Read Konyak Naga 2 PUTAHPANGAO 19 Bible Online

2 PUTAHPANGAO 19 - Konyak Naga bible

2 PUTAHPANGAO 19

¹Judah ahngpa Jehoshaphat yemahpe Jerusalem mepu I nokte leih ye.

²Hanani üha Jehu hipa ahngpa pongte yu hüyange Ite i, “Nange ümengpalan te jamlak, hüyange Youngwanpate nupalante kenlak shunang she nange teihpu a? Nange hanghe lingyangki, tüokaiye nang tang me Youngwanpa mongshih ngaipu yah peinang.

³Tüoyangpoi nang me meipu ütam ngohnang. Nange kahtalan-e khümme ngohpu Asherah kahyaklan khongkümpu winne tamyangki, hüyange Kahwange mongpu linglak jingne nang ngang yangki.”

⁴Ahngpa Jehoshaphat Jerusalem me nyoi yapeyoi, heyekao Beersheba mepu apyekao phaotang kahmük Ephraim üjengpong ngoiye, iman pajeiyonglan Kahwang tangte, kahtalan nyik-e jemlak jingne kahtalan tangte I yelakpe kem-e pong.

⁵Chingtuk pepeyangpu Judah chingnyu phe me Iye kahpalan le,

⁶hüyange imante hüke winne shaiye tam: “Ngaophün phawante kentingyah; numan-e kahtalan wong me lingpune yeje, hüpoi Youngwanpa wong phang me lingnang, hüyange numan-e aope ngaophün phayapeih hüwante I numan phei ngoh nang.

⁷Youngwanpate nyamtüoh hüyange kentinge lingtüoh, hangjingne ima-a teman Youngwanpa Kahwange ye-i-yeshepe ngaopu, yejema-a sheta leipu, yejema-a yakjai yahpu lante yenün oklak!” she nyüo.

⁸Jerusalem me Youngwanpa ngaokhüm menge ngaipu yejema-a chingnyu me nyoipalan yo me kahtok jingne mop ngaipu lili me ngao phünlak jingne ahngpa Jehoshaphat-e Levilan, ngengpalan, hüyange chingshao woipalan leetam.

⁹Iye imante hüke winne shaiye tam: “Numan-e lingpu toishao lili me, Youngwanpa te nyampu phei, ütinglakpu phei I ngao jaiye lingtüoh.

¹⁰Hangke tingme numan jeiheinaolan iman chingnyume ngohpalan mepu iy shaipu jeng, ngaokhüm yejema-a lingne tampulan, nyanpu ngaokhüm yejema-a linglak ngaokhüm jeng me numan tangte moppe peilakeih, hüke Youngwanpa sheshao me iman ümeng ye-omlak hüyange numan hei iman tang me mongshih ngaipu yepeilak jingne numan-e iman kentingne tamme nyüotüoh. Hüke numan toishao lingma-a numan-e ünu yenecklak.

¹¹Mengpu wanglam yekao me ngaipu toishao lili jingne ütahpa ne ütahpa ngengpa Amariah ngengpa ngohlak, hüyange ükhong ching hei nok me ngaipu toishao hei ngao lili jingne Ishmael üha Zebadiah, Judah Governorpa ngohlak. Hüyange Levilan-e gho me tüm-e shopu ngaowa jonne linge taiya she, leilak. Wong nangyah hüyange winne shaipu kih-e jontüoh, hüyange Youngwanpa-a ütingpalan phei ngoh shih!”