mongmei; hangjingne iman-e iman mongjang üsheiye jiengjep, hüyange iman lahnyikpu khongküm puphei yam hüyange iman-e I tüo; hüyange Youngwanpawe imante iman neikonne toloimeipu pha.

¹⁶Ahngpa Asa Inyu Maacah, ahngyha ne menge yetamlak jingne yah tei, hangjingne yhawe nunushepu peshao Asherah jingne ling; hüyange Asawe tüolan mounga lange win, hüyange tüopa-a tüpla ne menge tam; hüyange hatüo Kidron yengnah me jakke tam.

¹⁷Asawe ülao kahwanglante khümpu nyoijinglan kahmük mepu khongküm menge yewin yapeyoi; I üyin jin kümme Youngwanpa I Kahwangte ütinglak puphei ngoh yangki.

¹⁸Hüyange Ipawe Kahwangte jaowe tamyangpu toinan, hüyange Iye jaowe tamyangpu toinan, hon, khüm, hüyange wan hei shenglan Iye Kahwang khümjing me peiye ang.

¹⁹Hüyange Asa ahngpa wanglamlampu wangpeng delüm me nga ngoipu mongme wehok hango yenangpe ngoh yangki.