Read Konyak Naga 2 PUTAHPANGAO 20 Bible Online

2 PUTAHPANGAO 20 - Konyak Naga bible

2 PUTAHPANGAO 20

¹Hipak ütenja ngohyang phei me Moab hei Ammon wetaipalan, hüyange Meunilan shüppe shayange Judah chinghah ne pei.

²Lüngleipalan ütam pei hüyange ahngpa Jehoshaphat te i: “Nang phei hoklak jingne Edom mepu wetaipalan ükhong üyong ja yengmang (Hümyeng) jayekao mepu peiküki, hüyange leihuyah, iman-e Hazazon Tamar (hatüowa En-gedi nanlei nyikpu min) omteki.”

³Hüwante Jehoshaphat nyam, hüyange lam woilak jingne Youngwanpa yam. Hüyange Judah khongkümpu me nyaowelelak jingne Iye ngao pha.

⁴Judah chingnyu lili mepu kahtalan lam woilak jingne Youngwanpa te tongne Jerusalem te mam-e jem.

⁵Judah hei Jerusalem kahtalan khümjing longkon üla nyoi me jem. Ahngpa Jehoshaphat wen hüyange iman sheshao me yong,

⁶hüyange üngwünne yop. “O Youngwanpa toman pajeiyonglan Kahwang, nang wangdang me ngohyange kahtoknyu jatlan üsheite wanglam lam nang, Nanga ütahpa hüyange wongnang pupa, hüyange aowe-o nang phei hokne ye-ok.

⁷Nanga toman Kahwang. Aope nang kahta Israellan tüopa kahmükte pei, aoyin kahta tüome nyoiye ngoh nange jange tei hüyange kahtok-a nang shümpa Abraham Ihuhayimlante, iman jingne jin jinte ngohlak jingne pha.

⁸Hüyange iman tüome nyoi yangki, hüyange nang min yonglak jingne tüopa me khümjing ja we, hüyange i,

⁹toman tang me wengtuh peima-a, yanglow, ngaophünpu, leamdak, yejema-a seanyao yenglepu peima-a, toman-e tüopa nok me hüyange nang sheshao me yonglak, hangjingne tüopa nok me nang min ngohnang, hüyange toman shanghah shaoshi wante nangte üngwünlak, hüyange nange jailak hüyange yintamlak.”

¹⁰“Sha-a Ammon, Moab, hüyange Edom kahtalan-e tomante shümnang. Aope toman pajeiyonglan Egypt mepu ngai, nange imante tüolan kahtokte ongne yetam, tüokhei toman pajeiyonglan iman neikonne tai hüyange iman mahne yetam.

¹¹Leihuyah, nange tomante mothleilak jingne phapu, nangjing mepu toman jange teilak jingne peiye tomante iman-e naowe tamphaning she inang.

¹²O toman Kahwang, nange iman tangme ngao yephün tamlak a? Hangjingne toman phei tüi-e peipu tüolan ükhong üyong phei hoklak toman wong yenang. Hang linglak toman-e yeshing, hüpoi toman-e nange jamkülak jingne hei leinang.”

¹³Judah kahtalan khongküm, iman shekonyulan hüyange hayimlan phei, khümjing me yong.

¹⁴Ükhong yo me omme ngohpu Levilan kahta ja te Youngwanpa Yaha pei. I min-a Zekharia üha Jahaziel; I-a Mattaniah, Jeiel, hüyange Benaiah kaiye peipu Asaph üli hüyange Asaph puhu kahta ja ne ngoh yangki.

¹⁵Jahaziel-e hüke i, “Nang üyongpa ahngpa hüyange Judah mepu nang kahtalan hüyange Jerusalem üshei: hüke Youngwanpawe numante inang, ‘Numan tahnyam, yejema-a tüopa ükhong üyong jingne mong shoiye tah ngoh; hangjingne shapjuwa numan jing yeje Youngwanpa jing ngohnang.

¹⁶Ngainyih numan-e imante shümtüoh; leihuyah, iman Ziz yekaote ongpu lamme peikülak, hüyange Jeruel phaonyu heong yekao kahjee ünah ye me numan-e iman ngelak.

¹⁷Tüopa shapju me numan-e hoklak wongpong ne yengailak; yoi yoi nyoijing me tümyange yongyah, yepope yongtüoh, hüyange numante Youngwanpawe okke tampute leiyah, O Judah hüyange Jerusalem.’ Tahnyam, yejema-a mong yehümpe tahngoh; ngainyih iman phei hüolak jingne shapjute ongtüoh, hüyange Youngwanpa numan phei ngohkülak!”

¹⁸Hüwante Jehoshaphat yoi sheta kahtokte khuh ta; hüyange Judah hei Jerusalem me ngohpu khongküm I phei jamme Youngwanpa sheshao me ümme khüm.

¹⁹Kohath hüyange Korah puhu mepu Levilan yong hüyange Israel Kahwang Youngwanpate üngwünne minyong pha.

²⁰Kahtalan napning shonge lao hüyange Tekoa phaonyu jong phei owe tai. Hüyange iman yayonge taiwante, Jehoshaphat-e imante winne shaiye i: “Judah hüyange Jerusalem kahtalan! Numan Kahwang Youngwanpate mong hümtüoh, hüyange numan yepope yonge oklak Kahwang hipawe numante hanghe ngaowe tam ütinglak yah, hüyange numan-e okpu ngelak.”

²¹Hüyange kahtalan phei teingao yang phei me, ahngpawe ngao pha yange, hem lokpalan üjaopa o üheng o-yange wetaipu nyahponglan sheshao me; “Youngwanpate minyong phatüoh hangjingne I yayeng shüpshe jinte ngohnang” she, lokke kemlak jingne tam.

²²Aope iman-e hem lokne wang, hüyange Youngwanpa minyong: Judah phei hokne peipu Ammon, Moab, hüyange Seir kahtang wetaipalan te Youngwanpawe dodoyange ngoh, hüyange iman khongküm mahtam.

²³Ammonlan hüyange Moablan-e Seir kahtalante shüm, hüyange jaoshe-e mahtam; leihkheih yepuwe iman hei iman teitoi tayange khong khangküm mah.

²⁴Aope wetaipu Judah nyah ponglan phaonyu jong mepu yomtep ngoi; iman-e wepalan ükhong yekaote lei, hüyange iman-e ngepuwa kahtok me toitayange ngohpu lipu mang shaha ne ngoh; she ja nehoi phette yetai.

²⁵Aope Jehoshaphat hüyange I kahtalan nok pomme yahlak jingne pei, iman-e tüolan yo me toinan üngang hüyange toinyu maawe tüo. Pomme yahpu toinyu nanha shaijemwante iman-e nyihlüm hipak yah, hüpoi jamloi ngohpu nanjingne iman-e khongkümpuwa yeyahpe tüoh.

²⁶Hüyange peli shepupa nyih me Beracah kahjee me iman jem hüyange Iye linge tampu khongkümpu jingne Youngwanpate minyong pha. Tüokhei tüopa kahjee te tenyih ngoiye “Beracah” she nyiknang.

²⁷Jehoshaphat-e I pheipu wetaipalan khongküm woiyange okpu ngeye Jerusalem te leih ye, hangjingne iman Youngwanpawe iman wepa mahtam.

²⁸Aope iman chingnyu ngoi, hemlokke, kongki ümtük hei nyawong wüng phei khümjingte ong.

²⁹Hüyange aope Israel wepalan phei tüi-e Youngwanpawe iman phei hokpu ngaolan jai, jat hei li mepu ahngchinglan khongkümpu Kahwangte nyampu pei.

³⁰Tüokhei Jehoshaphat-e chingmei me wanglam lam, hüyange Kahwange Ite üshei yeme chingmei hüyange toloimeipu pha.

³¹Jehoshaphat nyupuh wangpeng delüm me nga shepupa me Judah ahngpa ne meng hüyange Jerusalem me wangpeng da me nga wanglam lam. Inyuwa Shilhi üha Azubah yhala ne ngohyangki.

³²Iye Ipa Asa kempu lamnyu me kem, hüyange Youngwanpa sheshao me hanghe tingnang hatüo mepu yeyan.

³³Tüoyangpoi ülao kahwanglan te khümpu nyoijinglan menge yewin. Kahtalan-e iman pajeiyonglan Kahwangte mongjang üsheiye lüppe yepei.

³⁴Sha-a Jehoshaphat toishaolan, üwang mepu üküm ngoiye, Hanani üha Jehu pungao, hanghepa Israel ahnglan pungao me nyan-e ngohnang, tüome tüolan-a nyanyange ngohnang.

³⁵Hipak ja me Judah Ahngpa Jehoshaphat-e Israel Ahngpa Ahaziah, aowe yemeipu maawe lingyapeih, I phei teishinpu ngoh.

³⁶Iman-e Eziongeber yengtien jing me yengchingte kemlak yenglin ling.

³⁷Hüpoi Mareshah ching mepu Dodavahu üha Eliezerwe Jehoshaphat te deingao phawe i, “Nange Ahaziah phei teishinpu nanjingne nange hanghe lingyangki, Youngwanpawe menge winlak.” Hüyange yenglin-a menge mah hüyange aope-o yekem.