Read Konyak Naga 2 PUTAHPANGAO 2 Bible Online

2 PUTAHPANGAO 2 - Konyak Naga bible

2 PUTAHPANGAO 2

¹Solomon-e Youngwanpa min jingne Khümjing nok ja hüyange I jingne ahngnok ja she welak tümme sho.

²Hüyange toinan sheih-e hangki kipalan kahta haja denyit, hüyange phaotang kahmük yeme long khüwpalan kahta haja detet, hüyange iman tang me leilak yakjongpalan haja lüm gho wok, Solomon-e tam.

³Solomon-e Tyre ahngpa Huram tangte ngao shon: “Hipak ja me nange üpa David phei jonne paipuke hüyange I nying nyingke ngohlak nok ja welak cedar pee I tangte shonpuke, hüke ü-phei jonkei.

⁴Leihuyah, Israel jingne jinte jonlak ne ngaowe tampuke, I sheshao me üpe ümei sünyet jaklak jingne, hüyange Kahwang sheshao me angpu an yelakpe dolak, hüyange shomme hüyange ünpongme jakke dolak jingne, Sabbath nyih lan hüyange lela hüyange Youngwanpa toman Kahwang jingne Leyahpu motappu me Ite hatüo phünne phawe, Youngwanpa Ü-Kahwang min jingne taowe nokja linglak ngohnang.

⁵Taowe yeonge yongpu khümjing wehunang, hangjingne toman Kahwang-a ülao Kahwanglan üshei phei sheyongpupa ngohnang.

⁶Hüpoi wangdang, hüke ütahpa wangdange-o Ite küppe ompu ye-okpute, aowe Ite nok ja wetampu oklak? I sheshaome sünyet jaklak nyoija tokte kaiye I jingne nok ja wetamlakpa tao-o ao shi?

⁷Tüokhei sha-a hon, khüm, shakphan yan, hüyange yan, hüyange wanghüng, ümaang, hüyange ütak inkhek hase hükihpu linge okpu, üne-o mieng yaowe okpu, Judah me hüyange Jerusalem me ü-phei ngohpu woipalan aoyin üpa David-e ange ngohnang iman phei ngohlak jingne kahta üjee ja ü-tangte shonpha.

⁸Üne-o Ü-tangte cedar pee, cypress pee, hüyange juniper peshüm Lebanon mepu shonpha, hangjingne nang shaoshanpa lan-e Lebanon me peshüm hangke wetlak hatüo taowe shinge ngohnang. Hüyange nang shaoshanpalan ü-shaoshanpalan phei ngohlak;

⁹hüke tümwante pekhüw nangjange tümne ngainang, hangjingne taowe we ne ngohpu khümjinga yeonge yonge hüyange manyange wepu ngohlak.

¹⁰Hüyange leihuyah, nang shaoshanpalan pee akpalante taowe wheat tah takpu haja da, barley tah takpu haja da, wuwüngti tük haja da, hüyange olive minnga tük haja da shon pha ning.”

¹¹Hüwante Tyre ahngpa Huram-e nyanpu lai ja me janpu phawe Solomon tangte shon: “Youngwanpawe yoi kahtalante kenpu jingne Iye nang iman tang me ahngpa ne menge tam.”

¹²“Kahtok hei wangdang lingpupa Israel Kahwang Youngwanpa min yongtüoh! Iye David ahngpate deitahpu, konheiman pheipu netanha moiman tam; yoi konheiwong jonne hüyange shinge okpu hünghao phapu kaiye aowe Youngwanpa jingne khümjing ja, hüyange yoi jingne ahngnok ja welak!

¹³“Taowe nang tangte Huram-Abi she minpa deitahpu hüyange manyangpu ailingpu shonnang;

¹⁴Inyu-a Dan nokphong mepu hüyange Ipa-a Tyre ching mepu. Iye hon, khüm, shakphan yan, yan, long, hüyange pee kaiye hangke toine menge linglak shingnang. Iye üne-o wanghüng, ümaang, hüyange inkhek ütak, hüyange inkhek ükhai lingpu oklak. Hüyange Ite lingne tampu ülam lili lingpu okpu, nang toishao me ütahpa kahtalan phei, ü-nokpu David, nangpa I toishao me ütahpalan phei linge oklak Iye shinge ngohnang.

¹⁵Tüokhei sha-a wheat, barley tah, wuwüngti, olive minnga, hanghepa ü-nokpuwe ngaoyangki, Iye yoi shaoshanpalan tangte shontam tüoh.

¹⁶Hangshin wongpongne menglakei Lebanon mepu toman-e pee akke tamlak, hüyange hatüo yenglin me yengching me Joppa te nang tangte yah peikülak, hümme nange hatüo Jerusalem te yah inlak.”

¹⁷Tüophei me Ipa David-e iman shangtoi nyanne yahpuke Israel kahmük me ngohpu yinhulan khongkümpu Solomon-e min nyan, hüyange noksa lingyange ngohpu yinhulan (kahheng) shangtoi lakh ja haja denga me lüm phei me gho wok ngohyangki.

¹⁸Iman haja denyit Iye hangki kilak jingne tüm, haja detet phaotang kahmük me long khüwlak jingne, hüyange kahtalan toi lingpute leilak woipalan haja lüm phei me gho wok te phatam.