Read Konyak Naga 2 PUTAHPANGAO 16 Bible Online

2 PUTAHPANGAO 16 - Konyak Naga bible

2 PUTAHPANGAO 16

¹Asa ahngpawe wanglam lampu wangpeng delüm me wok shepupa wangpeng me, Israel ahngpa Baashawe Judah ching hah-e ong, hüyange Judah ahngpa Asa tangte ao-o yekem yeyonglak jingne Iye Ramah chingtuk pepe.

²Hüwante Asawe Youngwanpa nok mepu hüyange ahngnok toinyu nanha angjing mepu hon hei khüm yah, hüyange tüolan-a Damascus me ngohpu Aram ahngpa Benhadad tangte shonne i;

³“Teman payimlan ngohyangpu kih-e teishinpu ngohhah; leihuyah, taowe nang tangte hon hei khüm shonnangpu. Sha-a pa-a Israel ahngpa Baasha phei numan teishinpuwa laktüoh, hümme nakshih ü-yikeng pongme ngohpu I kahtalan-a shinne ye mahlak.”

⁴Benhadad-e Asa ahngpa ngao nyingme yah, hüyange Israel chingnyulan hahlak jingne Iye wetaipalan ükhong tangme woipa naomeilan shon, hüyange iman-e Ijon, Dan, Abel Beth Maacah , hüyange Naphtali hahying yowe angpu chingnyulan khongkümpu hah.

⁵Aope Baasha tüopa jai, Iye Ramah chingtuk pepepu mepu lak, hüyange I toishao lak ne tam.

⁶Hüwante ahngpa Asawe Judah üshei ye mepu kahtalan jemne tam hüyange Baashawe Ramah me jonpu long hei pee khongkümpu sheihlak jingne ngao pha, hüyange iman-e tüolan Geba hei Mizpah chingnyulan chingtuk pepe-e ling.

⁷Tüopa hipak me Asa ahngpa tangte hipa Hanani pei, hüyange Ite i, “Nange Youngwanpa nang Kahwangte mong yehümpe Aram ahngpate monghümpu jingne Aram wetaipalan nang mepu yanne taine tamteki.

⁸Sudanlan hüyange Libyalan pongtongtoilan hüyange koipong pheipu wetaipalan üngang yengoh a? Tüoyangpoi nange Youngwanpate monghümpu jingne, Iye iman nang yak me pha.

⁹Hangjingne aoyin mongjang Youngwanpa yekao me khakshuwe ngoh nang iman jingne I wong hüolak jingne, kahtoknyu nopu tang me Iye mükshaoh-e leinang. Nange ngapa toi lingyangki, tüokhei sha-a me peiye nanga hipak phe me wehokpu ngohlak.”

¹⁰Hüwante Asawe hipate mongshih ngai, hüyange I küpnok me ang, hangjingne tüopa jingne Iye hipate mongshih ngaiye ngoh. Hüyange tüopa hipak ja me muh Asawe kahta ütamte shüpshe yenangpe shaoshi ne tam.

¹¹Asa wanglamlampu hipak mepu toishaolan üshei üwang mepu üküm ngoiye Judah hüyange Israel ahngpalan laitep me nyanyange ngohnang.

¹²I ahngne mengpu wangpeng delüm phei me tu shepupa me Asa ahngpa ya me maa ngai, hüyange dak ümenge ya faipa ne menge tam; tüoyangpoi I dak jingne Iye Youngwanpa yeyam, hüpoi muli jonpa hi yam.

¹³I wanglam lampu deli me ja shepupa wangpeng me I payimlan phei I shi,

¹⁴hüyange David chingnyu me Iye yoi nying nyingke watte lingpu longkhaonyu üsha me I mang mu. Iman-e I mang muwe tamshao me üpeameipu üngang hüyange üpe meipu minngawe I püm nopute pho, hüyange I lipute mangshappe iman-e vün loong üyong jak.