Read Konyak Naga 2 PUTAHPANGAO 18 Bible Online

2 PUTAHPANGAO 18 - Konyak Naga bible

2 PUTAHPANGAO 18

¹Aope Judah ahngpa Jehoshaphat hakpa ne meng hüyange yihnoonne ngai, Iye Israel ahngpa Ahab hüyange Inok nipa me mata ne menglak jingne tüm.

²Wangpeng ütenja ngohyang phei me Ahab phei hüolak jingne Samaria chingnyute Jehoshaphat lai. Jehoshaphat hüyange I pheipulan mongmei sheiye yah, hüyange Ahab-e nyee hei mahu üngang toiye mo tüm. Hüyange Gilead mepu Ramoth chingnyu hahlak jingne Iphei omkei she Jehoshaphat te yohne ngang.

³Israel Ahngpa Ahab-e, Judah Ahngpa Jehoshaphat te i, “Ramoth ching hahlak jingne nang ü-phei taikü ningyah?” Jehoshaphat-e jan-e i, “Nang tümyangpu ne mengma-a tao-o tümyangpu ne ngohkülak, hüyange ü-kahtalan-o nang jing. Toman-e nangte jamlak.”

⁴Hüpoi Jehoshaphat-e üne-o Israel Ahngpate i, “Üwangne teman-e Youngwanpate hüng tonghah.”

⁵Tüokhei Israel ahngpa Ahab-e hipalan iman gho peli nanjingte nyik-e jem, hüyange imante tong, “Ramoth-gilead ching hahlak jingne tao taihah heiya yetai hahshi?” Iman-e jan-e i, “Chinghah tüoh; Kahwange nangyakme okke tamphalak.”

⁶Hüpoi Jehoshaphat-e tonge i, “Teman-e Youngwanpate tonglakne ülao hipa ja yengoh lak a?”

⁷Ahab-e jan-e i, “Youngwanpate tonglak jingne üne-o kahta ja, Imlah üha Micaiah ngohnang. Hüpoi taowe Ite nunangki, hangjingne Iye aope-o üjeng ümeipa hango ye-itam; hipak phe me ümeng shaha itte tamnang.” Jehoshaphat-e jan-e ye, “Ahngpa-e tüo kih-e tah i.”

⁸Hüwante Ahngpa Ahab-e ahngnok yompalan yo mepu woipa ja nyik-e i, Imlah üha Micaiah mamshe woi peikei.

⁹Sha-a Israel ahngpa Ahab hüyange Judah ahngpa Jehoshaphat moi niye ngeng-ahng o oyange Samaria pejong ünah ye me ngohpu tahnoijing me ahngpa shotjing me shot; hüyange hipalan khongküm puwe iman sheshao me itpu ngao iye ngaowe tam.

¹⁰Iman yo me ja, Chenaanah üha Zedekiahwe yan phei üwong ni pheipu üshang ling hüyange Ahabte i, “Youngwanpawe hatüo hüke inang, ‘Tüopa phei nange Aramlan phei hoklak hüyange iman naolak.’ ”

¹¹Ülao hipalan khongkümpuwe jakih muh ngao; “Ramoth-Gilead phei hoklak jingne yayongtüoh hüyange nange oklak.” Hangjingne “Youngwanpawe nangte okke tamlak” she iman-e i.

¹²Tüopa hipak me, shaoshanpa aowe Micaiah te nyiklak jingne tai, Iye Ite i, “Ülao hipalan khongkümpuwe ahngpawe okpu ngelak jingne itpu ngao iye tamyangki, hüyange nange-o hüke muh ngaowe tampu shemei!”

¹³Hüpoi Micaiahwe jan-e i, “Üyin me ngohpu Youngwanpa min me taowe jan-e inang, Youngwanpawe üte hanghe inang hatüo taowe ngaolak!”

¹⁴Aope I ahngpa Ahab shongte pei, ahngpawe Ite tonge i, “Micaiah, ahngpa Jehoshaphat tomni Ramoth-Gilead chinghahlak jingne taihah heiya, yetaipu meilak?” Micaiahwe jan-e i, “Ching hahtüoh!” “Tüoyangpoi numan-e oklak. Youngwanpawe numante okke tamlak.”

¹⁵Hüpoi Ahab-e Ite jan-e i, “Aope nange ü-phei Youngwanpa min me ngaolakei, üting hei ngaotüoh! Taowe nangte tüopa jingne hangshin me ilak shi?”

¹⁶Hüyange Micaiahwe jan-e i, “Nyeeyompa yenangpu nyeelan kih-e, taowe Israellan kahtang me yanne ngenangki, hüyange Youngwanpawe i, ‘Tüolan-a yompa yenang, iman kahta lili yoi nokte chingmei me leih yene tamtüoh.’ ”

¹⁷Israel ahngpawe Jehoshaphat te i, “Taowe nangte Iye üjingne ümeng shaha ngaowe tamnang, ümeipa me itpu minpha ja she ye-i a?”

¹⁸Micaiahwe yelakpe ngaowe i: “Sha-a Youngwanpawe hanghe i jaiyah! Wangdang me yoi ahngpa shotjing me shotyange, I neikonne yoi wangdang shongmokpalan yongyange taowe Youngwanpa nge.

¹⁹Youngwanpawe tong, ‘Ramoth me I taiwante mahtamlak ne aowe Ahab lowe lamme tampu oklak?’ Shongmokpalan ütam-e ülam ja i, hüyange ülaolan-e ülaopa kih i;

²⁰yaha ja yonge sheshao yete ngaiye, ‘Taowe I lowelamne tampu oklakei’ she Youngwanpa phei manngao manngao mop. Youngwanpawe tong, ‘Hangke linge?’

²¹Yahawe jan-e i, ‘Tao tailak hüyange Ahab jing hipalan khongkümpuwe ngaoleih ine tamlak.’ Youngwanpawe i, ‘Taitüoh hüyange I lowe tamtüoh. Nange okpu ngelak.’

²²Sha-a tüokhei leihuyah, Youngwanpawe tüolan nang hipalan ju me tahleih ilak yaha hinne tamteki; Youngwanpawe nang jeng me ümengpa me ngaoteki!”

²³Hüwante Chenaanah üha Zedekiah owe wen hüyange Micaiah sheta te yakphawe lei, hüyange i, “Hangkih ting me Youngwanpa yaha nang phei ngaolak jingne tao tüohyange taipu?”

²⁴Hüwante Micaiahwe jan-e i, “Leihuyah, nang nying nyingke lowe ngohlak jingne tüp ümongpa te ongpu nyih me nange ngelak.”

²⁵Hüwante Ahab ahngpawe I shaoshanpa ja te ngao phawe i, “Micaiah photüoh, hüyange chingnyu mepu Governor Amon tangte hüyange ahngpa Joash tangte woi teitüoh.

²⁶Imante ahngpawe hüke inang she itüoh, ‘Tüopa kahta küpnok me küwtüoh hüyange tao chingmei me leih manye manye, an hei yeng üjing jingha phei angtüoh.’ ”

²⁷Micaiahwe üngwün, “Nang yemahpe leih yema-a, hüma-a Youngwanpawe tao kaiye yengaopu ne menglak!” Hüyange Iye püowe i, “Kahta liliye taowe hanghe ngaoyangki, jaiyah!”

²⁸Tüokhei Israel ahngpa Ahab hüyange Judah ahngpa Jehoshaphat, Gilead mepu Ramoth chingnyu hahlak jingne ong.

²⁹Hüyange Ahab-e Jehoshaphat te i, “Tao ü-nying nyingke ahngpa yang she yeshinglak jingne ü-nyemo jeilei nüng hüyange shapju te ongshih nüng; hüpoi nangpa-a nang jing ahng o yayah.” Tüokhei Israel ahngpawe yoi nying nyingke shingne yetamlak jingne o-yange shapju te tai.

³⁰Sha-a Aram ahngpawe I pongtongtoi woipalan te o-ngao phawe i, “Israel ahngpa ja shingha tokte kaiye üjoi üyong ao phei-o tah hok.”

³¹Tüokhei aope iman-e Jehoshaphat nge, Israel ahngpa-a tüopa ne mengkülak she iman khongküm puwe teih, hüyange Ite shümlak jingne iman leihye. Hüyangpoi Jehoshaphat-e üngwünne tam, hüyange Youngwanpawe I yinne tam hüyange Ite shümme peipu mepu leihye mah.

³²Pongtongtoi woipawe I-a Israel ahngpa yeje she nge ok, tüokhei Ite jange woipu mepu iman lakmah.

³³Hüpoi Aramlan wetaipa jawe wulepawe I jing wenglah nowe yahpuwe kep, hüyange Israel ahngpa Ahabte mongkhüp hei shienghit nipa me hong. Tüokhei Iye pong tongtoi woipate üngwünne i, “Tao maayah teki, nang yak lüptüoh hüyange shapju mepu tao yanne teitüoh!”

³⁴Aope shapju menge ponge ta, Ahngpa Ahab-a Aramlan yekao me meyange I pongtong toi me khaktinge nyenge shotyange ngoh yangki. Wanghe nyipwante I li.