Read Konyak Naga 2 PUTAHPANGAO 21 Bible Online

2 PUTAHPANGAO 21 - Konyak Naga bible

2 PUTAHPANGAO 21

¹Jehoshaphat li, hüyange David chingnyu me Ipayimlan phei mu: hüyange I ha Jehoram I nanleiye ahngne meng.

²Judah Ahngpa Jehoshaphat üha Jehoram Inaolan wok ngohyangki; Azairah, Jehiel, Zekharia, Azariahu, Mikhael, hüyange Shephatiah.

³Iman üpawe iman lili te hon, khüm, hüyange ülao toinyu nanha wangman-e pha, hüyange chingtuk pepeyangpu Judah chingnyulan me iman japong me ange tüoh. Hüyangpoi Jehoram jeiyongpa ne mengpu nanjingne, Jehoshaphat-e I nanleiye ahngne menge tam.

⁴Aope Jehoram-e ahngchinga wongnange wanglam lamyapeih, Inaolan khongkümpu hüyange Israel ahnghalan-o ütam omme yanglow-e toiküm.

⁵Jehoram ahngne menge wangwante I nyupuh wangpeng delüm me ni ngohyangki; hüyange Iye Jerusalem me wangpeng tet ahngne meng.

⁶Iye Ahab ahngpa hüyange ülao Israel ahnglan wanglam ümeng pheite woi, hangjingne ima-a Iye Ahab yhala yomepu ja yoi sheko ne yah. Hüyange Iye Youngwanpa phei tüi-e ünu om;

⁷tüoyangpoi Youngwanpawe David ahngching mah ne yetamhu hangjingne ima-a Iye David phei jiengjeppu ja yah hüyange I huhayimlan-e yelakpe wanglam lamlak she jan.

⁸Jehoram-e wanglam lamwante Judah phei tüi-e Edomlan yong hüyange ta-ngai tüowe ahngching ja ne meng.

⁹Tüokhei Jehoram hüyange I shaoshanpalan pongtongtoi me yayong hüyange Edom chinghah. Hüwante Edom nyahponglan-e iman neikon, hüpoi wangnyak me iman taipu okke yinyangki;

¹⁰Tenyihte ngoiye Judah phei tüi-e Edom hokke yongnang. Tüopa hipak ja me muh, Libnah chingnyu-o moppe ngaiyangki, hangjingne ima-a Jehoram-e iman pajeiyonglan Kahwang Youngwanpa winne tüoh.

¹¹Iye Judah kahtang kahmük yin me ülao kahwanglan khümjing nehoi we tam hüyange Judah hei Jerusalem kahtalan Youngwanpa phei tüi-e ünu omne tam.

¹²Jehoram tangte hipa Elijah mepu nyanpu laingao ja hüke nyanyange shon: “Numan pajeiyong David Kahwang Youngwanpawe nangwinnang! Nange nangpa Jehoshaphat ahngpa pheite yejema-a nangpu Asa ahngpa pheite yewoi.

¹³Ümei linghah shepu nanleiye Israel ahngpalan-e lingpu phei te nang woi hüyange Ahab hei Ipheipulan-e Israellan ünyong yete woipu kih, nange Judah hei Jerusalem kahtalan Kahwang mepu yanne tam. Ünyei ne nange nang phei shemei she ngohpu nang naolan toiye win.

¹⁴Tüojingne, Youngwanpawe nang kahtalante, nanghalante, hüyange nenok shekonyulante, shaoshi ümeng peitamlak hüyange nangme nangpu khongkümpu tangme shaoshi tamlak.

¹⁵Nango nang nying nyingke üyei me yeonge jeih dakpu dak phei shaoshilak hüyange tüopa-a nyihjeih she shemeng shemeng she ngelak.”

¹⁶Yengnah paowe nyoipu Sudanlan phei owe Philistialan hei Arab lan ütam nyoi ngoh. Jehoram phei taiye wehoklak jingne Youngwanpawe imante hengetam.

¹⁷Tüokhei iman-e Judah chinghah, ahngnok pomme yah, hüyange Iha ükümpa Ahaziah shaha tüohyange ahngyhalan hei ahnghalan khongkümpu küpnokte phowe tei.

¹⁸Tüolan khongkümpu phei me Youngwanpawe I yei me aope-o yemei oklak jeihdakpu dak meng ja pahtam.

¹⁹Wangpeng ni nanjing hipak ngoiye peiwante, dak loiteiye seanyu shaoh ngaiye, shaoshi üyong phei I li. Ipayimlante jakke tampu kih-e I kahtalan-e Ite iyeshepu vün jakke yetam.

²⁰I nyupuh wangpeng delüm me ni me Jehoram ahng ne meng hüyange Jerusalem me wangpeng tet jingne wanglam lam. Aope I liyapeih aowe-o mongmenge yeteih. Iman-e I mang David chingnyu me mu, hüyangpoi ngeng-ahnglan mangkoksa me yeje.