Read Konyak Naga 2 PUTAHPANGAO 17 Bible Online

2 PUTAHPANGAO 17 - Konyak Naga bible

2 PUTAHPANGAO 17

¹Hüyange Iha Jehoshaphat Ipa Asa nanleiye ahngne meng, I yafün monge lingyange Israel phei we ne meng.

²Iye chingtuk pepeyangpu Judah chingnyu üshei me wetaipalan ang, hüyange Judah kahtok me, hüyange Ephraim chingnyulan hanghepa Ipa Asawe om, tüolan me weyompalan ükhong ang.

³Youngwanpawe Jehoshaphat te moiman, hangjingne ima-a Ipawe wanglam lampu üwangye me hangke ling hüke tüopa pheite woi, hüyange Baal te yekhüm.

⁴Iye Ipa Kahwang shao shan, Kahwang ngaokhümlan jon, hüyange Israel ahngpawe lingpu kih-e yeling.

⁵Tüokhei I yak me Youngwanpawe ahngchinga mongne tam; hüyange Judah khongkümpuwe Jehoshaphat tangte hünghao yah pei; hüyange I toinyu nanha hüyange minyong ngampai üngang ngoh yangki.

⁶Iye Youngwanpa shaoshan-e ok yahpute otapu ngoh hüyange ülao kahwanglan khümjing nyoi hüyange Judah mepu Asherah kahyaklan Iye menge win.

⁷Iye wanglam lampu wangpeng lüm shepupa me Iye woipalan Benhail, Obadia, Zekharia, Nethanel, hüyange Micaiah Judah chingnyulan te konnyüolak jingne shon.

⁸Iman phei Levilan tu ngoiye hüyange ngengpalan ni ngoiye jamme tei. Levilan-Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, hüyange Tobadonijah ngoh yangki; hüyange ngengpalan-a-Elishama hüyange Jehoram ngoh yangki.

⁹Iman-e Youngwanpa ngaokhüm Laitep yah hüyange tüopa mepu kahtalante nyüowe Judah chingshaolan khongkümpute kem.

¹⁰Youngwanpawe neikonne ngohpu ahngchinglan, khongküm pute Ahngpa Jehoshaphat phei hokne tailak mepu nyamne tam.

¹¹Philistialan ütam-e Jehoshaphat te khüm ngin nangjange hüyange ülao hünghaolan poon ne yah pei, hüyange Arablan ütam-e nyee haja nyit phei me gho nyit hüyange youn haja nyit phei me gho nyit Ite yah pei.

¹²Tüokhei Jehoshaphat yelakpe ünyei ünyei wongnange jong. Judah khongkümpu me Iye chingtuk pepeyange chingnyulan ling;

¹³ümeken me shonne teilak hahying üngang yo ne tam. Jerusalem me Iye woipa ütahpalan ngohne tam,

¹⁴iman puhu hangke ngoh hüke: Judah puhu mepu Adnah woipa, hüyange I woipu phangme wetaipalan lakh lüm.

¹⁵Nishepupa woipa-a Jehohanan, hüyange I phang me wetaipalan lakh ni haja detet;

¹⁶hüyange lümshepupa-a Zichri üha Amasiah, I phangme wetaipalan lakh ni. Amasiahwe Youngwanpa shaoshanlak jingne phünne pha.

¹⁷Benjamin puhu mepu wetaipalan woipa-a Eliada, naomei ütah; I phang me ree hüyange wenglah pheipu wetaipalan lakh ni ngoh yangki.

¹⁸Hüyange I phei woipupa-a Jehozabad shapju me ponglak jingne meimeiye tümyangphei wetaipalan lakh ja haja detet woiyange.

¹⁹Tüolan kahtalan-e Jerusalem me ahngpa shaoshan, hüyange tüotokte paowe Iye Judah mepu chingtuk pepeyangpu ülao chinglan me ülao wetaipalan angyange ngohyangki.